A glubalisazione, un’unifurmazione ? 

Qual’hè chì hà dettu chì glubalisazione era unifurmazione ? O piuttostu, qual’hè ch pretende u cuntrariu ? Cumu si pò criticà u fattu chì da a glubalisazione nasce l’unifurmazione culturale ? U fattu chì u mudellu di Statu nazione sia indibulitu da stu fenomenu à prò d’un « paese glubale » ?

Hè G.-F. Bayart chì a ci spieca inde u so libru « U guvernu di u mondu, una critica pulitica di a glubalisazione » isciutu in u 2004. L’autore hè direttore di ricerca à u CNRS è specialistu di pulitica paragunata.

Cuminciemu cù una definizione di a glubalisazione. S’ellu si pò dì ch’ell’hè a multiplicazione di i scambii frà è sucetà, si pò dinò aghjunghje ch’ell’hè u scambiamentu di e manere di campà, ciò chì tocc’à l’intimu di a ghjente. Bayart ci dice ch’ell’ùn ci vole à analizalla cum’è una depussessione, postu chì e sucetà si n’impatruniscenu è sò elle chì a facenu campà. Tandu, pè viaghjà, a glubalisazione hà bisognu di l’adesione di i duminati.

Per ellu, u capitalisimu uccidentale hà purtatu à l’unità di u mondu, ma micca à a so unifurmità. A glubalisazione, hè un’ « interazzione mutuale generalizata », tantu un’impresa di duminazione chè l’opara d’ognunu.

C’è un’idea chì dice chì a glubalisazione hè un fenomenu novu chì mette in periculu u Statu nazione. Bayart prova di facci capì u cuntrariu. Dice chì a glubalisazione si mette in piazza pian’pianinu à u 19esimu seculu (grande migrazione, rivuluzione di i trasporti, sperienze pulitiche pianetarie cù e guerre napuleuniane pè esempiu…) è chì ci hè tandu un ligame frà glubalisazione è furmazione di u Statu. U liberalisimu ùn s’oppone micca à a putenza di u Statu postu chì ghjè u Statu chì sceglie u liberalisimu.

Dimustrazione : i mercati finanziari indibuliscenu u Statu ? Micca forse, postu chì anu bisognu di securità, di stabilità è di cunfidenza, assicurata da u Statu. U Statu hè ingutuppatu inde mosse di regiunalisazione cume l’Unione Aurupea ? Innò, postu chì ùn viaghja micca s’è i Stati ùn sò d’accunsentu (Brexit). U cuntrabandu indibulisce u Statu ? Innò, postu chì u contrabandu hà bisognu di fruntiere, è chì senza Statu nè fruntiere nè contrabandu. E mafie è a criminalità urganizata indibuliscenu anch’elle u Statu ? Ùn ci sò tanti studii pè u mumentu, ma permettenu quantunque à u Statu di rinfurzà u putere di pulizza, i cuntrolli à e fruntiere… Da riassume, d’appress’à Bayart, u Statu sorte rinfurzatu da a glubalisazione.

Passemu à l’effettu di a glubalisazione annant’à e manere di campà. Si dice di manera generale chì a glubalisazione ùn hà micca base suciale, ch’ella hè à l’origine di a sparizione di i particularisimi lucali. Cù a « pulitica per l’inghjò », chì s’intaressa à i modi d’azzione pulitica pupulare, l’autore ci mostra chì a glubalisazione hè limitata postu chì ùn s’oppone micca à un’arradichera inde u lucale è chì i gruppi suciali « l’adattanu à e so proprie strategie o à i s’imperativi di sopravvivenza. » In ritornu, a glubalisazione hè tandu naziunalizata o resa lucale. Rende tandu a so autonomia à i duminati, chì ùn sò micca tantu passivi.

Dice chì ogni impurtazione face è ri-adattata da a pupulazione, sicondu à e ripresentazione lucale. L’aduzzione, hè l’adattazione. Ùn si parla d’unifurmazione postu chì ci hè sempre una ri-invenzione. Si tratta tandu di « glucalisazione. » Pè esempiu in India, ùn ci hè micca carne buina inde i McDonald. E multinaziunale s’adattanu à u lucale.

Ne venimu tandu à a nuzione di « sughjettivazione », vale à dì a manera chì l’omu si ricunnosce cume ublicatu di seguità una regula. A regula hà bisognu di l’investimentu di l’individui pè esse messa in ballu. Quì, Bayart ripiglie Karl Marx : a duminazione hà dui puntelli, a spluttazione è u desideriu. I duminati sò d’accunsentu incù u scambiamentu.

Hè capita, stu puntu di vista si pò criticà. A pulitica, hè quantunque un’affare di capizzoni, è e cose scambienu più per via di e decisione di l’insù chè per via di l’abitudine di l’inghjò. Ma hè sempre interessante di cunfruntassi à d’altri pensamenti, è sopr’à tuttu di dicustruisce nuzione chì parenu semplice, à sensu unicu.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.