Più chè dui anni nanzu di ghjunghja à « una minaccia asistinziali » : a chjama catastrufata di l’ONU pà u clima è … pà l’umani

U mondu ùn hà più chè dui anni pà agiscia contru à u scambiamentu climaticu, senza què si ritruvarà di pettu à « cunsiquenzi spaventosi », hà dichjaratu l’ONU, chjamendu a sucità civila à dumandà « conti » à i sfarenti capimachja di a Pianeta.

U ruloghju sona pà a noscia cara Tarra : luni, u capu di l’ONU, Antonio Guterres, hà prunuciatu un discorsu veramenti affannanti, in giru à a quistioni di u scaldamentu climaticu. « Ci truvemu di pettu à una minaccia asistinziali diretta. U scambiamenti climaticu hè un sughjettu ditirminenti di a noscia epica – è semu à un puntu dicisivu. U scambiamenti climaticu ingrandisci di più à la lestra chè noi è a so rapidità hà caugiunatu un tarramotu in u mondu sanu : a ghjenti s’inchieta. ».

Pà eddu, tuttu hè chjaru : « Sì no ùn cambiemu micca di manera di campà da quì à u 2020, ci mittimu in periculu di scaddà u mumentu quandu pudaremu scansà un scambiamentu climaticu senza cuntrolu, incù cunsiquenzi dramatichi pà u sistema naturali di a pianeta ma sopratuttu pà l’omi ! ».

U sicritariu ginirali di l’ONU ci faci un bilanciu affannanti di u statu di a pianeta : « Cunniscimu timpiraturi senza pari in u mondu sanu. Sicondu à l’Urganisazioni meteurologica mundiali, duranti i dui ultimi decennii, 18 di l’annati i più caldi dapoi 1850 sò stati arrigistrati è 2019 s’annnuncia a quartesima più calda di tutti. Sti mumenti di caldana estrema, i fochi, i timpesti è l’inundazioni lacani una stampa di morti è di divastazioni… ». Basta à veda a caldana chì no t’avemu in fini di sittembri pà capiscia chì u riscaldamentu climaticu hè un prublema seriu è chì ci voli à accupaneci u più subbitu !

Antonio Guterres cuntinueghja à dì chì « semu stati privinuti. I scientifichi a ci diciani dapoi decennii », ma chì ci hè troppu dirighjenti chì ruccusani d’ascultà è di veda u prublema cum’eddu hè : riali, è imminenti. Sicondu à Antonio Guterres, certi risultati sò dighjà quì è, in certi situazioni, s’assumiddani à i pechji scenarii pussibili…

U capimachja di i Nazioni Uniti dici allora chì u bancu di ghjacciu di l’Antarticu spariscia dui volti di più à la lestra chì l’aviami pinsatu. Cust’annu, pà a prima volta, a sdrutta di i ghjacci, d’abitudina infitta è pirmanenti à u nordu di u Groenland anu principiatu à sciappà si ; un riscaldamentu climaticu maiò chì cambia ancu i cundizioni meteurulogichi di l’emisferu nordu ! Ma i fochi di furesta dinù sò tocchi : sò più longhi, più grandi è più difficiuli à spinghja colpa à a caldana !

Un altra cunsiquenza di ciò ch’Antonio Guterres discriva : « L’uceani diventani di più in più acidi, è sò una minaccia pà i fundamenti di i cateni alimentarii chì sò a stalca di a Vita. Annantu à a Tarra, u niveddu abbastanza altu di diossidu di carbonu (CO2) inde l’atmusfera renda i culturi di risu menu nutritivi, minacciendu u beni-stà è a sicurità alimintaria di milliardi di parsonni ».

Di pettu à stu scumpientu, Antonio Guterres stima ch’eddu hè sempri pussibili d’agiscia. Ancu se manca, sicondu à eddu, a vulintà di i pulitichi di u mondu sanu.. « Sapemu ciò chì ci ferma à fà. È sapemu ancu cumu fà lu. Avemu tutti i mezi da renda i nosci azzioni efficaci, ci manca ghjustu a vulintà di i dirighjenti pulitichi… »

L’accordu di Parighji, firmatu trè anni fà, chì t’hà pà scopu di cuntena da quì à 2100 u scaldamentu climaticu sottu à 2°C, era « u minimu u più bassu da scansà i peghji cunsiquenzi climatichi ». Ma st’ughjittivu ùn sarà tinutu. « Ciò chì ci manca dinù, ancu dopu à l’accordu di Parighji, ghjè un muvimenti di direzzioni è, sempri, a vulintà è l’ambizioni di fà ciò chì hè nicissariu ».

Antonio Guterres ni chjama à i dirighjanti, è chjama à ognunu à mubilizà si. « Ghjè un imperativu chì a sucietà civila – i ghjovani, i settori publichi, privati, i cummunità rilighjosi, scientifichi è muvimenti iculogichi di u mondu sanu – dumandessi conti à i dirighjenti », hà appughjatu u sicretariu ginirali di i Nazioni Uniti. Inde u so discorsu, parla di parechji pussibilità : « Ci voli à piantà a defurestazioni, à ristabiliscia i furesti ditiriurati, è cambià a noscia manera di cultivà a tarra ». Ci voli dinù à riveda « a manera di scaldà, di rinfriscà è d’inchjarì i nosci bastimenti da guastà menu energia ! ».

Lasciate un cummentu ?

This site uses Akismet to reduce spam. Learn how your comment data is processed.