I scelti prumuziunali in infurmatica : speranza è realità.

Andendu ind’i supermarcati, aveti sempri vistu à certi « prumuzioni » annantu à l’urdinatori è altri « tablettes ».

Pà una cinquantina d’€, aveti una tablette « di entrata di gamma »

Pà €200, aveti un urdinatori.

Mà pà issi prezzi, qualessa hè a qualità pruposta ?

Qualessi sò i caratteristichi di i prudutti pruposti ?

Femu un giru di a scelta prumuziunali in un supermarcatu Aiaccinu (fini di ghjinnaghju di u  2019) è cunsigliaremi à certi suluzioni d’acquistu.

I « tablettes » :

Cuminciemu incù u primu mudellu 7’’ à 39,95€. Prezzu veramenti bassu, à 50 % di riduzioni.

IMG_20190128_113153

A marca hè cunnisciuta. U discu internu cunteni à pocu pressu 16 Go, intarissanti à a prima vista. Ma ci hè un picculu prublemu : u sistemu Android 6.0 di naciolu Linux, isciutu 4 anni fa è omancu suppurtatu pà l’aghjurnamenti (updates) à partasi da u mesi d’aostu di u 2018, guasgi un annu prima di a scrittura d’issu articulu.

Ancu s’è i prudutti ufficiali (ricerca, video, ghjochi) sò sempri aghjurnati da u fabricanti, ùn pudarà micca durà 2 anni, chì a versioni di u sistemu ùn ricevi più currettivi da a parti di i sviluppatori. U rischiu hè chì i virus sarani più faciuli à spartasi vistu chì i versioni ùn ricevani più i famosi currettivi di securità.

Da quì à 2 anni, senza aghjurnamenti, u vosciu navigatori internet pudaria limità u supportu di i pagini web è di i video, i prudutti di basa ùn sarani più adattati pà un usu quotidianu è a voscia tablette sarà sulamenti utili pà un quadru fotò.

Simpaticu mudellu di cunsumu oghjincu, ùn hè ?

Hè listessa pà a tablette à €49,50 di 9.7’’ . À a prima vista intarissanti ma incù un sistemu anzianu assai.

IMG_20190128_113157.jpg

U casu hè u listessu pà un altru mudellu più caru, guasgi 100€, sempri incu Android 6.0 « Marshmallow », di u 2015.

IMG_20190128_113009.jpg

Steti dunqua attenti à i prumuzioni in infurmatica. Pudariani essa intarissanti, ma s’è fighjuleti in dittagliu, u prublemu di « obsolescence programmée » o inusabilità effettiva pò vena assai in furia, in menu di 2 anni, in issu casu.

Par asempiu, issu mudellu à €50 (10.1’’, 8 Go di discu), senza prumuzioni è senza marca cunnisciuta, hè vindutu incù Android 7.1, di u 2016, sempri suppurtatu. I so caratteristichi bastani pà un usu muderatu di a tablette.

IMG_20190128_113052.jpg

L’urdinatori purtativi :

Cuminciemu incù un primu mudellu 11.6’’ vindutu à €149,90 incù 50 % di riduzioni (prezzu nurmali : €299,90).

IMG_20190128_112920

Un prucessori di basa, utili pà u trattamenti di testu ma micca pà i ghjochi. 2 Go di memoria. Sulamenti 2 Go pà iss’urdinatori purtativu? Hè u minimu raccumandatu da u fabricanti di u sistemu. E ancu, u sistemu piddendu à eddu solu 1,5 Go, vi ferma sulamenti 500 Mo pà fà marchjà u restu.

Ùn hè mancu assai pà Firefox, chì vi pidda guasgi 750 Mo pà una paghjina unesta è chjara.

Libre office vi pidda 200 Mo pà u trattamentu di testu, pò andà.

Paint o unu di i so derivati vi pidda 100 Mo.

Incù 2 o trè applicazioni, u vosciu urdinatori hè saturatu è marchjarà di manera troppu piana pà essa quiddu di i vosci bisogni.

Suluzioni ? Piddà un sistemu linux (Ubuntu è derivativi, Q4OS, Fedora, OpenSuse…) è mettalu annantu. Sarà più lighjeru.

Ma u prublemu principali ferma u discu di 32 Go pà gestiscia i dati cuntinuti annantu à l’urdinatori. 32, dunqua 18 o 19 Go dopu à a stallazioni di u sistemu eddu stessu, 24 o 25 incù Linux. Ùn basta micca pà 6 o 7 film d’alta qualità.

Hè listessa pà dui mudelli 11.6 » in prmuzioni vinduti à € 109,50 è 130, incù i listessi caratteristichi.

IMG_20190128_112923.jpg

 

Un cunsigliu hè dunqua di piddà un urdinatori incù à u menu 256 Go di discu, 4 o 6 o 8 Go di memoria è una carta grafica di min.512 Mo di capacità. Ùn smintichemi di pricisà a caratteristica di u prucessori à truvà ind’è i magazeni : doppiu cori incù à u menu 2 GHz di cadenza. Pà essa tranquillu, hè l’unica suluzioni.

4 Go di memoria, vi fermani 2 Go pà travaddà (è ancu 3 o 3,5 incù i sistemi di basa Linux).

6 Go di memoria, vi fermani 4 Go pà travaddà (è ancu 5 o 5,5 incù i sistemi di basa Linux). Pudeti ancù ghjucà à certi ghjochi in linea o classichi.

8 Go hè ideali.

Pudariati truvà à certi mudelli purtativi curretti in magazenu o in altrò (internet) pà un prezzu appena più elevatu, circa €250/300 (ancu di menu annantu à internet).

IMG_20190128_113122.jpg

L’affari ùn sò micca sempri quiddi chì vò criditi. Basta à fà attinziò, cum’è sempri.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.