I Scontri di l’Uspidali – Ricordi di a Prima Guerra mundiali

L’istati, mumentu di u ritornu è di i vacanzi pà certi diventa da poi
qualchì annu in paesu com’è in cità, un tempu prupiziu pà i manifestazioni culturali. Videmu chì cresciani l’evenimenti è  oghji ci n’hè mancu un paesu induva si pò passà l’istati senza participà à un festivali o un scontru. Eccu a prova chì a moda di u turisimu dittu
« acculturali » cambia ingrandendusi l’offerta d’antri attività pà scopra l’isula di manera sfarenti.

1918 – 2018

Pà i cent’anni di u cunflittu, l’associu U Pinu Tortu di l’Uspidali si ramenta di a Prima Guerra mundiali à traversu
manifestazioni, cunfarenzi è ducumintari.
U paesu hà sappiutu ligà passatu è prisenti intornu à a storia di a Prima Guerra mundiali, evenimentu chì da poi unu seculi hè statu un sughjettu di scrittura è di discussioni innarighjevuli pà u mondu, è ancu di più pà a sucetà corsa ch’hà mantenuatu u so duveri di mimoria
in ogni famidda è ogni paesu.

Un scontru storicu chì parmetti di più, seguittendu a tradizioni urala, di cuntà a storia maiò, quidda di i batagli di u fattu
naziunali, mà supratuttu u ricordu parsunali chì i Corsi intrattenini ancu oghji incù a guerra, quiddu di i lettari mandati da  l’arcimissiavu dapoi u campu di Verdun, i ritratti di u 173 emu
Regimenti, è pà i più ghjovanni i nomi di l’antenati sculpiti in u
marburu nant’à a piazza. Un ricordu cummunu ch’avemu u duveru di
trasmetta, ciò ch’idda incaricassi à fà l’Assocciu di u Pinu Tortu.

Eccu u prugramma sanu di i scontri di l’Uspidali !

Ciò chì s’hè passatu in Luddu :

• Sabattu u 21 di Luddu à 18 ori
Documintariu incù u rializatori Dumenicu Maestratti, u filmu conta a vita di u 373 esimu Righjimenti d’infanteria, riserva di u famosu 173 esimu Righjimenti , quandu iddu hà campatu duranti a Prima Guerra
mundiali in u rughjoni di i Vosges à a bocca di a Chapelotte, induvi
ani cresciutu monda castagni dopu à u passaghju di i corsi ch’aviani
lasciati i frutti mandati da i famiddi.

• Dumenica, u 22 di Luddu à 18 ori :
« Piddà i ritratti di i scunquassati mentri a guerra »

Una cunfarenza di Marcellu Fortini, futografiu è direttori fundatori
di u Centru Meditarraniu di a Futugrafia.

I prussimi manifestazioni in Aostu :

• Venari, u 17 d’Aostu à 18 ori
« Avè Vint’anni suttu tarra »
Documintariu incù a so rializatrici Maria – Petru Valli ch’hè statu filmatu incù i testimonia di Cinqui anziani cumbattanti corsi di a Prima Guerra, in 1997.

• Sabattu, u 18 d’Aostu à 18 ori
« E tutti , d’un stessu sbilanciu, sò partiti, i Corsi i a gran’ guerra, studiu novu »
Una cunfarenza di Sabbatinu Ottavi, prufissori è storiani.

• Dumenica, u 19 d’Aostu à 18 ori
« Fucilati in prima linia »
Ducumintariu in prisenza di a ghjurnalista è rializatora Jackie
Poggioli, parlendu di a tragedia di sti sei suldati corsi « fucilati pà l’esempiu ».

L’associu U Pinu Tortu prupona d’antri attività, inc’ù una parta riservata à u cinema, u so festivali  accoglia Thierry Dorangeon, Prisidenti di l’Associu Cinemotion ch’hà da prisintà 12 filmetti. 📍8 è 9 d’Aostu à 20 ori. 

Pà compia, un’ultima cunfarenza u 11 d’aostu à 18 ori à prupositu di u spaziu naturali ; « i cunsiquenzi di a dicadenza climatica nant’a a ghjestioni di l’acqua in Corsica », prisintata da d’Antonu Orsini, maestru di cunfarenza à
l’Università di Corsica.

A squadra Tempi prega à u paesu di l’Uspidali è à l’invitati una bedda
stonda di sparta è di scontri !

Eccu u situ di l’Associu nant’à a tela : http://pinutortu.blogspot.com/

Lasciate un cummentu ?

This site uses Akismet to reduce spam. Learn how your comment data is processed.