Adrien Porcu Deiana: da Aiacciu versu u mondu

Ochji neri, surrisu dolci è voci di crooner, Adrien Porcu Deiana, natu in lu 1982, hè un artistu cumplettu chi hà studiatu à i « Beaux-Arts » di Tulò è di Clermont-Ferrand dopu à avè avutu u so bascigliè litterariu. Da u dissegnu passendu pà a sculttura, a scrittura, a musica o u teatru, l’artistu mezu Rock’N Roll mezu rumanticu ci parla di a so storia è di a so voglia di campà di i so arti dapò a zitiddina.

Adrien ottena u so DNSEP (Diplôme National Supérieur d’Expression Plastique) in lu 2008 incù i cumplimenti di u ghjuratu di a scola superiori d’arti di Clermont-ferrand. Participeghja in furia à parechji spusizioni, prisentazioni è risidenzi biennali à fiancu à tanti artisti studiati in iscola. Rivena in Corsica in lu 2009 è si metta di più à u serviziu di i so radichi dunqua di a so isula cara, travagliendu par asempiu incù u FRAC (Fonds Régional d’Art Contemporain) di Corsica.  Cuntinueghja attempu di fà espusizioni in francia ma ancu in u mondu cum’è in Numeà, in Nova Caledunìa, in Sardegna o in una galleria di Brusselle.

Un mezu di parlà di ciò ch’eddu risenta

Una mamma pittori è fiurista, un babbu pastizzeru sculttori incù ditti d’oru è baddarinu, a criattività fà parti di a famiglia è Adrien ùn manca mai di parlà di i so dui anghjuli, musi di parechji di i so criazioni. Incù u baddu, a scrittura è u teatru, u so fratiducciu Florian praticheghji anch’eddu l’arti. Una famiglia d’artisti. Radichi corsi è radichi sardi si mischiani in casa. Pena, mina, inchjostru, legnu, cera, pittura, tutti i materii è mezi sò travagliati. « Aghju sempri vulsutu essa artistu, ùn aviu a scelta, ghjera sempri in a me menti di crià » ci conta iss’omu un pò anghjulu un pò ribeddu. Ipersensibili, Adrien era u ziteddu solu in a corti di a scola, chì guardava ogni cosa chì si prisintava à eddu, da l’insettu in tarra à i ghjocchi di i femini, sarendu l’ochji è ascultendu ogni sonu di a vita.  Adrien sprima pà via di i so criazioni ogni sintimu cheddu risenta, cum’è un testimoniu o una manera d’asistà.  Si difiniscia cum’è una spunga. « Assorbu tutti issi ditaglii, l’energia di u mondu è testimuneghju di issi sensazioni. U me travagliu hè sempri statu u dissegnu eppò pocu à pocu socu andatu versu à sculttura chi hà dumandatu assai sforzi fisichi. S’hè dunqua postu a quistioni è i nuzioni di a parsona, di u corpu, di l’organisimu in un spaziu. Aghju principiatu à fà filmetti pà mustrà issi parfurmanzi » ci raconta issu maestru d’arti. D’amori, d’avanguardia, d’avertimenti o di paci, i missaghji lampati da i so criazioni sò parechji. Pò un’attrazzioni pà u teatru. L’impruvisata. Un rollu principali in una corti metratura è d’altri prughjetti pà l’avveni. Oghji insegna u teatru, ghjenti ghjovani, altri menu ghjovani incù solu a vulintà di sparta è l’idea di truvà u benistà.

Quandu a musica entra in scena

Un spiritu d’artistu, di criatori è una sensibilità anu di sicuru purtatu Adrien in u viaghju  magnificu di a musica. Influenzatu da universi sfarenti, di Pink Floyd, Elliot Smith passendu pà Gainsbourg o altri generi o epichi. Ci conta chì prima sunnava ind’è eddu. Assai di ghitarra. Mai in publicu. Ci era u pudori. Pò essa pà ùn mustrà certi imuzioni, certi debulezzi. Ma in l’evuluzioni di a vita a musica s’hà da impunà si da edda stessa. A musica faci parti di u so “puzzle” com’eddu dici, un “puzzle” induva u ghjovanu raconta i so sintimi i più parsunali. Un filmettu di musica pustatu annant’à Facebook è u “buzz” si fà. Adrien riceva mondi missaghji di u mondu sanu, di ghjenti chì baddani, chì ridani, ancu incù ziteddi, accumpagnati di scritti di gioia, d’amori, d’incuragimenti diciendu “fà un discu!”. Parchì micca. Adrien hà sempri vulsutu fà un discu è u prughjettu nasci quandu a vita è l’imuzioni sò neri. Una forza vinuta da ùn si sà. Pà eddi. Pà eddu.  Adrien hà da rinasci incù issu prughjettu fabulosu, hà da fà issu discu. Un discu induva si tratta di l’amori, di quistioni isistenziali di a vita, di traumatisimi, di a perdita di qualchissia, di l’énergia, di a forza è di spirenza. In a settimana seguidendu u “buzz”, piglia a dicizioni di crià un contu annant’à “Kisskissbankbank” situ dedicatu à a ricerca di finanzamenti pà a criazioni è l’innuvazioni. À a mità di i ghjorni dispunibili pà raghjunghja i soldi, Adrien t’hà somma nicissaria pà rializà u so sonniu. U viaghju principia. Incù ghjenti maravigliosi, sempri à fiancu à eddu è u so furori. Canzoni in inglesu, in francesu è ancu pò essa in talianu o in corsu. Oghji chì ghjè oghji riceva sempri una fiumara di missaghji, di surrisi è d’amori chì l’aiutani. Anch’eddu aiuta la ghjenti cum’eddu hè dettu in i testimonii ricivuti da certi chì affirmani chì a so musica hè una terapia è aiuta in a malatia, in a deprima o in l’affannu. Una vulintà più forti di cuntinuà. Adrien s’avvincina di u so scopu. A musica faci parti di a so vita, un amicu invisibili ma prisenti, chì camina manu in a manu incù Adrien. U primu titulu “Time” ci porta in un celu di dulcezza induva i feriti di a vita si risentani.

Una parodda di fini? 

“Di sicuru vulariu ringrazià i participanti chì ani parmessu a rialisazioni d’issu discu incù l’ufferti. Grazia pà u vostru sustegnu, grazia pà a vostra fiduccia. Ùn mi scurdaraghju mai…”

U discu arrigistratu ind’è Klinamen vidarà u ghjornu à u mesi di sittembri sè tuttu si passa bè. Ghjè ciò chì nò auguremi à issu criatori di talenti. Aspitendu pudeti lampà un’uchjata annant’à Facebook [https://www.facebook.com/adrien.porcu].

 

dessin adri

Lasciate un cummentu ?

This site uses Akismet to reduce spam. Learn how your comment data is processed.