“U sangue vivu corre è ferma vivu. Un annu fà, era un ghjornu di collera per u nostru populu. Dicennove Olocosti nantu à l’altare di a libertà per u populu kanak. In stu ghjornu, u prima anniversariu di u so sacrifiziu, vogliu salutà a so mimoria è u so curagiu è ringraziu quelli omi per u donu di u so sangue per a nostra causa.” Jean-Marie Tjibaou, capu di u Fronte di Liberazione Kanak è sucialistu.
Qualchì minuta dopu à quella intervenzione, u capu di u FLNKS hè statu tumbatu da un estremistu indipendentistu. Hè mortu Tjibaou, u 4 di maghju di u 1989, figura maiò di u naziunalisimu kanak è di l’accordi di Numeà di u 1988 ch’hà pacificatu st’isula ammacata da quattr’anni di “guerra civile ( 1984-1988)” è di 135 anni di culunialisimu senza pietà.
Un statutu unicu in Francia, paese di tradizone ghjacubina.
19 anni dopu à st’episodiu tragicu di a Storia Kanak, a Nova Caledonia hè assai cambiata. Incù l’accordi di Numeà di u 1988, l’isula hè dutata avà di tutt’e cumpetenze, fora di quelle regali. Pò crià è adattà leghji nantu à u codice di u travagliu, nantu à a fiscalità, nantu à l’energia ecc. L’isula tene u so propriu guvernu incù ministri è prisidente chì venenu da tutti i partiti, indipendentisti o nò. Tene a so propria muneta ch’ella sparte incù Tahiti ch’ùn hè micca l’eurò cum’è in Francia ma chì si chjama u Francu pacificu(XPF).
U trasferiu di e cumpetenze, previstu in l’accordi di Numeà s’hè fattu per duie fase è ci n’hè un’ultima da fà. A prima previdia u trasferiu di l’insegnamentu sin’à u cullegiu, di u dirittu abituatu ( tooltip) – in Nova Caledonia ci hè u dirittu civile è quellu di e tribute — , u dirittu di u travagliu, è e leghji di l’amministrazione lucale. A siconda previdia l’insignamentu sin’à l’Università, u dirittu sanu, i principii di a prupietà, e regule di a pulizza è di a securità maritima, dunque tutte e cumpetenze fora di quelle regali.
L’ultima fasa hè l’indipendenza di l’isula, dendu cusì e cumpetenze regali cum’è l’armata, a ghjustizia, e rilazioni internziunali, a naziunalità è u cuntrollu di a muneta. St’ultima fasa hè spessu mal cunnisciuta da a ghjente: ci serà un referendum u 4 di nuvembre di u 2018. S’è a ghjente dice “innò” à l’indipendenza, u guvernu di l’isula puderia cunvucà dui altri referendam, in u 2020 è u 2022 s’è 33% di u cungressu face a dumanda. Finalmente, s’è u populu neucaledonianu ricusa l’idea d’indipendenza, un accordu Numeà II duveria esse neguziatu trà i partiti indipendentisti è republicanu per urganizà altri referendum o un statutu speciale. Sicondu l’artìculu 5 di l’accordi di Numeà “Tantu chì e cunsultazioni ùn seranu ghjunte fin’à l’indipendenza, l’urganizazione pùlitica messa in piazza in u 1998 firmerà, hè irrevucabile cum’ella dice a Custituzione (…) U Statu, ricunnosce a vucazione di a Nova Caledonia à pruffità di l’emancipazione”.
U referendum di u 2018, imbusche è pruspettive
Sicondu l’inchieste cumandate da i ghjurnali lucali cum’è les nouvelles calédoniennes , u “innò” averia da vince u referendum incù 55%-60% di i voti, l’affare pare bellu cumplicatu per l’indipendendisti chì sò maghjuritarii in u Nordu di l’isula, pocu populatu pè raportu à u meziornu induv’elli sò minuritarii. Ci sò dinù tensioni etniche ingiru à u referendum trà i kanak è i caldoche, vale à dì l’auropeani chì campanu in st’isula dapoi assai generazione avà, ma dinù trà i kanak è i migranti di Wallis è Futuna. Ùn sò micca forte quant’è in i tempi di les événements ( 1984-1988) ma esistenu.
Ancu, s’ellu vince u “innò”, u referendum hà da avè cunsequenze maiò per l’avvene di stu paese. D’appressu à u rapportu di Jean-Jacques Urvoas, anzianu ministru di a Ghjustizia francese, a Francia puderia piglià duie misure : A prima soluzione hè ch’a Francia puderia dà à a Nova Caledonia un Statutu d’indipendenza/associu, vale à dì chì u paese diventa indipendente, incù a so propia Custituzione, a so propria naziunalità, e so proprie rilazioni internaziunali ma hè sempre ligatu à a Francia perchè ella puderia dà certe cumpetenze cum’è l’armata o u cuntrollu di a muneta à a Francia. A Francia puderia dinù crià un statutu speciale di Statu federale induve a Nova Caledonia averia a so propria Custituzione è e cumpetenze di l’accordi di Numeà ma faria sempre parte di a Ripublica francese. L’idea d’una Nova Caledonia, libera è indipendente ancu s’ella ùn hè maghjuritaria per avà hè veramente l’ultimu scopu di quelli accordi è di a Francia.
Eccu, u 4 di nuvembre di u 2018, ùn impremerà forse tantu u “sì” o u “innò”, u destinu di a Nova Caledonia puderia cambià per sempre, purtendu st’isula culunizata versu l’emancipazione sana. A suvranità sana pare impussibule à mancà: indipendenza, indipendenza/associu, Statutu federale, tutt’i populi di st’isula averanu da riflette nantu à un destinu cumunu per custruì un veru paese.