Keep calm & go to London!

Ancu à Pasquale Paoli li piacia a cità di Londra. Una lea trà Corsica è Ingliterra sempri viva. Paoli si n’hè mortu in a cità inglesa u 5 di farraghju di u 1807 à l’età 82 anni. Paoli, ginirali, omu di statu è babbu di a patria corsa. A so statula hà pigliatu piazza in a famosa abbazia di Westminster.

In Londra si pò scambià d’embiu scambiendu di carrughju.. chì piacè! Da i casi culuriti di Notting Hill, passendu pà l’uriginalità di Camden Town, à l’urnamenti di u carrughju imperiali, Londra ci rigali a sò diversità. À qualchì ora di a nostra isula, ci sò ancu diretti da u mesi d’aprili à u mesi d’uttobri, si pò spassighjà aspittendu u “Tea Time” 😉

Londra..i so palazzi, i so casucci, i so butteghi, i so parchi, boschi è giardini, i so musei, a so ghjenti, a so lingua, i so lumi è .. u vostru porta munetta! Ma si dici chì quandu si ama ùn si conta! Allora… 😉

U tempu hè cunnisciutu, u soli ùn hè micca l’attori principali di u filmu oghjincu d’issa cità ma si stà bè quantunqua..in Londra 🙂

Aghju dumandatu à dui corsi chì stani in Londra quali sò i lochi ch’eddu ùn ci voli à sminticà.

Jean-Toussaint Torre, cutulesu stalatu in Londra dapò anni risponda « bona quistioni! » ahahah! « i toii quali sò? » allora aghju pigliatu u tempu. Socu partita 3 volti è di sicuru aghju un amori pà Hyde Park pà a so natura è i so scurrichjoli chì mi piacenu tantu! Camden pà l’embiu, u so marcatu è a so ghjenti, incù u Blues Kitchen induva si pò magnà davanti à un cuncertu o simpliciamenti biia un colpu prima d’andà à u Koko London pà baddà! Notting Hill pà i sò culori è Porto Bello pà u marcatu è i so butteghi pieni di maravigli..è a catedrali St Paul. Pà i musei mi piaci à spassighjà in u museu di storia naturali induva u filmu « La nuit au musée » hè statu arrigistratu. Jean-Toussaint cumpleta incù i spittaculi musicali in u quartieru di u West End. Ci spiega chì u so ponti prifiritu ghjè u Waterloo Bridge a notti parchì si veda a city da un cantu è Westminster da l’altru, incù u teatru « National theatre » illuminatu in punta à u ponti. Locu famosu « Tower Bridge » hè magnificu ancu di notti. Piccadilly Circus è i so screni a notti chì ci pari un picculu Time Square. Pà eddu ci voli à andà à veda Harrods, magazenu miticu di lussu criatu in lu 1856 chì hè straurdinariu cum’è Selfridges nant’à Oxford Street, prima buttega à venda un pocu di tuttu. Oxford Street! di sicuru. Pà un pocu di storia d’apressu à eddu ùn ci voli à sminticà a « Tower of London » torra prisenta in una citadedda, primu paesi di Londra. Pà i passiunati di a saga, pudeti andà da u cantu di Poudlard 😉 incù un pocu di furtuna vidareti Harry Potter, i so amichi è Hagrid! Parechji treni partenu ogni ghjornu pà visità i studio Warner Bros in Leavesden, vicinu à Londra. In giru aveti ancu u parcu Richmond, unu di l’8 parchi di u regnu, u più maiò di Londra, induva si pò uservà più di 650 cervi è Hampstead Heath, parcu di 320 ettari.

Olivier Colonna hè uriginariu di Carghjese è campa dapò 4 anni in a cità riali. Risponda vulinteri à a me richiesta è mi faci una lista di lochi induva ci voli à andà ch’eddu sia risturanti, pub o cum’eddu dici “very cool places” 😉

Eccu a “quick list” di Monsieur Colonna pà i risturanti:    Goodman (risturanti di carni), Wright Brothers (pesci-frutti di mari), Borough Market (marcatu+street food), Pop Brixton (street food), Kimchi (roba chureana), Bananatree (roba indochinesa), Pizzametro (pizza), Made in italy (pizza + roba taliana), Bala baya (roba israeliana)! Aveti quì una bedda lista piena di varietà, incù roba di u mondu!

M’hà dettu ch’eddu ci voli à fà un girettu à u Baranis chì ghjè un pub induva si pò fà una bucciata drentu!
Pà i “very cool places” o ancu “Very very cool places” 😉 Olivier ci sparta i so lochi: Bounce (ping pong bar), Junkyard Golf Club (mini golf sottu tarra..amazing! circati a parodda 😉 ),  Old Spitalfields Market (u migliori marcatu d’apressu à eddu!) Granary Square (vicinu à king cross, è di u canali) Angel station pà i so pub è risturanti! è pà compia u Battersea Power Station.
Ci fermani i parchi, numarosi in issa cità! Pudeti fà u giru in green park, Victoria park, Clapham Common Park è u famosu cum’è si dicia sopra Hyde Park!

Dopu à issu riassuntu Olivier si ramenta ch’eddu hè difficiuli di sceglia cusì pochi lochi pà Londra è mi dici chi più pensa è rifletta è più ci sò lochi chì li venani.. a storia pò durà ori è ori! Capiscu bè.. hè verità! Londra hè magnifica, pinseti à fà un “brunch” è un “tea time”, truvareti parechji lochi incù una tematica (Alice in paesi di i maravigli, Charly è a cicculataria, Sherlock Holmes, ect…). Pà contu meu, vi scrivaraghju anch’eiu da quì à pocu da issa cità maravigliosa! qualchì mesi pà campà à l’usu inglesu è tandu avaraghju pensu cari lettori tanti cosi da cuntà!

Prima di parta (iè vi vecu dighjà guasgi à l’aviò!) pinseti à fà a vostra carta d’identità (basta pà u mumentu chì u Brexit ùn hè effettivu), cambieti i vostri soldi (iè in Ingliterra sò i Pounds o Livres Sterling £££!), è piglieti i vostri ochji 😉 ci sò tanti cosi da fighjulà!

Ah è psssst andeti à veda à a buttega di ghjochi Hamleys..  ùn ci hè bisognu d’essa un ziteddu!

 

Aè bon’viaghju!

 

 

Lasciate un cummentu ?

This site uses Akismet to reduce spam. Learn how your comment data is processed.