Gliffosattu : À i Stati Uniti, Monsanto hè statu cundannatu à pagà 81 millione di dollars à un malatu di u cancaru
Monsanto hè un’intrapresa agricula chì cerca à innuvà l’agricultura. Dipoi più di 40 anni in Francia, Monsanto hè furnidore mundiale di suluzione tecnulogiche è di prudutti chì ponu migliurà a pruduttività di e spluttazione agricule. L’intrapresa travaglia cù l’OGM chì facenu dibattitu dipoi anni è anni, è e sole analise di i so prudutti sò stati analisati da intraprese chì travagliavanu in cullaburazione incù ella.
Ghjè a prima scunfitta di Monsanto davanti à a ghjustizia federale americana in un affare chì tratta di u Roundup, pruduttu chimicu chì cuntene u famosu gliffosattu. Ghj’era un prucessu assai impurtante pè l’intrapresa. Un tribunale di San Francisco l’hà cundannatu marcuri u 27 di marzu à dà 81 millione di dollars à un malatu di u cancaru. A vittima, Edwin Hardeman, hà utilizatu di manera privata stu Roundup mentre più di 30 anni è hà cuntrattatu ‘ssu cancaru assai scarsu in 2015. Bayer, chì hà compru Monsanto in 2018, hà annunziatu fà “chjama“ di u ghjudiziu.
Ghjè u terzu prucessu ch’elli si piglianu in faccia in qualchì mesi. D’Aostu 2018, un tribunale di u Statu di California hà cundannatu Bayer à pagà 289 millione di dollars à un giardinaru ch’hè statu vittima di un cancaru similare à quill’altru di Hardeman. In Francia, cinque mesi dopu à st’affare, u tribunale di Lyon hà pigliu a decisione di caccià l’autorisazione chì mette in vendita u Roundup 360.
Ma a decisione di a ghjuria federale hè assai impurtante, u casu di M. Hardeman duveria esse una riferenza pè l’altri 700 parsone ch’anu a listessa lagnanza. Ma quella di M. Hardeman hè stata screditata perchè dicenu chì u tippu hè vechju ( 70 anni ) è chì u so età sarebbe un fattore di risicu pè sti cancari specifichi. In più di què avia avutu tempi fà l’eppattita C, maladia chì predispone à ‘ssu cancaru in particulare.
In fine di contu, Bayer avia uttenutu di u ghjudice Vince Chhabria ch’ellu spicchessi in dui u prucessu. A prima parte era sola pè l’esame di e cose scentifiche di l’affare, pè truvà una pussibile lea trà a spusizione à u Roundup è u cancaru. E so avocate ùn anu avutu l’auturisazione di cità i ducumenti di l’intrapresa, i “Monsanto Papers“, è pensanu chì hà pruvatu di piattà u fattu chì u pruduttu hè periculosu. Sti ducumenti ùn anu pussutu esse purtati à l’attenzione di a ghjuria per a siconda parte chì devia parlà è ghjudicà a respunsabilità di Bayer è Monsanto.