Ùn li piaci tantu à iddu u titulu di pueta, è puri, quand’hè finitu u tempu di spassighjà trà i ballati melodiosi azziculendu zitiddina è natura benedetta, si pidda a strada aparta da una ghitarra furiosa, di fronti nant’à i camini mai palisati ‘lla criazioni corsa.
L’arti pueticu asisti pà a so biddezza, sottu à a piuma di Natali Valli, a puisia porta un missaghju di rivolta, sempri accatizzatu da un soffiu d’umanità. Stonda priziosa una voci da ascultà.
« Chì si pò fà di quissu mondu
Chì pocu à pocu si ni và
Chì duvintarà issu mondu
Mancu possu induvinalla »
A voscia puisia, i vosci canzoni portani una riflissioni prufonda nant’à i cambiamenti ‘lla sucità corsa è nant’à l’attualità, feti u ligami trà canzona corsa è tradizioni puetica, quidda chì canta a vita com’iddu si facia tempi fà.
- D’appressu à voi, ch’hè divintata a piazza ‘llu pueta in a sucità corsa?
Allora, i tempi fà, sò vicini è luntani in a sucetà d’oghji, vi dici u me parè, d’omu ch’ùn si cunsidarighja micca pueta, ma piuttostu musicanti chì provu di scriva testi, incù bedda sicura un sensu pueticu, par quissa ghjè difficiuli di parlà tali i veri pueta.
Allora, a piazza ‘llu pueta, diventa di più in più stretta (par diversi raghjoni chì vo sapareti), malgradu i sforza di l’istituzioni, di u cantu, i libra, i media etc., ci hè monda scumiuzzuli… ma poca tama.
Iè dapoi i tempi, l’umanu scrivi è oghji incù tanti mezi; a puisia si ferma à u zuddu di l’estru. L’annati sittanta, ci era una cuscenza pulitica, chì ci hà parmissu di sparguddà par sparta, fà ricunnoscia a sinsibilità di sti puisii, è di tuttu u fattu culturali, ma avali (senza fà generalità) mi pari chì ghjè una cosa piacevuli ma aspissu liscia, a teuria. A scrittura ghjè più viva in i scagna chè nant’à i labbra è u cori di monda cumpatriotti, ci hè più publicu in i sali di sinemà chè à i cuncerti di i cantadori corsi, parchì in casa, in carrughju, in campagna, chì si parla… ? Ci voli di essa francu è ricunnoscia (è tutti semu rispunsevuli un pocu, dopu u statu è i tenanti di tutti genari facini u restu, quì dinò senza fà l’amalgamu).
L’affari hè in francesu dinò, mi fermu chì ci vularia i spizialisti unesti par fà, pò d’essa un’analisa psiculogica nantu à ‘ssu fenomenu, ùn a so. Forsa a ditta cumunità di distinu ci aiutarà, certi sì ma a goccia à goccia allora. Ci voli à scriva, micca chè par empia fogli, ma pà traducia i fatti, l’evenimenta, ponaci quistioni incù fedi. Avè l’ochja è u spiritu sbarucatu, È com’è à long’andà, mai a vita hè stantarata, sempri spirà è micca solamenti. Eccu !
« Oghji a lutta pupulari
Diventi rialità
Hè incù a lutta pupulari
Chì a sintenza cascarà »
Quandì no ascultemu i canzoni com’è A lutta pupulari par esempiu, si senti chì vo seti cunduttu da una cuscenza suciali forti chì voli francà i fruntieri ‘llu naziunalismu, si trova allora in issi scritti un’andatura univirsali.
- Chì hè a piazza ‘lla lutta suciali, oghji in Corsica? D’appressu à voi, l’avemu abbandunatu issu cumbattu ?
A piazza di a lutta suciali, ghjè tamanta cosa in li discorsa è li mimorii, è in i consensus di a malignità ; Pà dì chì l’atti, ci sò ; ma sò misari in tuttu sensu (malgradu qualchì prugressa d’ublicazioni ma micca chè quissa). Sicura ghjeu, parsona chì veni di ciò chì si numaia a manca, credu sempri à ‘ss’ideali, essendu in i volti anarchistu, mi sò sempri ritruvatu minuritariu, ancu oghji à cuntistà, rifletta è essa di li volti ublicatu di raghjunà incù quiddi ch’e aghju pocu à dì è fà ; a prussimità hè un bè ma una schirzina dinò. È quandu si tratta di suciali, i cuncissioni sò com’è murtali pà un populu intrevu chì strazia ! Incù i disgraziati, i povari è l’omini, rimidià à ‘ssa parti di a sucità insupurtevuli, chì pà un locu « riccu », ci hè da cripà di rabbia. Comu si pò parlà di valori à mezu à tanta inghjustizia ? Eu, ùn sò mai statu naziunalistu in l’idei. Mi sò ritrovu à fà strada fora di i strutturi, sempri, parchì mi sentu patriottu corsu. Ma l’universalità ghjè un’affari di cori. Certi naziunalisti ùn ani micca à goda ’lla sucialità, ci n’hè unesti è spluttatori, stessa cosa ind’è i sucialisti.
Vi pò parè stranu, ch’e vi dissi ch’e ùn sò mai statu naziunalistu. Com’è diciu, pà l’universalità, micca quidda di i spluttatori, parchì ancu iddi si dicini universali, ma incù « les Emirs » solamenti !
