L’associu I me loca, natu di farraghju 2016, hè cumpostu di 5 ghjovani corsi primurosi di salvà a manera antica di chjamà i lochi. Issi omi viaghjani di paesi in paesi, di paisoli in paisoli, in a Corsica sana pà intarrugà i più anziani annant’à a tupunimia, pà a nostra mimoria cullittiva. Emi dumandatu qualchì pricisioni à Martinu Squarcinu, Prisendenti di l’assocciu.
Tempi: Comu hè vinuta l’idea di crià I me loca?
Martinu Squarcini: Videndu tuttu ciò ch’e no perdiami quand’un anzianu d’un paesi o d’un locu si n’andava purtendu incù eddu una richezza tremenda chì saria da tramandà. U scopu hè d’andà à filmà in ogni paesi, i mimorii, l’anziani, soli sintineddi d’un passatu chì si ne và.
Tempi: Parchì aveti sceltu i filmetti?
Martinu Squarcini: Parchì in filmetti ? Parchì o menu ferma una stampa visuali di a parsonna ind’u so locu, permetta chì à long’andà a ghjenti si dicenu « era u me babbone, u me ziu o u me paisanu, eddu ne sappia assai è vogliu amparà quant’eddu ne sappia è cunnoscia i me lochi ». À l’ora d’oghji cù i mezi audio-visuali si pò salvà un paesi è dà a voglia d’amparà à a ghjenti. I nostri filmetti sò in lingua corsa pà mustrà chì ùn ci hè vargogna à avè di parlà la, pà puntà la di nanzu.
Tempi: Parchì u nomi I me loca ?
Martinu Squarcini: Una piccula uchjata à una canzona di i surghjenti « i me loca » chì c’imprestani a so canzona à ogni principii di i nostri filmetti, mà dinò una manera di metta di nanzu u parlatu pumuntincu chì si perda, colp’à l’insignamenti in’iscola solu di u parlatu cismuntincu. U nostru scopu, copra à long’andà, u più pussibuli di lochi in Corsica è d’intarvistà, u più pussibuli d’anziani, di pastori, di cacciadori, st’omi di a tarra chì sò oghji guasgi l’ultimi guardiani di a nostra mimoria.
Tempi: Martinu, à ringrazià vi pà i vostri risposti, vi lascemu a parodda pà dì ciò chì vò vuleti…
Martinu Squarcini: Possu dì chì sta voglia di fà i me loca, m’hè vinuta anc’à mè videndu u me babbone, u me ziu, amparà mi tant’affari, è cù Simon’Paulu ferrandi, u me Frateddu Paulu Antonu Squarcini, Ghjuvan’Lavighju Ghiddi è Migheli Forte, emi decisu d’allargà sta voglia di salvezza in a Corsica sana è i so rughjoni maestosi. Si scopra annant’à i lochi, Parchì a tupunimia hè liata à a storia d’un locu, ogni affari sò liati : L’omi dani vita à a tarra cù a cultura è l’usi, a tarra dà vita à l’omu arrichendu li i so bisogni naturali, è a lingua ( tupunimia, canti, ecc…) hè a a piccula leia ch’intratena l’omu à a tarra, senza sti punteddi tuttu mora à long’andà.
Pudeti suvità i passi di I me loca nant’à i reti suciali Facebook, Instragram è fighjulà tutti i filmetti nant’à YouTube incù u ligami sottu:
https://www.youtube.com/channel/UCMYrL066QD2l63EBIaMnfIw
A squadra di a Rivista Tempi vulia salutà l’azzioni missi in baddu da l’associu I me loca, ringrazià issi ghjovani chì lottani pà a salvezza di a nostra lingua, di a nostra cultura, di a nostra storia è di a nostra identità. Tinimu à salutà tutti i ghjovani chì participeghjani ogni ghjornu incù mezi sfarenti, à u campà di a lingua è di a cultura corsa. Prighemu à l’Associu I me loca una longa vita!
