A sparizione di l’insularità corsa ?

Vous vivez dans une île très belle que j’ai quelque raison de chérir […] cette terre séparée, qui se défend encore un peu de ressembler à toutes les autres.” Paul Valery.

U 18 d’aprile scorsu, u quotidianu chebecchesu Le Devoir hà publicatu trè riporti nantu à l’isula, firmati da u ghjurnalistu Christian Roux. E trè tematiche sò quelle chì seguenu : u periculu pè a lingua corsa, u rinascimentu di u naziunalismu corsu dopu u periudu di l’anni uttanta, è l’ultima tematica : a sparizione di l’insularità corsa.

Ma chì sarà sta storia ? A Corsica puderebbe perde u so statutu d’isula? Postu ch’ellu ci hè u riscaldamentu climaticu, u nostru mare Mediterraniu si n’anderebbe?

Hè capita, u ghjurnalistu ùn parla micca di un aspettu geograficu in periculu. L’insularità hè presa da u ghjurnalistu in termine di ciò chì tocca à u più prufondu l’identità corsa.

L’ambiente geograficu di a Corsica hè statu a chjava di u sgutuppu di a storia corsa. Da u sviluppu di e pupulazione specifiche à l’isula per u periudu preistoricu, à a Siconda Guerra Mondiale, l’insularità corsa hà custruitu l’identità è a cultura di u populu corsu.

In tempi di guerra, un’isula binifizieghja di a prutezione naturale di e so coste pè difende si.
A noscia epica cuntempuranea hà vistu e nuvelle forme di guerre senza cunfini : a guerra di u cunsumu, a guerra di a speculazione.

A Corsica perde a guerra contru à u cunsumu

A Corsica ùn hà micca McDonalds : ghjè a prima nutizia di Christian Roux. Ghjè vera : ùn avemu ne Macdonalds, ne Starbucks, è qualchi annu fà, i H&M è i Burger King eranu accessibili solu per nave o aviò. Ma stu paisagiu senza multinaziunale tende à sparisce, pè esse rimpiazzatu da un universu d’”inglicismi”, fattu di culori spirdati, di vestiti incù stessi culori, di cibbu pinghinosu: e vie di l’universu di cunsumu.

Ma cumu si spiega stu ventu subitu di glubalisazione ? Secondu à Christian Roux, a spiegazione si trova cù i flussi migratori di l’isula.

U turisimu in Corsica hè cunnisciutu pè u so pesu importante : ogni estate, a pupulazione di Corsica hè duppiata. Cù e cunsequenze pè l’isula chì cunniscimu oghje : un turisimu massivu è i paisagi sfigurati  di l’isula pè traie i viaghjadori. Sfurtunatamente, i paisagi corsi ùn bastanu micca, e u turisimu massivu fà a furtuna di l’alfiere multinaziunale maiò. L’installazione di l’alfiere maiò cum’è H&M o Burger King prufittanu di u turisimu massivu.

Ma attenti à e trappule : i Corsi ùn compranu micca solu prudutti lucali, ne testimonia l’apertura di u centru cummerciale di l’Atrium in Aiacciu è l’affluenza di l’abitanti di a regione u ghjornu di l’apertura.

A migrazione, un puntu impurtante pè capì a Corsica d’oghje

I flussi migratori anu ancu un’ influenza impurtantissima nant’à a situazione immubiliare di a Corsica. U ghjurnalistu Christian Roux face u paragone cù è residenze secundarie è ramenta e parolle di u scrittore è omu politicu Petru Poggioli :

 Quì, u 30% di e residenze sò viote a maiò parte di l’annu. Duvintemu un spiazzanile pè l’Europei di u Nordu chì venenu à cumprassi u sole.

Stessa storia chi sopra : i flussi migratori anu cunsequenze impurtante nant’à i  paisagi di l’isula. A Corsica è e coste di lu Mediterraniu di modu generale vedenu a crescita di residenze secundarie, certe  sò custruite di modu illegale, ind’i lochi prutetti.

Cum’è pè i magazeni, stu fenumenu ùn hè micca solu u fattu di e persone straniere à a Corsica : tanti Corsi di a diaspora, partiti in cuntinente per truvassi un travagliu, fà i studii, ùn anu micca l’uccasione di vultà in Corsica pè campà. A soluzione : cumprassi una casa, o piglià a casa di a famiglia pè l’estate solu. Isse case sò per certi Corsi u solu mezu pè salvà una lea cù l’isula, ma anu lu stessu effettu cà una casa cumprata da una famigla di Vendée : una casa induv’omu campa solu 2 mesi à l’annu.

Sviluppu demograficu è integrazione

Christian Roux mette in luce micca solu a quistione di u prublemu di a “turisticazione” di l’isula, ma ancu u prublemu di l’imigrazione senza controllu. In prupurzione, l’isula hè a regione di France induve l’imigrazione hè a più impurtante, vale à d: u 5,2%. A quistione di a “ghettoisazione” di Corsica hè una di e più impurtante. L’integrazione in Corsica di e pupulazione migrante, è di modu più specificu di e pupulazione di u Maghreb, hè una quistione di primu pianu pè u sviluppu di l’isula.

Christian Roux, pè svultà stu puntu di vista, vole mintuvà à Jean Guy Talamoni nantu à issa quistione.

Storicamente, dice, i Corsi anu integrati i stranieri venuti dapertuttu. Ind’ e grande famiglie di l’isula, pudemu cuntà i Stuart venuti di Scozzia è installate da u XVIIIesimu seculu.

Ma l’integrazione era più facile à l’epica induve a pupulazione sana parlava u corsu. Oghje, a situazione s’hè imbrugliata. In e scole bislingue, truvemu soli Corsi di radiche. Pare qualchi volta à una forma di ghetto, dice in fine Jean-Guy Talamoni.

U puntu analiticu u più importante di Christian Roux hè dunque a pulitica migratoria di l’isula. Issa pulitica migratoria hè u puntu centrale di i cambiamenti culturale e immubiliare di l’isula, mà a pulitica di regulazione ùn hè micca pronta per risponde à st’ imperativi. Sarà u mancu d’autonomisazione di i puteri pulitichi in Corsica a ragione di tuttu què? Pò esse un elementu di riposta, a dice cusì  Gilles Simeoni :

L’isula hà u tassu migratoriu u più impurtante di Francia. Avemu una visione aperta di l’integrazione , mà avemu bisognu di l’arnesi pè cuntrollà issu flussu.

Diversi punti di riflessione purtati da u Chebeccu è da Christian Roux.

Lasciate un cummentu ?

This site uses Akismet to reduce spam. Learn how your comment data is processed.