Mulizzi : u SYVADEC dumanda a presa in carica di u sopra costu liatu à u trasportu maritimu

U pianu d’azzioni di i mulizzi sarà dibatuttu à l’Assemblea di Corsica oghji è dumani in Aiacciu. Un dibattu chì sarà carcu di sensu è à u quali u SYVADEC voli purtà a so cuntribuzioni. In un cummunicatu, saluteghja l’ivoluzioni ch’eddu ghjudicheghja, à tempu, pusitivi, ma micca cumpiita. Prupona d’attà a criazioni di dui centri da tena i mulizzi è u sportu parizali di i mulizzi, mettendu, in u Pianu, a pidda in carica di i costi in più di i trasporti.

Eccu tandu u cummunicatu di u SYVADEC à prupositu di stu Pianu da vena :

« Cuntribuzioni di u SYVADEC à u prughjettu di diclinazioni di u Pianu d’azzioni di i mulizzi di a Culletività di Corsica :

L’offiziu di u SYVADEC hà presu cunniscenza di u prughjettu di « diclinazioni di u Pianu d’azzioni di i mulizzi 2018-2021 scrittu à a sessioni di l’Assemblea di Corsica. Saluteghja l’ivuluzioni pusitivi di u novu pianu è sopra tuttu di i misuri d’accumpagnamentu di l’inter-communalità à u sviluppu di a trascelta seletiva, u sustegnu à a custruzzioni d’unità perenne di nanzu-trattamentu incù a riintroduzioni di u trasportu par via di i camini di farru, è l’ughjettivu d’un’ammaistrera publica di l’attrazzi principali. Saluteghja dinù l’uzzioni di u trattamentu transitoriu fora di a Corsica d’una parti di i mulizzi reisduali.

Pà u tempu strà impurtanti di u 2019-2021, sia u comportu necessariu à a messa inbaddu uperaziunali di u Pianu, a dinamica di sviluppu di a trascelta duvaria parmetta di cuntena a pruduzzioni di i mulizzi risiduali trà 165 000 tonni è 175 000 tonni, malgratu una crescita di a pruduttività liati à a crescita dinù di a pupulazioni è di l’attività turistica. Una calata più sinificativa à 105 000 tonni di mulizzi residuali hè aspitatta pà u 2022 à a messa in serviziu di l’unità di nanzu-trattamentu. A calata di mità di l’intarru di i mulizzi, à menu di 90 000 tonni, ùn hè pussibili chè incù a cundizioni di ghjuvà si d’una valurisazioni energetica cumplimintaria. Ancu s’edda hè pusitiva, st’ivoluzioni ùn hè abbastanza impurtanti di pettu à i capacità di trattamenti di a Corsica oghji.

Da securizà u trattamentu di i mulizzi residuali, l’offiziu di u SYVADEC prupona :

-Di scriva à u Pianu a necessità di realizà « o mancu dui centri da metta i mulizzi », cum’è parmissu da u PPGNG da securizà di manera durevuli u trattamentu di i mulizzi in Corsica.

-D’attivà u trattamentu fora di Corsica d’una parti di i mulizzi à titulu transitoriu à parta si di u 2019, pà 70 000 tonni, da scansà a chjusura di u situ di Viggianeddu è a rotta tutala di u serviziu publicu d’eliminazioni di i mulizzi nanzu à l’istati 2020.

In sta perspettiva quì, l’offiziu di u SYVADEC dumanda à l’Assemblea di Corsica d’integrà à u Pianu d’Azzioni a presa in carica di u sopra costi cunsiderevuli chì u cundiziunamenti è u trasportu maritimu di i mulizzi caughjeghjani. Tuttu què da scansà una crescita di u costu di u serviziu di i mulizzi, prizziatu à 35% à pocu pressu, pà chì ùn paralizessi micca l’azzioni di l’inter-communalità è ùn penalizeghja micca i nosci amministrati.

L’offiziu di u SYVADEC cunsidereghja chì u pianu d’azzioni cusì arrichitu saria di natura à parmetta a mubilisazioni di tutti l’attori pà a riescita di sta sfida chì hè a gestioni durevuli di i nosci mulizzi. »

U casu di i mulizzi in Corsica hè assai impurtanti è meriteghja d’essa assai pinsatu è priparatu. Oghji, abbastanza parsonni pensani chì l’intarru di i mulizzi hè l’unica soluzioni pà sta crisa di i mulizzi, ma a vera soluzioni hè, è ùn a diciaremu mai abbastanza : a trascelta di i mulizzi. Parechji studii fatti in America di u Nordu sò vinuti à a cunclusioni chì l’intarru di i mulizzi è quantu nocivu pà l’omu chì l’incineratorii, è anu trovu chì 14 cancri erani direttamenti caughjunati da l’effluvii è da a polluzioni di l’intarru di i mulizzi. Oghji, in Corsica, tocca à noi, Corsi, di piddà cuscenza di a primura maiò d’accupà si di a trascelta di i mulizzi da salvà a noscia tarra è dinù tuttu a noscia saluta !!

 

Da seguità….

 

Lasciate un cummentu ?

This site uses Akismet to reduce spam. Learn how your comment data is processed.