20 chilò di plasticu in u Meditarraniu ogni siconda!

Sicondu à a WWF, a fundazioni mundiali di a natura ci hè una crescita di a cuncintrazioni di i frazi plastichi in u nostru mari Meditarraniu, mari di 2,5 millioni di chilometri quatrati. Cuntaminata ogni annu da 500 000 tunnellati prudutti soli da l’Auropa.

U timori di a WWF si pò risenta in un raportu publicatu l’8 di ghjugnu scorsu. Ma cosa aspittemi pà riagiscia? Di nutà in un mari di plasticu? Sicondu à issu raportu l’Auropa righjitta 130 000 tunnellati di microplasticu (menu di 5 mm) in più di i 500 000 annunciati sopra. 130 000. Tunnellati. Facini 630 000 tunnellati di plasticu ogni annu in u meditarraniu chì minacia a fauna.  Dunqua sè nò cuntemi bè, 630 000 pà 31 millioni di sicondi. 20 chilò pà una siconda. Da quì à qualchì anni tumbemi i nostri animali, u nostru mari, sì pò ancu dì a nostra tarra.

Linei di pesca è vasetti di fiori in u stomacu

Oghji u nostru Meditarraniu hè u mari u più cuntaminatu di u mondu. 150 millioni d’abitanti campanu in giru à issu mari è i più di 200 millioni di turisti ogni annu aumentani di più di 40% i frazi di l’istati. 60 razzi di pescii, 3 di cuppulati, 9 d’acceddi di mari è mammiferi cum’è u capidogliu, i delfini è altri. À u mesi d’aprili un capidogliu hè statu truvatu arinatu in Spagna incù 9 metri de linei di pesca è dui vasetti di fiori in u stomacu. I micro plastichi si ritrovani ancu ind’è i i musculi, i granci è i traghji chì dunqua pà u più sarani cunsumatu da l’omu in seguita. Un cunsumatori di cunchigli mediu pò ingeriscia sin’à 11 000 pezzi di plasticu à l’annu.

In causa a ghjistioni pessima di i frazi di i paesi di u Meditarraniu

Pruduzzioni è cunsumazioni eccessivi, una gattiva ghjistioni di i frazi è u turisimu smuderatu sò i causi d’issu scumpientu chì l’omu fà campà à u Meditarraniu. Da i 27 millioni di plastichi prudutti in Auropa solu 1/3 hè scumpartu. A Francia scumparta solu 22% di u plasticu pruduttu, unu di i peghji provi premiati in Auropa. Incù 60 millioni di plasticu pruduttu, l’Auropa hè u sicondu pruduttori di plasticu mundiali.

Insemi, pudemi renda a so libertà à u Meditarraniu!

A WWF chjama u guvernu, l’impresi è la ghjenti à aduprà azzioni pà diminuiscia a polluzioni di plasticu incù:

  • a firma di un’intesa internaziunali ligali custrighjinti.
  • intardizzioni naziunali pà tutti i plastichi à usu unicu è l’aghjunghjimentu di micro plastichi in i prudutti da quì à 2025
  • una chjama à l’impresi, ch’eddi invistisciani in l’innuvazioni è l’ecocuncipimenti pà un usu più perdurabili è efficienti di u plasticu

 

Insemi, pà a nostra pianetta è i so abitanti, oparemi!

Lasciate un cummentu ?

This site uses Akismet to reduce spam. Learn how your comment data is processed.