Un ventu d’allegria s’hè spartutu arrisera in Cutuli è Curtichjatu. Una corti di scola, una scena, più di 330 carreghi, da bia è da magnà pà accoglia un publicu straudinariu vinutu à veda un gruppu miticu dapo’ 1978.
Diana di l’Alba
Natu in lu 1978, si pò truvà a spiegazioni di u nomi di u gruppu annant’à u so situ.. « a « Ghjanna » di l’Alba chì apre è chjode e cunfine di a notte, a Stella Matuttina chì guida i passi di l’anticu pastore, Vennere chì affascineghja u pueta… » . Hè ingiru à issa simbolica ch’hà da nascia issu famosu gruppu di cantadori è musicanti di talenti. 12 omi è multidudina di strumenti più o menu famosi. Trà eddi pudemi truvà a ghitarra chì tutt’ognunu cunnosci, u viulinu, po strumenti tradiziunali cum’è a cetera, a pifana è certi guasgi scunnisciuti cum’è u washboard vinutu da a Nuvedda Orlean o u psaltérion vinutu da u medievu, cum’eddu m’hà spiegatu Francescu Brunini, cantadori, cumpusitori è musicanti di u gruppu. U gruppu ripiglia una strada nova in lu 1993 è parechji artisti s’anu da adduniscia à fiancu à Antoni Marielli. U discu « Pueta » hà da veda u ghjornu in lu 1996 po « Sumenti d’acqua » in lu 1998. L’ultimu dischettu, « A ghjanna di l’incanti » hè surtitu cust’annu è hè statu prisintatu arrisera in u paesi gravunincu di Cutuli è Curtichjatu.
Più di 300 parsoni
Più di 300 parsoni erani in a Casa Cumuna di Cutuli è Curtichjatu issu 20 di lugliu di u 2018 pà veda un spittaculu magnificu. Paisani, gravuninchi, aiaccini è ancu d’altrò, la ghjenti si sò spiazzati pà senta canzoni anziani è novi. L’ochji maravigliati, surrisu in bocca, chjuchi è maiò sciaccamanavani à u sonu di a musica. La ghjenti baddavani, si pisavani, cantavani! Si pudia veda a bandera svintulà in i mani di ziteddi fieri di essa quì pà sustena una cultura è una lingua beddi vivi! Da « Ghjochi » à « A ghitarra » passendu pà « L’amerindianu » o ancu «S’anu pigliatu a mo canzona » a sirata hè passata in a gioia è tutti i visi cuntavani a storia magnifica d’un mumentu particulari sottu à u celu cutulesu. Un umaghju hè statu fattu incù a canzona «Rohlihlahla» à Nelson Mandela, dirighjenti storicu di a lotta contr’à u sistema puliticu istituziunali di segregazioni razziali di l’Africa Suttana, mortu in lu 2013 è chì avaria festighjatu i so 100 anni 3 ghjorni fà. U cuncertu s’hè compiu incù un magnificu « Diu vi salvi Regina ». Quista volta a bandera di u nostru populu hà svintulatu nant’à a scena, purtata da i ziteddi cutulesi. Dopu à u cuncertu la ghjenti spartini.. una mani, un bichjeru, una parodda, un missaghju, felicitazioni, un surrisu, un’uchjata, una canzona, una storia, un dischettu o un autograffu pà i maestri di musica tant’aspittati!
Ci voli à salutà l’aiutu priziosu di u « Foyer Rural » di Cutuli è Curtichjatu chì dà sempri una mani à a municipalità pà urganizà issi festi. Donni è omi di cori chì sò prisenti pà rigalavvi mumenti cusì. Ci voli ancu à ringrazià u publicu d’arrisera è particularamenti i ziteddi chì sò ancu cuddati annant’à a scena, semi fieri di voi. È di sicuru ci voli à ringrazià u gruppu Diana di l’Alba è a squadra di i tecnichi incù u travagliu maravigliosu fattu ogni volta. Bona strada è chì a vostra musica viaghjessi sempri in a nostra Cursichedda! È ancu più luntanu..
Eccu qualchì filmetti sopra! Una riescita!
« Ti vulemu fà onore, tù Nelson Mandela! »