Dapoi sempri, i tradizioni sò sempri stati arradicati inde u campà di tutti i Corsi. Una d’attualità in sta vighjilia di Natali, hè quidda di l’ochju. L’ochju, u « gattivu ochju », ghjè sta cridanza anziana cum’è u mondu assai cunnisciuta ancu aldilà di i fruntieri Corsi, inde tuttu u Maditarraniu. Ghjè u fattu d’« annuchjà » a ghjenti, di manera di vulintera o micca, da caughjunà li guai, di saluta a maiò parti d’u tempu, ma ancu ind’a vita di tutti i ghjorni. Ghjè a manifistazioni d’una gattiva influenza chì principia d’un gattivu sguardu : l’ochju d’una parsona hà tandu u rolu di strumenti attraversu u quali st’influenza, sta forza, stu fluidu hà da caughjunà gattivi cunsiquenzi annantu à a parsonna chì i subiscia. U più à spessu, stu fluidu veni d’un’ammirazioni invidiosa, d’una ghjilusia tremenda. Pò ancu essa trasmissu senza renda si ni contu… Si pò ancu essa culpitu da « l’imbuscada » : ghjè un’imubusca data da i morti, quand’omu passa davantu à un campu santu o una funtana di notti par asempiu, chì sò lochi induva ci trovani i spiriti sionti i cridanzi…
Una sola manera di curà lu : chjamà un signadori, chì firmarà di prigheri sicreti u malatu, da caccià lu stu gattivu ochju. Sionti a gravità di l’ochju, è à qualessu u signadori hà à caccià, si pò fà usu d’oliu, chì hè a metoda a più cunnisciuta è a più efficaci, da miliurà a so intarvizioni. L’oliu hè ligata à parechji pratichi di purificazioni. À u battesimu, quandu un ciucciu hà da entra in u cristianismu, u nominipatri hè fattu incù oliu è, quand’una parsona si ni và, hè cuparta d’oliu anch’edda. Tandu, l’oliu hè monda utilizatu da caccià l’ochju. Si sversa annantu à acqua, è hà pà scopu di renda l’invisibili, visibili. I piscadori corsi svirsaiani oliu in u mari da veda meddu i pesci, chì sò l’ochji di u mari. U signadori hà da svirsà oliu annantu à l’acqua da ch’eddu vidissi a putenza di l’ochju.
Faci trè nominipatri mittendu à tempu un cuntattu incù a lumiredda à l’oliu incù quattru punti di u piattu (da crià una croci). U piattu devi essa biancu è fundutu. Dopu, u signadori dici i so prigheri, ricumencia i nominipatri, tuffa u so minghjuleddu inde u piattu è lasci cascà trè candeddi in drentu. Devi ricumincà st’opara trè volti. Sì i candeddi si buligani, u malatu hè « annuchjatu », s’eddi firmani candeddi, ùn hè micca ochju. Tandu u signadori devi fà trè uparazioni. Devi prima virificà ch’eddu si tratta bè di l’ochju. Ricumencia trè volti è, à a terza, forsi, u malatu sarà « spezzatu » : i candeddi chì si buligaiani prima si stabbiliscini, s’uniscini è piantani di mova. Ind’a goccia maiò si vedi tandu una pupilla… Sì à a terza uparazioni, i gocci movini sempri, l’ochju hè sempri quì. Ci voli ch’un’antra parsona a fessi, è ùn si pò francà trè parsoni sfarenti.
Quandu l’opara hè compia, si ghjetta l’acqua ind’u focu o fora. U minghjuleddu devi essa bè lavatu è u si secca annantu à i capeddi. Sì i gocci erani ripartiti annantu à tuttu u piattu, tandu l’ochju veni da parechji parsoni, ma s’eddi erani alignati (« i trecci »), veni d’una donna. Ma i signadori poni ancu caccià l’ochju senza oliu, incù prigheri sfarenti, fendu nominipatri annantu à u capu di u malatu. I signadori poni trasmetta i so cunniscienzi di l’ochju è i so prigheri solu a notti di Natali, à parsoni degni di riceva li. I signadori poni ancu curà certi malatii ch’ùn sò magichi : punghjituri, brusgiaturi ; è ancu l’animali pà i varmi, ecc. A data di a trasmissioni di l’ochju ferma misteriosa. Parchì sta nuttata quì solamenti ? Certi diciarani chì ghjè l’unica notti duranti à quali tutti i spiriti malefichi sò spariti. D’altri diciarani ch’edda hè a notti di u Cristu, è ch’eddu ci pruteghji, è tandu si ritrovu u paradossu eternu trà paganu è rilighjosu…
A tradizioni di l’ochju hè assai impurtanti in Corsica è campa dapoi seculi è seculi, eppuru, ferma sempri scunnisciuta annantu à parechji punti (di sicura annantu à quiddu cuncirnendu i prigantuli ch’ùn si poni trasmettta à tuttu mondu è fora di a notti trà u 24 è u 25 di dicembri…), è i virsioni cambiani assai d’un rughjoni à l’altri, dendu à sta pratica sputica di più incantu è una ricchezza tremenda !