U 27 di Sittembri, u ghjurnalu Corse Matin avia publicatu un studiu rializatu in Corsica à prupositu di u cunsumu di tabaccu, d’alcolu è di droga ind’è i ghjovanni. U titulu dici ch’iddi fumani è biani più chì l’altri ; issi pratichi, largu à essa senza periculi pà a saluta poni spiegassi da fattori culturali, suciali è ecunomichi sfarenti di u cuntinenti. Par altrò, hè stata assai scettica è dubbitosa a maiora parti di i lettori cuncernendu i risultati chì purtaiani nant’à i stupefecenti illeciti.
L’upinioni publica hà sprimatu u sintimu duminantu chì sti sciffrati ùn erani micca a rialità campata da tutti.
I prublemi maiò d’una apprizzazioni sana
L’articulu principeghja da stu risultati di l’Uffiziu Francesi di i Droghi è di a Toxicomania « Sicondu OFDT, i ghjovanni di 17 anni ùn sò micca tuccati da u cunsumu di cannabis è altri droghi illeciti ».
In primu locu, pudemu purtà una critica nant’à un puntu di stu studiu : parla sulamenti di l’adopru di prudutti ind’è i ghjovanni asgiati di 17 anni. Mà allora, comu cunsiderà ch’iddi raprisentani una parti emblematica di a ghjuventù quandu oghji issu tempu di a vita principia incù l’adulescenza è si ferma à 25 anni osinnò più ? Cuì si pò veda un prublemu di « panel » raprisentativu pà a ghjuventù corsa, è chì altera a rialità.
Sicondu l’altri risultati, i ghjovanni di 17 anni sò quiddi chì fumani u menu di Cannabis in u tarritoriu naziunali, 3% contra 7,8% nant’à u cuntinenti. Mà in un antru articulu publicatu da France 3 Corse Via stella, u 4 d’Aprili 2018, si trova chì 6% di i menu di 17 anni ricunnoscini avè un adopru regulari di u Cannabis (OFDT, luddu 2015).
L’evaluazioni di u cunsumu di droghi in Corsica hè un prublemu maiò, a prima spiecazioni pò essa a vargogna suciali è u tabù lampatu nant’à i prudutti illeciti, chì uccultani a parola.
Par altrò, videmu da poi qualchì anni una crescita di i cunsumatori, certi dicini chì s’agisci d’una libarazioni di a parola, mà ùn pudemu micca cuntestà amplificazioni di a dumanda caratterizata da a multiplicazioni di l’acchjappati ghjudiziali.
Ci voli dunqui à cunsiderà ch’esista in Corsica un prublemu d’evaluazioni da i puteri publichi pà u cunsumu di i droghi. Mancuna inchiesta tarritoriali ampia hè stata rializata, di più, nant’à un situ com’è l’uffiziu naziunali OFDT ghjè impussibuli di truvà i studii fatti in Corsica nanzu à 2009-2010.
A u livellu di a populazioni sana, esista d’antri risultati più dramatichi.
L’annata scorsa, un articulu scrittu da Julian Mattei nant’à a cunsumazioni ginirali di droghi in Corsica era encu di più rialistu : « U numaru d’attoschi à a cucaina hè statu multiplicatu da 2 trà 2015 è 2016, issu risultatu ùn hà fattu chì cresci in 2017 ». U ghjurnalistu si n’hè andatu à ascultà dinò a parodda d’un parsunali uspidalieru in Castelluciu. « Certi volti, scuntremu i casi d’overdose ch’ùn aviemu mai scuntrati sin’à qualchì anni fà, pò essa ligatu à a cunsumazioni di prudutti più puri. »
Dopu a presa di cuscenza, ci voli à aghiscia subbitu pà d’altri.
Sicondu Jean-François Giffon, insignanti è membru di l’Assemblea di a ghjuventù corsa, u travaddu di previnimentu pà a lotta contra i stupefecenti ùn hè micca assicuratu da i puteri publichi in Corsica.
Duranti una sezzioni di l’Assemblea à u mesi di Luddu 2018, avia prupostu una muzioni chì purtaia nant’à un’azzioni generali di lotta è di previnimentu contra i stupefacenti.
