Cuddeti in Altaghjè

Quandu si ghjunghji in Tallà, chì ci hè dopu ?
– Sant’ Andria.
– E quandu si ghjunghji in Sant’Andria, chì ci hè dopu ?
– Altaghjè.
– E dopu Altaghjè ?
– Nudda.
Stu paesu ch’ùn si varca micca, accogli i ghjenti da l’accaduta di u destinu, è quandu si ghjunghji cuì, ci voli à affrinassi, ò cuntinuà à pedi.
Cum`è u piligrinu franchendu l’intrata d’una citadedda santa, u viaghjadori posa i so affari, aspittendu l’attrachju, raccoglissi in u silenziu pietosu di a muntagna rucchisgiana.
U paesu purta u so nomu incù fiertà, Altaghjè hè un’altura in l’altura muntagnosa, ramintendu st’elevazioni ch’eddi circaiani i sapienti antichi. U paisanu hè l’antenatu di u stoizianu, posa u so sguardu schiettu è acchitatu nant’à u tumultu di u mondu bassu. In Altaghjè l’agitazioni pari vana, hè stata lasciata à l’omi di a cità divintata locu strazziatu duranti l’istati.
Forsa un paesu hè parfettu pà accoglia l’artisti, i scrittori, i pueti, culà sò i spiriti puri ch’eddi circaiani à essa, è liberati di u frastornu aghjunghjini l’atarassia.
Più chì u so camatoghjiu, u viaghju hè ciò chi li piaci à u pilligrinu, francà una bocca, una foci significheghja passà d’un mondu à l’altru.
A cuddata d’Altaghjè hè stu viaghju ch’ùn si smintica micca, torna è torna a vittura sin’à un’ultima inturchjata, cuì si lascia scappà un cionfu in u fiuminali di u Rizzanesu ch’eddu patruniza u chjucu pasciali di Sant’Andria, è imponendu a so duminazioni, priserva Santa Lucia a so pieva d’Attallà. Un paesu teni un ricordu cummunu è prufondu, chì si trasmetta, chì si sparta da a discindenza. Forsa u stragnieru s’affachendu in Altaghjè senti chì i petri ani qualchosa à palisà.
A l’intrata ùn truvareti nimu, sareti accolti da i mostri tramendi è begnini ; un dragonu furiosu, un fenicu imperiali, un cavaddu libaru, sti besti di farru ch’assicurani i cridenzi nati incù l’omi.
Seti invitati à scopra issi lochi di bidezza è di cultura in a muntagna rucchisgiana, issi stondi ch’ùn s’assumiddani à alcunu paesu ;
In Altaghjè cuddarà a civilisazioni di u meditarraniu sin’à a so alturari, i spondi grechi, sti spondi antichi ritruvarani i so paisaghji schietti d’aliveri ch’aviani purtati dui millenarii nanzu. U gustu di u vinu ramintendu i primi vindemi, fatti pà festighjà, in u godimentu di i piacieri ufferti da a tarra.
Dui milli seculi dopu si scuntrani sti lingui cugini ch’erani nemichi, parchi cuddani l’ellenisti pà scopra ciò ch’aviani insignatu i so antenati, spirghendu ritruvà i vestighji ‘lla so civilisazioni persa. Ind’è noi campa sempri a parti d’una sminticanza d’altrò. I scrittori sarani ascultati, parchì purtani una voci di raghjò ch’appri l’ochja à stu publicu divintatu discipulu.
A muntagna sarà pà sempri issa surghjenti di cridenzi è di timori ch’hà sustentu l’imaginariu di l’omu, un bisognu di cuntà è di sparta u so sguardu nant’à sta tarra ch’iddu cridia eterna malgradu l’affuriata ‘llu tempu. In Altaghjè, a muntagna suscita a maravidda, mà u spaventu dinò.
A lascita ‘lla Rinascita sempri viva, abbandunata apposta da i musicanti meditarranii ch’ani spapersu in a casa di Diu è in a prufundezza ‘lli cori i strumenti è i canti sparti da poi i seculi.
A musica ghjucata in i corti d’Auropa davanti à i Rè, davanti à l’Imperii si n’hè andata a ritruvà a castità di u cuventu San Francescu in Santa Lucia di Tallà.
I scontri d’Altaghjè, quarta edizioni da u 21 à u 22 di Luddu.

 

EE8BBE71-952A-4099-9EA4-22A0EAD05647.jpeg

Lasciate un cummentu ?

This site uses Akismet to reduce spam. Learn how your comment data is processed.