A Sant’Andria

Aprite Aprite
À Sant’Andria
Chì vene da longa via
Hà i pedi cunghjilati
È hà bisognu di riscaldassi
D’un bon’vichjeru di vinu

Chì ghjè a Sant’Andria ?

U 30 di nuvembre in Corsica si festighjeghja à a Sant’Andria, si pichja à e porte di u paese per dumandà robba à a ghjente, ch’ella sia da manghjà o da beie, cuntendu una pricantula d’una voce nasitoghja da ùn esse ricunnisciutu. Sè a parsona dà qualcosa hè ringraziata, ma attenti s’ùn date nunda sarete ghjastimati. Dopu à avè fattu u giru di u paese, a ghjente s’addunisce per fassi un bellu ripastu. Sta festa hè arradicata à a nostra cultura, hè u ghjornu chì annunzia a fine di l’auturnu, è di e racolte. Hè l’occasione di sparte, d’aiutassi è dà à i poveri a pussibilità di fà a limosina senza esse vargugnati. A Sant’Andria riprisenta assai bè e valore di a sucetà corsa antica : l’aiutu è a spartera.

Oghje a sucetà corsa hè cambiata, avemu ricalcatu u mudellu americanu è emu persu a lotta contr’à u cunsumerisimu. Sarà per via di stu cambiamente d’usi chì a Sant’Andria hè festighjata di menu in menu in Corsica. Ci sò qualchì paese chì resistenu ma ùn sò tanti numarosi, a maiò parte di quelli chì facenu sempre sta festa tenenu solu l’aspettu festivu.

Sant’Andria era l’apostulu chì dumandò à Ghjesù di dà à manghjà à i famiti è tandu Cristu multiplicò tanti pani è pesci. Andria fù u primu di i dodeci apostuli à avè raghjuntu Ghjesù è fù Crucificatu da i Romani u 30 di nuvembre di u 60. A fine di nuvembre currisponde dinù à a quaresima nanzu à Natale in a riligione catolica.

Halloween o Sant’Andria ?

Ghjè un dibattitu chì rivene ogni annata, festighjà Halloween o a Sant’Andria ?

‘Sse feste s’assumiglianu ùn la si pò nigà, ma venenu da culture sfarente. Halloween hè una festa pagana chì vene di u fulcloru celticu dopu spurtata in America. A sapete forse ma a ghjente si vestenu cun panni da fà fughje i fantasimi. L’aspettu festivu hè u listessu cà per noi ma micca u fondu. Sta festa hè celebrata nanzu i Santi, u 31 d’uttobre, sia un mese nanzu à a Sant’Andria. A parolla Halloween vene di u dettu “All Hallows Eve“ chì pudemu traduce per “A sera di tutti i santi“ dunque currisponde à a veghja di i Santi.

Di sicura ci vole à sceglie trà e duie feste, ma sè guardemu bè per Halloween si veste, si manghja, si pichja à e porte per dumandà robba à a ghjente, cumu per a Sant’Andria. Ùn si facenu nè u listessu ghjornu nè pè e listesse ragione. Dunque perch’è micca aspittà torna un pocu per festighjà a festa chì ghjè nostra, piuttostu chì di fà una festa chì ùn hà nunda à vede incù a Corsica è ch’indè noi ùn hà altri aspetti chè quellu cummerciale.

Sè no fighjemu bè hè guasi solu una quistione d’identità è di cultura, rivene aspessu ‘ssa tematica. In a sucetà ughjinca, pruvemu à tene u più aspetti pussibule di e nostre tradizione mantenendu iss’identità corsa chì conta tantu per noi, allora perchè quandu si pò sceglie ùn pigliemu robba nustrale. A tradizione hè qualcosa chì si sparghje, hè una fiamma chì ci vole à nutrì per tenella accesa, micca guardalla spenghjesi senza fà nunda. Halloween hè una di e cunsequenze di u sbarcu di a mundialisazione in Corsica, prova à caccià l’identità di i populi per avè un mondu unifurmatu è cuntribuisce à a nostra scumparsa.

In fine di contu festighjà Halloween vene à dì chì site d’una manera pè ‘ssa standardisazione. Preferite festighjà una festa pagana à una cristiana, hè una scelta chì v’appartene, ma sè vulete fà avanzà l’affare muvitevi un pocu. A Sant’Andria hè dinù l’occasione di parlà un pocu u corsu cù a ghjente. Ci tocca à prufittane, chì e stonde di spartera mancanu.

Lasciate un cummentu ?

This site uses Akismet to reduce spam. Learn how your comment data is processed.