Da induva veni l’acqua di a Tarra?

Da induva veni l’acqua di a Tarra ? Ghjuveddu di l’umanità, fiaccula di vita, l’acqua hè a risorza a più impurtanti chì no t’avemu. I scentifichi anu avutu duranti anni è anni una teuria chì l’acqua vinaria d’una splusioni di meteuriti è di cometi. Par eddi, ci saria statu una culizioni trà a prototarra è un’antra pianetta, maiò quant’à Marzu, à pocu pressu, 4,51 milliardi d’anni fà duranti a quali materia iniziali hè statu prughjittata. Hè riturnata à l’ità di polvara, di petri chjuchi chjuchi è di gasu. Ma i gasi sariani « partuti », privendu a Tarra è a Luna di i so elementi vulatili, frà i quali : i muleculi d’acqua.

Stu modu di pinsà s’accumpagnava d’un’antra teuria, quidda di u bumbardamentu dittu « tardivu » da i pianettologhi. Tardivu sicondu a guerra di i mondi chì hà avutu u so regnu duranti à a furmazioni di u sistema sulariu. Custituitu da meteuriti è di cometi, avaria purtatu à a Tarra i so elementi vulatili d’oghji, frà i quali l’acqua di tutti l’uceani è di i so rocchi. Fora di l’acqua, stu bumbardamentu avaria ancu purtatu una quantità maiò di muleculi urganichi (fatti di carbonu), chì avaria avutu un rolu impurtanti inde l’imergenza di a vita annantu à a nostra pianetta.

Ma stu scenariu di u « Gran’ Rimpiazzamenti » saria u bonu ? Sicondu certi scientifichi, a risposta hè : nò. Ùn negani micca l’asistenza di u bumbardamentu tardivu è di ciò ch’eddu hà purtatu, ma stimani ch’ùn hà sirvutu chè in una piccula parti à a furmazioni di l’acqua è di l’atmusferia tarrana. Cusì, u scentificu Bernard Marty hà publicatu un studiu utilizendu l’analisi di a sonda Rosetta, muscendu ch’una parti di u xénon di l’atmusferia tarrana vinaria da cometi ma… in minurità : appena 20%. Cuncirnendu l’acqua, ghjè dinò una minurità : « trà 5% è 30% di l’acqua sana di a pianetta », spiega Jean-Alix Barrat, unu di i rispunsevuli di stu studiu.

Sicondu st’omu, a quantificazioni di l’acqua purtata da u bumbardeaentu di meteoriti è di cumeti dittu tardivu, vali à dì accadutu dopu à a furmazioni di a Luna, 4,51 milliardi d’anni fà. Sta quantificazioni dà una furchetta trà 5% è 30% di a quantità tutali d’acqua di a Tarra (uceani + acqua di u manteddu di a Tarra chì ni cunteni trà 2 è 10 volti di più. Dunqua, l’acqua di a Tarra vinaria in maiò parti di a prototarra chì s’era furmata nanzu à st’arrunzata incù una pianetta battizata Théia. A Tarra è a Luna ani cumpusizioni isotopichi strà vicini, ma una piccula sfarenza diventa significativa s’edda hè misurata incù pricisioni. Soprattuttu, pudemu, paragunendu incù i meteuriti, cunducia un raghjunamentu è un calculu parmittendu d’avè a quantità sana di meteuriti è di cometi falati annantu à a Tarra duranti stu bumbardamenti tardivu. Cunniscendu a tenidori in acqua di i meteuriti, pudemu allora deducia ni a quantità sana d’acqua straterrestra ghjunta allora annatu à a Tarra. Di sicura i scientifichi si poni sbaglià, colpu à a maiurezza di a so furchetta, chì và da 5% à 30%. Ma sti risultati s’opponini di manera forti à l’ipotesa allora duminanti inde i laburatorii, chì credi chì st’urigina estraterrestra hè duminanti, è veda in edda a tutalità di l’acqua terrestra attuali.

U risultatu trovu hè un prublema pà i teuriziani. S’eddu ùn hè cuntistatu, ci vularia à cuncipiscia una teuria di st’impattu parmittendu a cunservazioni d’abbastanza d’acqua di a prototarra è di Théia da furmà acqua tarrastra ulteriora. Ghjè un sughjettu assai intarissanti parchì l’astrofisiziani anu dighjà trovu più di 2000 sistema estrasularii incù pianeti induva a prisenza d’acqua saria intarpritata cum’è segnu favurevuli à a Vita !

Lasciate un cummentu ?

This site uses Akismet to reduce spam. Learn how your comment data is processed.