A surpresa di Netflix “3%” hè di ritornu per una stagione nova. Nove candidati à un tavulinu, trè minuti, nove cubi da fà, quellu chì ùn compie i cubi hè eliminatu, l’altri passanu. Infine, 97% di i candidati sò stati eliminati è si ne stanu nantu à u “cuntinente”, terra di viulenza è di miseria nera, l’altri si ne vanu in u Maralto, un’isula perfetta colma di ricchezza è di benistà. Benvenuti in u mondu crudele di 3%, a surpresa di Netflix di l’annu 2017, di ritornu per una stagione nova dispunibile dapoi u 27 d’aprile. Fattu à u Brasile da Cesar Charlone, realizatore uruguianu, 3% ci porta in un mondu induve e femine è i masci di 20 anni di u cuntinente devenu passà parechji esami chjamati Processo per sceglie i ghjovani ch’anu da pudè andà in u Maralto. 3% ci face vede una sucetà inghjusta chì lascia poche mubilità suciali cullenti chì ci ramentanu appena i cuntrasti di a sucità brasiliana
3% spone una sucietà inghjusta ch’autoriza poche mubilità suciali cullenti ricurdendu appena a dicotomia brasiliana
Ùn serà u fruttu di l’azardu s’è vo pensate à u Brasile guardendu à 3%. Stu mondu ricorda un’opposizione chì u populu brasilianu cunnosce bè. D’una parte, un mondu di lussu, incù apparechji d’alta tecnologia, piscine, vistitoghje di qualità è d’un’antra parte, un mondu induve si pò more per via d’una mancanza di medicine, induve ci sò favelas dapertuttu, induve u mottu hè “ognune per sè”. In fatti, incù un cuefficiente di Gini chì s’hè alzatu à 0,522 in u 2017 – Un indice di 1 vole dì una spartera inghjusta di a ricchezza, 0 una situazione induve ognunu hà u stessu patrimoniu – Sta seria pare tuttu un spechju di a sucetà brasiliana è m’hè veramente piaciuta sta sferenza maiò trà i dui “mondi” chì pare cum’è un colpu contr’à a crescita di e disugualità in u Brasile è in u mondu sanu.
In u mondu di 3% a meritocracia hè puntatu à u so stremu è i candidati sò pronti à fà n’importa chè per passà
In u mondu di 3% a meritocracia hè puntata à u so stremu è i candidati sò pronti à fà n’importa chè per passà e prove, cum’è scamattà per a prova, sabuttà o abbelenà l’altri candidati, fà usu di a seduzzione per pruvucà a scunfitta di l’altri. Tutt’i colpi sò permessi. S’assumiglia appena à u nostru mondu induve à ghjente sò pronti dinù à fà n’importa chè per passà i cuncorsi di l’alte scole o l’esami à l’università. U disprezzu di quelli chì ùn sò passati (sò 97% quantunque) hè onniprisente in e duie parte di a sucetà : quelli chì sò passati pensanu chì l’altri l’anu meritatu è quelli chì ùn sò passati pensanu esse indegni di u Maralto, corci senza valore. Quellu fattu hè impurtante : mostra perchè ùn hè tantu cuntestata sta sucetà. A ghjente anu assimilatu chè u Processo era a sola è leghjìttima manera di campà felici è l’ideulugia meritocràtica permette allora di fà accità à i corci a so pusizione inferiore. Cum’è assicura u capu di u Processo, Ezequiel “Site voi, chì custruite u vostru meritu, ciò chì si passerà serà meritatu”. Bensicura c’hè una chjuca resistenza di pettu à sta sucetà chjamata incù amuranza “La Causa”. Quessu ma appena disturbatu è, hè per me una debula di a seria, perchè mostra una oppusizione troppa manichea di issu mondu ; ma hè stata curretta in a siconda stagione à partesi di u quartu capìtulu.
Di più, sta seria hè assai intarassente perchè piglia u so tempu per sviluppà i persunaghji incù fundezza. Ogn’episodiu hè centratu nantu à un persunaghju maiò di a seria è mostra a so cumplessità. Cusì, i persunaghji ùn sò cunchiglie viote ma pieni d’umanità. A seria ùn hà a paura di rivultà tutalemente a situazione è ci sò parechje susprese per a siconda stagione.
Cusì, 3% incù a so imbienza strana è particulare hè un seria distòpica di primatrinca ancu s’ella hè fatta incù pochi soldi. Hè piuttostu bè scritta è realizata incù una prima stagione centrata nantu à u Processo è una siconda nantu à l’evoluzione di l’imbusche è un travagliu più impurtante nantu à l’universu è a so fundura. DA FIGHJULÀ. (in VO per piacè osinnò ti mettu una capata.)