Quandu eru un pocu più ghjovanu, eru impauritu da u corsu di a Storia. Si dicia chì e cose ùn cambierianu più, chì tuttu l’evuluzioni suciali è ecunòmiche di l’Umanità sò state cumpite, chè u capitalisimu è a demucrazia eranu l’ultimu stadiu di u prugressu d’una civilisazione, chè pocu à pocu, tuttu u mondu acciterà sta scelta è chè u cummerciu internaziunale è a mundialisazione ùn si ponu arristà. U corsu di u XXIismu sèculu fù scrittu nanzu ch’ellu principia. A prufezia di Fukuyama in a so prova A fine di a Storia è di l’ultimu omu paria tutta vera è guasi utopica. Eppure oghje, in u 2019, ùn hè mancu u casu ! Chì benedizzione per a ghjuventù !
Aviu a paura prufunda chè a nostra generazione seria solu spettatore di a Storia, è mai più attore, perchè ùn ci seria nunda di più da fà, solu… campà in un mondu definitu da l’anziani, per mantenellu. Per furtuna, st’ultimi vint’anni anu cambiatu tuttu ! Da l’11 di sittembre di u 2001 à a crisa ecunòmica di u 2008 passendu per a lotta contru à u Statu Islàmicu è l’espansione militare è diplumàtica di a Cina, u declinu inesurabile di i Stati Uniti è forse, di l’Occidente, u cambiamentu climàticu ecc. S’è in u 1991, tuttu u mondu pensava chè l’egemunia occidentale era inevitevule oghje e carte parenu esse ridistribuite frà i paesi. Prove di a Russia per distrughje l’Unione Auropea è a so alleanza incù i Stati Uniti, prove di a Cina di duminà l’Asia, prove di u mondu arabu di rinasce incù una visione religiosa ultracunservatrice di l’Islam, i catalani, i churdi, i scuzzezi chì lottenu per a so indipendenza, ecc.
Forse vi pare stranu di leghje chè stu mondu pienu d’incertezze è di dubiti m’attira, ma pensu ch’hè l’omu hè un animale ch’hà bisognu di realizassi, d’esse u maestru di a so vita è di u so destinu, ùn pò fermà per sempre prighjuneru di u passatu, di un paradigmu impostu da l’anziani. Mi sentu vivu in l’incertezza è in i dubiti perchè hè l’ùnicu mumentu induve l’omu hè u veru maestru d’ellu stessu, ch’ellu pò sprimassi è cumpurtassi senza filtru, ch’ellu ùn hè più prighjuneru di u chiavati chì predefinisce e so pensate è e so scelte.
Pensemu d’esse liberi, fà e nostre scelte di manera raziunale, ma daveru, simu sempre prighjuneru di u nostru ambiu. Difinisce tutte e nostre pensate, è predifinisce l’infurmazioni ch’avemu nanzu di fà una scelta. Infine, a nostra scelta hè u risultatu di u nostru ambiu è dunque, ùn simu liberi.
Ancu s’è issu mondu novu pò impauracci, ci deve fà riflette à propositu di tutte e pussibilità ch’ellu ci dà. Simu i primi spettatori d’una èpica induve tutte e cose anu da cambià radicalmente da quì à cinque o deci anni, micca vinti, trenta o quaranta… U nostru futuru si difinisce oghje !
Allora, noi, corsi, ma soprattutu europei, eredi d’una civilisazione ch’hà marcata per sempre a Storia di l’Umanità, ùn duvemu più esse spettatori di a nostra propria stinzione, da a Cina, a Russia, o di i Stati Uniti. Duvemu piglià u nostru destinu in mane, duvemu, noi a ghjuventù addunisce ci in l’ùnicu scopu di cunstruì una sucetà nova, quella chè in u fondu di e nostre pensate vulemu. Serà solu pussibile s’è ci alzemu contru à stu mondu chì si ne more, stu mondu guvernatu da i vechji chì ci spieganu chè simu sfacciati quandu manifestemu contru à u cambiamentu climàticu, quandu prupunemu soluzioni à prupositu di i sughjetti maiò o vulemu duvintà attori di u cambiamentu suciale o pulìticu.
Simu noi l’avvene, è l’avvene ùn si pò scrive s’è ùn cambiemu e règule, s’è seguitemu à accità e règule imposte da quassù. Duvemu trasgredì e règule, adimbascià u paradigmu induve ci simu imprighjunati, prupone e base d’una sucetà nova per cambià u corsu di a Storia, per apprufità di stu momentu stòricu ch’ùn si prensaterà mai più per noi. Sì, ghjuventù, sia scema, sia creatrice, sia sfacciata, sia ribella cum’è ella sempre fù!
Tocc’à noi.