17 anni è u sonniu di divintà stilista

Lisa-Maria Ferrandi t’hà 17 anni è si vesta solu incù vistiti ch’edda hà criatu! Maravigliosu sonniu di una piccula isulana di divintà stilista. È a strada à vena pari bedda.

Lisa-Maria t’hà sempri u surrisu, l’ochji maiò è maliziosi. Nata è crisciuta in Corsica, issa ghjuvanotta di Cutuli è Curtichjatu hè oghji in terminali à u liceu Letizia in Aiacciu. Chjuca è fina, a zitidduccia di 13 anni à l’epica ùn trova micca vistiti tagliati pà edda in i butteghi è piglia a dicisioni di crià li incù i so picculi mani. Lisa-Maria dumanda pà Natali di u 2013 una mascina pà cosgia. Ghjè u principiu di a so aventura. Prova sola di crià i so primi vistiti è i so accessorii. Dopu à avè pigliatu qualchì studii ind’è una cusgitora pà avè i primi sapè d’issu arti, a zitedda cutulesa piglia fiduccia è faci criazioni di più in più beddi. A so imaghjinazioni ùn hà limiti è nascini maglietti, vistimenti di matrimoniu è di festa, toghi.. À 17 anni Lisa-Maria vena di crià a so marca, Ondalisa, è riceva monda dumandi di criazioni pà via di i reti suciali. Pà un matrimoniu, pà un battezimu, pà una sirata o pà ogni ghjornu, i donni corsi sò sinsibili à l’universu di a stilista in ivuluzioni. Lisa-Maria ùn porta cà i so vistiti, è à u liceu nimu ùn si vesta cum’è edda. Pà u so piacè, quiddu di i clienti o quiddu di l’amichi è di a famiglia, Lisa-Maria faci u so caminu. L’annu scorsu codda à Creazione, u fistivali di stilisimu in Bastia è incontra à Elisabeth Mattei, stilista corsa cunnisciuta. Una amicizia nasci è ancu una cullaburazioni!

Avemu fattu qualchì dumandi à issa dunnetta chì ci parla incù piacè.

Tempi: Aveti principiatu à 13 anni à cosgia è dopu issa passioni hè firmata senza difficultà?

L-M: À u niveddu di a me curpulenza era veramenti difficiuli pà mè di truvà vistiti è sapemu chì l’epica di u culleghju hè impurtanti pà una ghjuvanotta. Aghju dunqua dicisu di metta mi à a cusgera è finalmenti mi hà piaciutu tantu! aghju cuntinuatu.. parchì cumprà vistimenti quand’eddu si pò avè a gioia di fà criazioni?!

Tempi: Ch’eddu sichi pà voi o pà l’altri feti massi criazioni, quantu tempu pà una criazioni?

L-M: Si dipenda di a criazioni. Si pò metta un’oretta pà certi vistiti cum’è certi mi poni piglià 6 ori!

Tempi: Cosa diciarii à issa ghjuventù corsa, à i ghjovani à quali ci piaceriani à lampà si in un prughjettu è chì t’ani a paura di risicà si?

L-M: Diciariu à issi ghjovani ch’eddu ci voli à pruvà! Ci voli riscà è apra si à tutti l’arti pà accittà si di più è avè fiduccia in sè è in ciò chì no pudemi fà! L’avveni c’appartena!

Cum’è a dici Lisa-Maria, ci hè da fà, emi una bedda ghjuventù è a nostra isula ci dà 1000 tisori. Allora o ghjuventù corsa ùn ai paura è vai! Quiddi chì diciani ch’in Corsica ùn si pò fà nudda ùn cunnosciani micca issa ghjuvanotta piena d’energia è di sonnii. A scelta di dopu u liceu ghjunghja è Lisa-Maria ùn si lascia andà. A ringraziemu pà i so risposti, è li prighemi una bedda strada!

Ritratti: Laura Fanucci

Lasciate un cummentu ?

This site uses Akismet to reduce spam. Learn how your comment data is processed.