In u so ultimu libru, Sophie Montel, eletta è anziana dirigenti di u FN, criticheghja u cumpurtamentu di l’eletti è di i funziunarii di u so ex partitu.
Certi righjoni ani vistu issu tipu d’eletti piddà i cummandi di cità da partuttu in Francia.
Vi n’arricurdeti di una cità di u Nord di a Francia induva u ghjovanu merri hà compru materiali pà a so casa, lasciatu a gestioni di i HLM comunali à a so mamma agenti immubiliari, ch’avia compru pistoli senza avenni u dirittu, ch’avia citatu à Hitler in pienu discorsu o ancu dorma nudu incù a so “amica” ind’a sala di sport di a cumuna?
Vi n’arricurdeti di a merria di Vitrolles FN-MNR chì daia a prima illegali pà a nascita di picculi francesi, chì ùn assicuraia più a gestioni di i bastimenti cumuni dapoi à 5 anni, ch’ùn sapia fà un bugdet, ch’avia rubatu i soldi publichi?
Vi n’arricurdeti di a cità di u Luc du Var chì hà cambiatu di merri trè volti dapoi à u 2014 incù un discorsu di merri lunariu?
Eh bè, ci sò altri casi! Tant’altri!
Sophie Montel vi spiega chì certi eletti di u so gruppu FN à a righjoni Bourgogne-Franche-Comté ani dumandatu u butirulu è i soldi di u butirulu : Carti di visita, piazzi gratisi VIP pà u calciu, tablettes iPad, una sciarpa d’elettu, abbunamenti à a rivista Minute (d’estrema dritta). Ben sicura, dumandaiani ancu i soldi andendu incù u so mandatu, essendu pà a maiò parti dilusi.
_(cropped).JPG){kind=link}
Issa donna hà suppurtatu 18 mesi di burli è analisi pulitichi intuntiti è ancu peghju ind’a misura chí l’eletti FN tradiziunalisti è maritati aviani fattu cuddà i sò “amichi donni” senza privena Mme Montel. U prublema quí era chì tutti issi parsoni si sò rivelati essa incumpetenti.
Certi eletti ùn sapiani mancu leghja o scriva una allocuzioni da leghja in cunsigliu regiunali, si faciani aiutà da eletti un pocu più struiti.
Pà dà un’altru asempiu di a debulezza di certi eletti, hà ricurdatu u fattu chí una sicritaria si pruminaia in vittura incù i cataloghi di tutti i club “échangistes” di Francia è Navarra, chì certi eletti tandu tradiziunalisti aviani una sola idea : cunverta i ghjovani à l’omosessualità. Strana pratica vinuta da ghjenti chí volini difenda à a famidda tradiziunali.
À 2,22 punti è 20000 voti in più, passaia u FN in Bourgogne-Franche-Comté.
Ancu a so capilista ùn lu vulia micca.
Vi rinditi contu s’è issa ghjenti erani prumossi à a presidenza?
Caspita!
Ci hè ancu u casu di l’intervista epica d’issa candidata – Edith Erre – FN eletta à tocca tocca à i dipartimentali di u 2015 ind’a Marne. U so fiddolu, anzianu candidatu FN, era statu criticatu in lu 2011 pà avè un maiò “tatouage” Nazi annantu à u so dossu. A so mamma ùn vulia micca essa presa pà una “nazi”, tandu.
In Italia, certi merri di i Cinque Stelle ani duvutu imparà tuttu di a gestioni, certi avendu membri di a so maghjurità missi in causa in certi affari.
È s’è in Corsica una tali squadra fussi eletta da quì à u 2021?
5000 agenti di a CDC missi ind’u bughju, in l’incapacità di travaddà.
Stradi lasciati à l’abbandonu.
Pulitica culturali è suciali lasciati corra.
Rumenzuli micca trattati.
Cumpurtamenti indegni.
À a risa di 320 000 parsoni è ancu di più.
U stalvatoghju Tempuli vi parla di iss’affari in termini falsificati è assai ridiculi. Ma s’è a Corsica fussi gestita di una tali manera, quali parlaria di a salvezza di a lingua corsa?
Quali parlaria di l’aiuti suciali pà i nosci antinati?
Quali parlaria di u tunnellu di Prupià?
Quali vidaria prughjetti sorta di a CDC o di l’altri cullettività?
A gestioni di i cullettività hè troppu impurtanti pà lascialla à ghjenti senza qualificazioni o senza vodda di fà bè à i so vicini.
Prima di sceglia, feti sempri attinziò à i prugrammi sempri più beddi, à i parsunalità criticati o micca.
O ghjenti, lascia una merria à una parsona chì pidda i materiali municipali pà rifà a so casa, ci voli à falla quantunqua, innò?
Riflitteti bè nanzu di piegà a voscia foglia di votu, un’indegna surpresa ni pudaria escia.
À 2,22 punti…