A so pruposta era appughjata da parechji argumenti chì mustraiani bè a primura d’una azzioni da a Culletività di Corsica :
Quandu si studiani i sciffri videmu allora chì a Corsica si trova in testa di l’altri tarritori pà a crescitadi a cunsummazioni di droga.
Dopu, sicondu l’OCRTIS, trà 2009 è oghji a parti di l’arrestazioni pà l’adopru di i prudutti illeciti hà cresciutu di 7,8 pà 10 000 abitanti cuncernendu l’eruina, a cucaina è l’extasia, contru una media di 2 nant’à u restu di a Francia.
Di più, l’acchjappati ghjudicciari di Cannabis è d’eruina, trà 2010 è 2017 sò passati da 54.7 Kg à 112 Kg pà u Cannabis, è di 6.8Kg à 23.6 Kg pà l’eruina dopu à u serviziu di i dugani.
U so studiu si compia da ‘ssi paroddi : « Allora chì oghji, si veda l’aumentu di i pussessioni di stupefecenti, in u mondu rurali cum’è in cità, ùn pudemu più parlà d’una « eccezzioni corsa » s’agiscendu di i droghi. »
Pà Jean-François Giffon, ci voli a crià una missioni inter-regiunali incù 4 ughjettivi chjari : avisà, cummunicà, infurmà, luttà. Una presa di pusizioni ch’hà da essa affirmata da l’Assemblea di Corsica, incù un votu contru a depenalisazioni di i prudutti stupefecenti. Issa azzioni ùn pò essa cunduta senza un travaddu di cuncertu incù u statu francesi.
I suluzioni pruposti da sta muzioni portani nant’à i licei in particulari, incù a criazioni d’un postu di referenti addizioni in ogni accasamenti mà dinò a furmazioni d’un parsunali educativu in addictulugia.
Hè criticata dinò l’assenza di cummunicazioni trà l’uffizii d’accumpagnamenti, pà compia, ci voli à dumandà un diagnosticu in i mezi sculari fattu da l’OFDT è l’Ubservatoriu di a Saluta Corsica pà aduprà un pianu ginirali di lotta è di prevenzioni contra i stupefecenti.
In cunclusioni di st’articulu, pudemu purtà una riflessioni nant’à 40 anni di lotta contru à a droga ch’ùn ani mai presu a strada d’un travaddu instituziunali, è penali chì riposa nant’à à vulintà di l’attori publichi è di l’associi. Forsa chì si truvarà cuì i raghjoni d’una situazioni cuntrastata è affanenti pà l’avvena.
Surghjenti:
Articulu France 3 Corse Via Stella – https://www.google.fr/amp/s/france3-regions.francetvinfo.fr/corse/haute-corse/corse/dossier-importation-consommation-drogues-prennent-ampleur-corse-1452987.amp
Articulu Corse Matin – Studiu
Articulu Corse Matin – da Julian Mattei
cari amichi e cara Lisa, certu, c’è a quistioni “quali so? ” e a quistioni “quantu so?” .ma subratuttu, à a fini, a quistioni maio è:”parchi?” Piddemu l’esempiu di u cannabis.Chi robba è u cannabis? E un inhibitori di i funzioni cugnitivi di u ciarbeddu.Par di lla in altri termini:è a sustanza di u “un voddu micca capi.” o, “un pruvemu micca di capi.” Chi è a cosa ch'”un vulemu micca pruvà di capI?” ma…l’idiulughjia, naturalmenti…vali a di:a discrizioni cuntempurania di l’individuu, di a sucità, di u mondu, e di l’Al Dilà.
Par ogni sustanza, c’è sempri una raghjoni d’aduprà lla, e cusi, usservà u statu di l’addizzioni in una sucità à un certu mumentu di a Storia, è usservà u rapportu trà l’individuu e l’idiulughjia.
E, ancu, finalmenti, usservà l’idiulughjia stessa.
Altrimenti, un c’è, ne spiranza, ne prucessu di liberazioni.
Ghjuvanni di a Torri.