« A fini di a bromanza»

Si sò amati tantu. Si sò presi la manu davanti à i camera, ani risu in publicu; L’unu hà invitatu l’altru in un risturanti di lussu di a Torra Eiffel, l’altru l’hà ringraziatu invitendulu ind’a casa di Washington. Ani piantatu una leccia incù i so donni, dendu cusì à i fotografi un’immaghjina vicina di a cupartura di a prumuzioni di serii americani cà d’un’ illustrazioni di i rilazioni internaziunali.

Donald Trump è Emmanuel Macron ani circatu di dà l’imprissioni di vulè crià una rilazioni spiciali. Aldilà di a tradiziunali è fundamentali amicizia storica franco-americana, ognunu t’avia u so intaressu à issu ghjocu più mediaticu cà fundatu annantu à un pianu parsunali è puliticu.
Tandu, i capi di u Statu sò i parfetti cuntrarii. Macron, avendu omancu 40 anni, fini littaratu, diplomatu di i più alti scoli di a Republica, puru produttu di l’alta amministrazioni, a prò di u libaru scambiu, di a diversità, di a lotta contr’à u riscaldamentu di a pianeta, di a difesa transatlantica.
Un prufilu antagunistu di quiddu di u 45esimu presidenti di i Stati Uniti, à chì ùn piaci tantu a cultura. Anzianu rè di l’affari (incù, tandu, fallimenti) essendu statu à u capu di un imperu di u bastimentu, pruduttori di telerealità, à prò di u rapportu di forza, di l’unilateralismu, di a preferenza americana, contr’à a realità di u sregulamentu climaticu pinsatu cum’è un invenzioni chinesa.

Tandu, l’unu è l’altru ani vulsutu à frequentassi. Dapoi à u so arrivu à u puteri, u Presidenti Macron hà circatu à custruì una rilazioni fundata annantu à a cunfienza parsunali è a l’unestà incù Donald Trump. Avia isciutu i grandi mezi invitandulu pà u 14 di luddu è offrendulu un’ accolta degna di un rè. Macron hà sempri cunservatu parolli misurati davanti à i decisioni di Donald Trump. Emmanuel Macron t’hà bisognu di u Presidenti americanu. Annantu à l’accordu di Parigi rilativu à u clima di cui Emmanuel Macron s’era ghjuratu d’essani u partigianu assulutu, una rimissa in causa di l’accordu da i Stati Uniti , primu pullutori in u mondu, minacciaria a perennità d’iss’accordu . In u listessu tempu, Macron spera di fà fruttificà l’accordu nucleari iranianu di u 2015 pà parmetta à l’impresi francesi di cuntinuà di beneficià d’una pusizioni impurtanti in issu paesi. Una surtita d’iss’accordu da a parti di i Stati Uniti valaraia à dì a fin di l’accordu, u ritornu di sanzioni ecunomichi pà u Statu Iranianu incù cunsequenzi maiò annantu à l’impresi francesi in Iran.

Donald Trump vidia anc’eddu d’un bon ochju a missa in scena di st’intesa cù u so amicu Emmanuel. « Moqué » à l’internaziunali à u so arrivu, criticatu da i ghjurnalisti, minacciatu dà i ghjudici è incù pocu di sustegnu da a parti di u so partitu, u presidenti americanu mandaia un messaghju à l’upinioni publica dicendu ch’edda ùn era un gattivu lupu cum’è annunciatu è ch’eddu sapia avè rilazioni forti di cunfidenza à l’internaziunali, è chì a gente dicia bacii annantu à a so campagna.

Ma a « bromanza » cum’è chjamata da i media hà presu fini. Donald Trump hè surtitu da l’accordu di Parigi annantu à u clima, Emmanuel Macron ùn hè micca riisciutu à fallu stà ind’è l’accordu. Peghju, ùn hè micca riisciutu malgradu à tutti i so sforzi à mantena l’accordu di u 2015 annantu à u nucleariu iranianu. Ma u presidenti francesu ùn avia micca finitu di strazzià quandu u presidenti americanu hà missu in baddu novi tassi duganarii annantu à l’impurtazioni d’acciaru è d’aluminu.
U presidenti francesu ùn avia micca vistu l’omu d’affari ch’hè Donald Trump. St’ultimu, in affari, prova colpi chì funzionani o micca, li reguli di a diplumazia ùn ani nisciunu valori pà Trump chì voli metta in baddu u so ritmu ancu s’eddu voli à indispettì i so alleati.

Innanzi à u Cungressu americanu, Emmanuel Macron hà rispostu indirettamenti à Donald Trump incù un discorsu anti-Trump. Infini, st’amicizia hà presu fini ghjovi u 13 di maghju dopu à una rilazioni cumplicata è tumultuosa, ancu viulenti trà li dui capi di stati. Emmanuel Macron hà pinsatu ch’un discorsu direttu è francu parmettaria d’accuncià a situazioni. In ritornu, hà avutu una riazioni timpestuosa di Donald Trump, à chì ùn hè piaciutu st’incontru. Ùn li hè piaciutu i rimprovari fatti da u Presidenti francesu. Oghji, un ritornu di i Stati Uniti inde l’accordu di Parigi hè un illusioni è l’intrapresi francesi partini da u marcatu iranianu di paura d’avè sanzioni da a parti di a ghjustizia americana.

In realità, Emmanuel Macron è Donald Trump ùn pudiani essa d’accunsentu. U presidenti francesu, ligatu à u rispettu di i reguli diplumatichi simplici allora ch’edda sò stranieri à u presidenti americanu, duvia annantu à un longu tempu entra in cunflittu cù un presidenti americanu imprevedibili.

Lasciate un cummentu ?

This site uses Akismet to reduce spam. Learn how your comment data is processed.