I. Un picculu introitu
A Vaddi d’Aosta hè una rigioni ‘ll’Italia nordu uccidintali, cù un statutu spiziali è Aosta com’è capilocu. Faci parti di l’Eurorigioni Alpi è Miditarraniu. Hè a rigioni a più chjuca d’Italia cù 3 263 chm² di suparficia è ancu quidda menu pupulata cù 126 220 abitanti. U PIL procapiti hè di 35 264 euro, si trova frà i rigioni i più ricchi. Ci hè dui lingui ufficiali, u francesu è u talianu, è una lingua minuritaria, u francupruvinzali.
A Valli d’Aosta hè una rigioni cù un statutu spiziali postu ch’idda faci parti ‘lli rigioni autonomi à statutu spiziali ; ma aldilà di ‘ssu fattu ch’idda faci parti ‘lli rigioni autonomi d’Italia, a Vaddi d’Aosta t’hà un statutu monda particulari in ‘ssi rigioni autonomi cù un’autonomia avanzata assai, in fatti una di i più avanzati di l’Auropa sana. L’organi amministrativi godini di cumpitenzi propii in duminii com’è l’icunumia, l’agricultura, u turisimu o in a gistioni ‘lli scoli materni.
II. A Valli d’Aosta dapoi 1945
a) A libarazioni è cumu i francesi hanu pruvatu ad annissà a Vaddi d’Aosta
In u 1945, hè compia a guerra in Auropa è s’arriguleghjani i cunflitta pocu à pocu, par via di trattata di paci, di scontri frà putenti, d’annissioni di tarritorii… È i francesi anch’iddi ani pruvatu à ripiddassi qualchì tarritoriu uccupendu par asempiu a Vaddi d’Aosta, è chjamendu à u so rattaccamentu à a Francia.
Ci voli à ramintà chì i machjaghjoli valdostani ani libaratu u so rughjonu senza l’aiutu di l’alliati, ch’iddi sianu francesi o amiricani. U 6 d’aprili di lu stessu annu, i truppi francesi affacchendu si in a Vaddi d’Aosta ani principiatu ad uccupà la. Dopu à una campagna par un plibiscitiu in favori di l’annissioni da a Francia, u Cumitatu di Libarazioni Naziunali hà chjamatu l’aiutu ‘lli Stati Uniti, mandendu una lettara à Truman pà dumandà li di furzà à i francesi di ritirà i truppi d’uccupazioni. U 7 di ghjugnu Truman dumanda à De Gaulle di caccià i so truppi osinnò li cacciani l’aiuti matiriali di l’americani. U 24 i militari francesi partini da u tarritoriu talianu, ma in l’accunsentu di Parigi ‘llu 1947 sò riisciuti à ricuparà i paesi di Tende è Brigue à l’Italia à a fruntiera.
b) Un statutu particulariu è quasgì unicu in Auropa
A rigioni piddò pà a prima volta una forma autonoma in u primu di ghjinnaghju ‘llu 1946, rinfurzata dopu cù i leghji custituziunali. Ci sò parechji rigioni in Italia chì t’ani un statutu d’autonomia, ma a Vaddi d’Aosta hè a sola cumposta d’una pruvincia quandu l’altri rigioni sò cumposti d’almenu dui pruvuncii. T’ani l’autonomia lighjislativa sclusiva nantu à assai assai duminii. Poni par asempiu urganizà da par iddi i pulitichi ingiru à l’urbanisimu, u turisimu, a scola materna, l’opari idraulichi, l’agricultura, u corpu furistali, l’isprupriazioni par publica utilità pà tutti i materii di cumpintenza rigiunali… È t’ani dinò un puteri “cuncurrenti” cù u statu cintrali nantu à l’urganizazioni ‘lla pulizza lucali, urbana è rurali, a struzzioni primaria è sicundaria, u cumerciu, u travaddu, l’asircizii publichi, l’igieni, l’attività spurtivi…
Senza parlà d’indipindenza-associu semu in un sistema viramenti spiziali, trà l’autonomia “classica” com’idda si prisenta in l’altri loca d’Italia è d’Auropa (micca di Francia postu chì in ‘ssu paesu a cintralizazioni hè una parodda santa) è l’indipindenza-associu à parichji niveddi, cù paesi com’è u Vaticanu incù l’Italia o u Liechtenstein incù a Svizzara.
Iddi ùn dumandani micca l’indipindenza nè l’unificazioni cù a Francia, voni simpliciamenti tena u parlatu francupruvinzali valdaostanu, u francesu parchì l’ani sempri parlatu è scrittu, è nanzu à i francesi iddi stessi, è cù rivindicazioni è niguziazioni intillighjenti incù u Statu, a Vaddi d’Aosta hè riisciuta à trae avanzati maiò, à metta in valori i so particularità linguistichi, tarrituriali è ad avè un statutu particulari è chì à iddi li parmittissi di custruiscia a righjoni piddendu in cunsidirazioni i prublema lucali è micca ghjustu i piani d’azzioni à u liveddu ‘llu statu talianu, eccu una situazioni chì à noi ci dà à rifletta.