« Glyphosate »: L’Assemblea di Francia ricusa l’amindamentu chì vulia impidiscia a vendita di l’arbicida

Parechji amindamenti chì vuliani integrà in a leghji agricultura è alimentazioni a fini di u « glyphosate » da quì à u 2021 sò stati ricusati da i diputati u 20 di maghju scorsu. U « glyphosate », arbicida ghjiniralisti, chì faci parti di a cumpusizioni di u famosu Roundup hè statu classatu trà i prudutti cancarogeni da l’Urganisazioni Mundiali di a Saluta in lu 2015. Oghji chì ghjè oghji i cità ùn ni poni più fà usu in i spazii aparti à u publicu dapo’ u primu di ghjinnaghju di u 2018. Individualamenti la ghjenti ùn ani più da pudè cumprà lu in magazenu à parta si da u 2019. Ma l’agricultori chì sò i primi utilizatori d’issu pruduttu, sò pà u mumentu dispensati.

I raghjò di issa dicisioni

85 era u numaru di diputati prisenti in l’emiciclu in a notti di luni à marti pà righjittà l’amindamentu di Mathieu Orphelin. Simplici, attivu è micca caru u « glyphosate » hè prufittevuli pà l’agricultori. Nisunu pruduttu simili biulogicu asista pà u mumentu incù a listessa capacità di risultati. In Francia, sò fatti ricerchi pà elaburà soluzioni à parta si di vegetali. Ma par avà ùn sò appruvati è forsi ùn currispondani micca incù i bisogni di l’agricultori. Senza issi prudutti l’agricultori devini impiegà mettudi meccanichi pà caccià l’arba. Dunqua una perdita di tempu è d’impurtantissimi invistimenti in i mascini agriculi. Sicondu un’analisa d’Ipsos (impresa di sonda francesa), s’è quissa arbicida hè surtitu, custarà più di dui miliardi d’euri à a filiera agricula. Rimetta in quistioni i pratichi agriculi di parechji anni in 3 anni hè statu ghjudicatu « troppu imbiziosu » è puliticamenti assai risicatu pà a maiò parti di i diputati prisenti pà vutà.  Ancu s’è a raghjò principali prisintata hè chì ùn ci hè bisognu di fà a scrizzioni in a leghji ùn hè nicissaria pà impidiscia è chì saria troppu custrighjenti pà l’agricultori, parechji eletti chì erani favurevuli à issa misura è sprimani u so dispiacè.

 Dillusu, Nicolas Hulot sperga pà 2021

U ministru di a transizioni eculogica, Nicolas Hulot, s’hè sprimatu marti scorsu diciendu essa “dillusu” ma spirendu sempri pà u 2021. Pà eddu l’ughjettivu ùn hè rimissu in causa. In una cunfarenza di stampa in Bastia, u ministru hà dettu chì ancu s’è issa scrizzioni in a leghji saria stata di più cuerenti. Ciò chì conta pà Nicolas Hulot ghjè di più a pulitica ch’hà da essa appiicata. Incù edda pò essa ch’ùn ci sarà bisognu di a leghji. Casu mai da quì à u 2021 si pudarà rivena in daretu è fà una nova dumanda pà una scrizzioni ufficiali in a leghji. “Avemi un ughjettivu chì hè sempri quì ancu s’e avariu prifiritu ch’eddu sia scrittu in a leghji ma l’unica cosa impurtanti di fà lu… Da quì à 3 anni, emi da impidiscia u “Glyphosate”. S’è no vidimi chì l’attori ùn ghjocani micca u ghjocu da quì à un annu, rivinaremi à a leghji” hà dichjaratu u ministru in l’emissioni Circuits Courts annant’à Europe 1. U prisidenti di a Francia, Emmanuel Macron ricunnoscia a dillusioni di u ministru è li porta, una volta di più u so sustegnu. “Ùn semi micca in una favula, ghjè nurmali chì certi volti i cosi frizziunessini un pocu ma s’è no avanzemi, eiu saraghju quì”.

In Argentina, una donna, Marie-Monique Robin hè andata à seguità incù a so camerà i pupulazioni chì campani in i campagni aspersi di “Glyphosate”. A scuperta hè affannosa. Famigli sani chì morani o sò malati. Pà edda ghjè un genucidiu silenziosu è un falzificatu scintificu. U so ducumentariu hè statu mustratu in lu 2017 annant’à à Arte.

 

Lasciate un cummentu ?

This site uses Akismet to reduce spam. Learn how your comment data is processed.