U Black Friday, chì, ogni annu, si svolge l’ultimu ghjovi di Nuvembre, hè un ghjornu cruciale pè u cummerciu. Ma cù i so attichji cummerciali, stu ghjornu hà cunsequenze importante pè d’altri dumìnii, par un dettu l’ambiente.
A serata di ghjovi hè finita. Avete dettu “avvedeci” a u vostru cucinu Mike è à a so moglia Betty, ringraziendula di avè purtatu issa bunissima torta à a zucchaghja, bramendu a vittoria di i Lakers pè a prossima stagione. U ripastu di Thanksgiving si n’hè andatu, tantu bè, chì avete alemnu una settimana pè compie u cibu preparatu pè a famiglia.
U , hè Black Friday, vi n’anderete à u “Wallmart” vicinu, pè cumpravvi issu postu di TV vistu nantu à “Fox News”, ricummandatu da Clint Eastwood himself. Cumprarete ancu una nova Xbox pè u ciucciu pè Natale, cù l’ultimu Red Dead Redemption (cowboys, banditi è cavalli, chì dumanda di più a giuventù ?)
Svegliatevi, chì sugnate! Ùn avete micca un cucinu Mike cù a moglia Betty, ùn avete micca da pretende di amà à so torta secca è inzuccarrata di troppu, è ùn site micca in u magazenu per cumprà una nova TV pè e salde di u Black Friday.
Ié, l’aghju vistu. Avete avutu un muvimentu di dubbiu cù a fine di a frasa. Forse, u scenario di prima ùn hè micca cumunu pè voi, ma cumprà pè u Black Friday hè un attu di più in più sviluppatu in Europa.
In i Stati Uniti, u Black Friday si svòglie u vennari dopu a festa di Thanksgiving, l’ultimu ghjovi di Nuvembre (quest’annu quantunque hè un’ eccezzione, si svòglie u terzu ghjovi di u mese).
Stu ghjornu lancia a corsa pè cumprà i rigali di Natale. Quantunque, i cummercianti anu pigliatu l’iniziativa di fà di stu ghjornu u principale ghjornu di salde.
E parolle “Black Friday” anu a so surghjente ind’è a pressa americana di l’annate cinquanta : pè u vennari dopu u Thanksgiving, l’ uperatori pigliavanu un ghjornu di riposu. Stu ghjornu era dunque u ghjornu induve l’ uparaghji cumpravanu i regali di Natale perchè avianu u tempu stu ghjornu solu. I cummercenti, sin’à u vennari dopu Thanksgiving, eranu deficitarii in i so conti. I conti deficitarii eranu scritti à l’inchjostru rossu. Dopu stu ghjornu di massivu compiu, i cummercianti eranu di novu in benefiziu, è questi conti eranu scritti cù un inchjostru neru.
Oghje, u sensu di u Black Friday ùn hè tantu cambiatu, cum’è prima, hè u ghjornu induve i cummercianti ponu fà un sciffru d’affari assai importante. Sta tradizione cummerciale di u Black Friday hè, oghje un fenomenu internaziunale.
U Black Friday in numari
In u 2017, l’Americani anu cumpratu pè 56 milliardi di dollari di bè solu pè stu ghjornu. Stu numaru hè uguale à u pruduttu internu bruttu di un paese cum’è a Costa Rica, è hè più altu di u PIB di a Croazia.
In Francia, u Black Friday si face sopratuttu nant’à internet. I primi cummercianti chì anu lanciatu u Black Friday à l’usu americanu l’anu fattu in u 2014.
In lu mondu, u Black Friday hè un ghjornu di cunsumu massivu pè categorie speciale d’articuli : in lu primu frontu, i vestiti. Secondu à u media Brut, u compru di vestiti in questu periudu di l’annata hè di 60% più importante di u compru à u principiu di l’anni 2000.
Un ghjornu di cunsumu massivu è rapidu : i prublemi daretu à u Black Friday.
Sè stu ghjornu puderia esse un’ apertura pè permette à e famiglie e più povare d’ avè accessu à bè di cunsumazione innaccessibili altri ghjorni di l’annu, sfurtunamente, i risultati, specificamente eculugichi sò catastrofichi.
I dui tipi d’articuli ch’omu compra u più sò i vestiti è u materiale elettronicu.
Pè i vestiti, l’industria di i vestiti hè a seconda più importante in termine di polluzione, seconda par via di a polluzione di i trasporti. Dapoi l’anni di u 2000, i vestiti sò cumprati 60% di più, è sò usati 2 volte più rapidemente.
Pè u materiale elettronicu, è prublematicu sò parechje : prima, a polluzione generata da a fabricazione di e materie pè i cumposanti elettroniche ùn hè micca u solu prublemu impurtante, ma u riciclu di questi prudutti hè bassu. Solu u 20% di i prudutti elettronichi in lu mondu so riciclati, lasciendu u restu senza trattamentu.
Di più, u Black Friday hè un ghjornu chì significa un tassu massimu di i compri in linea. A polluzione generata da i trasporti pè i prudutti cumprati.
Un altru prublema hè u trattamentu di l’empiegati di e firme maiò cum’è “Amazon” : per un periudu cum’è quellu di u Black Friday, u tassu di travagliu hè di più superiore a u restu di l’annu.
L’ultimu prublemu di u Black Friday hè u guastu assai importante causatu da e salde importante di stu ghjornu. Una parte importante di l’articuli cumprati, sin’à u 30% pè un situ cum’è “Amazon”, sò rinviati à u vinditore. Ma, sfortunamente, sti prudutti sò distrutti, pè una ragione simplice : costanu di più da esse recondiziunati cà da esse distrutti.
Oghje, cù e questione di a prutezzione di l’ambiente, e prublematiche di povertà è di frazu in tutti i duminii, u Black Friday stà un ghjornu neru per l’avvene.