Credu chì l’universalità, ghjè un’ideali, micca ‘lli partita pulitichi, ma di l’umani chì pruviriscini a libartà (parola maiori !) più chè l’idei manipulati. Mi possu sbaglià, ma hè ciò ch’e pensu forti. Quandu m’arrizzu a matina, ch’e cuntempiu u livanti, u punenti, a natura, tandu mi rimettu à creda, à scumbatta pà no corsi è ‘ssu mondu. Pinsendu chì l’essari di ‘ssa tarra ani sicuramenti i stessi mammi, babbi. I sintimi veri, chì facini è farani un mondu più beddu, più maiori in tutti cosi ‘lla vita. L’abbandonu ghjè un attimu solamenti, par quissi in mè, in no, forsa mai ci avemu da aguattà tali i verità chì vani solu ad aspittà. Ci avemu da ricutà, ma ci hè di i ghjorna chì ni dubitu !
Asisti dinò in i vosci testi una vera riflissioni etica, nant’à a cattiva via ch’idda hè intraccia di seguità a sucità corsa, ind’è voi si leghji una razza di cumbattu pirmanenti trà a ghjenti ch’ani u laziu di mantena i valori culturali è filusufichi, è quiddi chì facini a scelta ‘lla facilità, di l’urgogliu è di u mali.
- Da induva veni ‘ssa brama, dapoi 40 anni di dinunzià incù u cantu ?
Sò cunvintu chì ‘ssa brama hè nata da un pinseri pirmanenti di longu tempu ; aviu 10 o 12 anni quandu un fattu d’inghjustizia mi dessi a prima pena di a vita, ancu oghji quandi u ricordu rinvivisci ‘ssu fattu (micca gravi) ghjè tali una firita chì sempri mi cumovi. Ci voli pò essa di pinsà ch’e eru un bardonu chì a zitiddina stampa tanti fatti.
Sarà ancu par quissa (ma ùn la so) chì l’etica in modu ginirali si trova in i me testi è i suspiri d’ugni ghjornu, di più aghju avutu un’educazioni sivera. U raportu à l‘umani, arritti, dritti, di sicura hà fattu un pocu com’e socu.
U cantu m’hà parmissu di dì i cosi di manera più andanti, menu di fronti. Ma ùn dinunziu mai, d’un certu modu iè, piuttostu ghjè un custattu ghjustamenti di cridenzi d’upinioni, s’idd’hè pussibuli à ‘ss’epica…
U cantu mi parmetti di crià un dibattitu trà l’omini (forsa) è ancu di fà piaceri, o dispiaceri. Sò incapaci par disgrazia di faltà incù l’etica, par ogni affari !
U riacquistu hè statu sempri assimilatu à u rinnovu ‘lla cultura corsa anziana, è puri, à l’epica di l’anni sittanta è ottanta, i musicanti corsi com’è I Surghjenti ani pruduttu monda è monda ricchezzi musicali incù l’ispirazioni d’altri genari.
Mi dumandaiu quissa parchì mi pari chì vo seti u solu musicanti corsu à sunà di a ghitarra à l’usu blues o folk, incù una ricerca ‘lla melodia chì s’assumidda assai à l’artisti americani è inglesi di l’anni sissanta è sittanta.
- Quali erani l’artisti, corsi o stragneri ch’ani influenzatu a voscia musica ?
Allora, com’è mi risentu, una parsona paisana di radichi è di vicutu cù i meia, a sucità, sò sopratuttu qualcunu d’urdinariu !
À u principiu è sin’à l’ottanta mi sò viramenti ritrovu in u riacquistu, veru rinovu di a musica corsa, monda criatività valurosa, sin’à quì ùn ci hè guasgi nudda, a critica ci hè ghjustu à dì chì oghji ghjè u Réac-quistu ! Parchì avali ci hè più pampana chè uva, è parchì par l’assenza d’amicizia prufonda, sincera chì oghji hè in cancalionu, tali i petri piriculosi.
Voltu à ‘ss’epica di u 70’ – 90’, ghjunghji una cosa bedda, pusitiva, ‘ssa fiurita nuvedda ch’ùn si pò nigà. Fù è ghjè sempri una maravidda.
U cantu tradiziunali era, com’è avali (è a lingua latina) guasgi spintu à parti in i fieri, ma in li spittaculi…
Pà u musicanti ch’e sò, aghju sempri accirtatu chì a più bedda manera di mantena a tradizioni era a criazioni.
L’artisti corsi ch’ani influinzatu a musica sò i me amichi di cori, I Fratedda Vincenti, à tuttu o guasgi tutti i nivedda parchì eramu in u stessu filu, incù i so puisii, i so musichi. ‘ssi dui fratedda aviani tanta emuzioni è umilità, franchi, sò una ricchezza indicibuli par mè è d’altri !
Ciosi ch’aghju accumpagnatu l’annati pà a so voci d’artistu ma incù l’umanità.
Carlu Rocchi è Tony Toga, un beddu scontru musicali è umanu, a musica di u tarrenu hà monda presu parti in la me zitiddina.
Ci voli di spirà, è fà chì ‘ssi capi d’opara ghjuvarani à l’umani. Ma quì ùn possu chè pocu fà, à parti falli senta à i ghjenti innamurati di vita musicali ! Pensu chì a vita hè musica, più chè l’inversu. Ciò chì risorti in a musica, ch’e provu di trasmetta.
Mi veni da l’epica di l’anni cinquanta è sissanta ; Elvis, Otis Redding, Bob Dylan, The Beatles etc… hè statu ancu di sicura, par u ghitaristu una scuparta d’una biddezza rara. A melodia ; ghjè l’escenziali ‘llu cantu o ‘lla canzoni, ghjè a vera ricchezza, ùn si pò calculà, dopu u vistitu urchestrali. Si pò fà dinò una miludia incù l’armunia, tuttu dipendi di a cunniscenza è di a sinsibilità di l’accunciatori.