Avà, a 21esima coppa di u mondu hè compia. Essendu stata urganizata in Russia , ci voli à ricurdassi di Machiavel : « Tuttu ùn hè puliticu ma a pulitica s’intaressa à tuttu».
Tuttu ciò chì attrai a ghjenti cunnosciani intrusioni da a sfera publica. U puteri à traversu à a storia a sempri circatu ad apprufittà di l’avvenimenti. In l’anni 30, Benito Mussolini hà pussutu largamenti fà vena a ghjenti intornu à u doppiu titulu di campionu di u mondu di « la Nazionale ».
In lu 1978, i militari d’Argentina avia missu in opara una pulitica pà affermà a so legitimità pà u mundiali ind’è edda. Issu mundiali pari un schezru è micca sulamenti à causa di i famosi maglii verdi strisciati di la squadra di Francia pà a so terza partita. Di a partita a più strana di a storia Argentina-Perù (vittoria argentina 6 vs 0) à u cuntestu d’ipertensioni di a finali passendu pà i frodi di l’urganisatori, l’Argentina hà vintu. Mà comu ?
Pà mumenti, a coppa di u mondu hè stata un simbulu di nascita o di rinascita.
In lu 1982, a Spagna duvia muscià à u mondu ch’edda avia riesciutu a so surtita di u franchismu è ch’edda s’apria à u mondu .
In lu 2010, a prima coppa di u mondu urganizzata annantu à u cuntinenti africanu, in Sud Africa, paesi simbulu di a segragazioni razziali avia u scopu di muscià una faccia dinamica, muderna, surridenti d’un paesi sbarrazzatu di l’affruntamenti etnichi è più in generali d’un cuntinenti ghjiratu versu à l’avvena. S’è u rimori di li « vuvuzelas » ani sgradatu l’avvisu esternu, li critichi annantu à i risultati di a coppa di u mondu sò spartiti da l’usservatori. Sopratuttu, a coppa di u mondu ùn hà fattu spariscia ne a delinquenza ne l’inigualità trà i cumunità.
A coppa di u mondu pari un uccasioni di piattà ui prublemi intrinsechi à a sucietà. Incù u successu di Zinedine Zidane di u 12 di luddu di u 1998 in finali contr’à u Brasili, Jacques Chirac è Lionel Jospin pudiani sperà di piattà i tensioni nascenti in Francia sott’à u mottu di la « France victorieuse , Black-blancs-beurs ». Un sarà cà un effetu d’ottica. Tandu, in lu 2002, 4 anni più tardi, Jean-Marie le Pen sarà à u sicondu ghjiru di a presidenziali.
A coppa di u mondu 2018 in Russia ùn scappa tandu à a regula. Particulariamenti criticatu è attacatu da i sanzioni di a cumunità internaziunali, u presidenti russu Vladimir Poutine voli uppona à u mondu una faccia accoglienti, calurosa, aparta annant’à u mondu. Pà u mumentu, a sfida hè riesciuta. Eccezioni fatta di l’internu, a so viziosa strategia d’utilizzà u mundiali cum’è cupartura pà fà aduprà riformi restrittvi annantu à u pianu suciali hè statu sprezzatu da i russi. I perfurmanzi di a squadra di Russia ùn pudarani canalizzà a scumpienta pupulari.
Putin pudarà cunsulassi dicendu ch’ùn sarà micca l’Inghilterra a campiona. Saria statu gravi annantu à u pianu diplomaticu s’è l’Inghilterra avessi vintu, vistu chì u gas utilizzatu da i servizii sicreti di Russia, lu Skripal, hà tombu ghjenti innacenti.
A prussima volta, u Qatar accoglierà a cuppa di u mondu a più controversata di la storia à propositu di a so attribuzion in lu 2022. Issu paesi di u Golfu pruvarà di caccià a so immaghjini di sustegnu suppostu à l’islamismu radicali incù i so stadii climatizati è sicuramenti bioti.
Nudda ùn cambia : a balla circula è a cuppa hè piena.