Perchè ùn hè più permessa di fà grandi piani di rilancia in l’Unione Auropea ?

[1]U 4 di marzu di u 2018 u Muvimentu 5 stelle è a Lega di u Nordu anu vintu l’elezzioni generali finiscendu primu è sicondu. Dopu à dui mesi di trattativi cumplicati, Matteo Salvini, capu di a Lega è Luigi di Maio, quellu di u M5S anu trovu un accordu per guvernà l’Italia. Quellu accordu prevene assai spese pùbliche è calate di tasse cum’è l’idea d’una “flat tax”, vale à dì chì u percentuale di l’impositu serà u listessu per tuttu u mondu, un rivinutu universale per tutti i citadini di 780€ ecc. U prublema hè chì i puteri di l’UA si sò ubligati à ammaistrà e spese pùbliche incù u “pattu di stabilità è di crescita” chì ùn permette micca à u paese d’avè un disavanzu pùblicu di più di 3% di u Pruduttu internu lordu (PIL) è un debitu pùblicu di più di 60% di u PIL. Dunque, l’affare pare cumplicatu per l’Italia s’ella ùn vole micca esse castigata da l’UA chì pò attaccà i paesi ch’ùn rispettanu quellu pattu.

Ma perchè ci hè stu pattu ?

Aldilà di u fattu chì a duttrina duminente in ecunumia oramai sia quella liberale, e nostre ecunumie sò assai interdipendente, vale à dì chì e pùlitiche ecunòmiche di l’Italia anu da avè un ribombu pusitivu o negativu in tutte l’ecunumie di l’UA. Allora, avemu da dimostrà ecunomicamente ciò chì s’hà da passà sì l’Italia face a so pùlitica ecunumica à u nivellu di l’UA incù u mudellu ecunòmicu Mundell Flemming[2].

Per chì e cose ùn sianu troppu cumplicate emu da parlà solu di dui paesi : l’Allemagna, paese passivu è l’Italia, paese attivu. Emu da sottupone chì a prupensione marginale à impurtà di i dui paesi hè debule, vale à dì chì l’Italia ùn importa tanti prudutti d’Allemagna è listess’affare per l’Allemagna. Di più, i dui paesi anu a listessa muneta, l’euro.

Eccu, u mudellu hè pisatu.

Femu contu chì l’Italia fessi solu u so rivinutu universale, vale à dì ch’ella face cresce e so spese pùbliche indibitendusi Subitu subitu, u PIL di l’Italia crescerà, s’ellu cresce, i taliani seranu più ricchi è averanu ancu di più bisogni è l’Allemagna serà cuntenta perchè spurterà ancu di più bè in Italia è dunque ferà cresce dinù u PIL di l’Alemagna ; què, si chjama l’effettu di u multiplicatore cummerciu sternu (mcs). D’altronde, u finanziamentu di quella pùlitica incù pristatu pruvucheghja una crescita di u tassu d’interessu cumunu perchè i dui paesi anu a listessa muneta, ciò chì suscita un effettu d’evizzione, vale à dì una caduta di l’investimentu è di a cunsumazione privata pruvucata da quella crescita di e spese pùbliche[3].
Quellu effettu, frenerà l’effettu di rilancia iniziale di l’Italia per via di a caduta di l’investimentu, ma infine, a pùlitica serà pusitiva per u pruduttu naziunale, u PIL. Malgradu quessa, l’effettu d’evizzione mundiale averserà l’effettu multiplicatore di u cummerciu sternu per l’Alemagna, cum’è no avemu sottupostu chì a prupensione marginale à impurtà di l’Italia era debule, l’effettu d’evizzione supranerà quellu di u mcs è u PIL di l’Alemagna calerà. Di più, a crescita di u tassu d’interessu cumunu pruvucherà una crescita di quantità d’euro in Italia è una calata in Allemagna. Hè nurmale, per fà a so pùlitica, l’Italia avia bisognu di soldi, chì eranu in Allemagna.

S’è a prupensione marginale à impurtà di l’Italia o di i dui paesi era forte i dui paesi averianu apprufittatu di a pùlitica taliana perchè l’effettu d’evizzione seria statu supranatu da u mcs ma a realità pare piuttostu cum’è no avemu sottupostu da u principiu.

In cunclusione, ancu s’è u scopu maiò di u pattu di stabilità è di crescita accittati da i paesi di l’UA in u 1997 era d’impedì troppu spese pùbliche di i Stati auropeani l’altru scopu, ancu ellu impurtante era di cuurdinà e pùlitiche di e paesi per impedì l’effettu macroecunòmicu spiegatu nanzu. Per ciò chì tocca à l’Italia è a so pùlitica, ci vole à sapè chì a maghjurità di i paesi auropeani ùn rispettanu micca u pattu dunque mi pare chì l’Italia ùn serà micca troppu inchietata.

[1] Pigliemu l’esempiu di l’Italia per illustrà e spiegazione ecunòmiche.

[2] S’è vo ùn cunnuscite micca stu mudellu, pudete leghje un artìculu nantu à u mudellu IS/LM è dopu quellu di Mundell/Flemming quì : https://co.m.wikipedia.org/wiki/Mudellu_IS-LM
https://it.m.wikipedia.org/wiki/Modello_Mundell-Fleming

[3] Sicondu l’ecunumisti liberali, l’effettu d’evizzione pruvucatu da alte spese pùbliche hè una raghjone maiò di a falata di l’investimentu.

Lasciate un cummentu ?

This site uses Akismet to reduce spam. Learn how your comment data is processed.