Comu si diciarà « Filici anniversariu » in allimanu ?

Emmanuel Macron hè un omu chì vò andà à a lestra. U Prisidenti riforma a Francia com’eddu avia privistu di falla. L’Università, u bascigliè, u marcatu di u travaddu, i camini di farru, l’asiliu, a fiscalità di u capitali, a fiscalità lucali, a Custituzioni : a mudernizazioni ci hè in ogni locu. Malgradu l’uppusizioni chì si senti pocu è micca, u Prisidenti di a Ripublica apprufitta d’un mumentu d’attesa di i francesi chì fighjulani i so primi passi.
A sirinità di u Capu di u Statu ùn trova micca u listessu ribombu annantu à u restu di u Cuntinenti. U so prughjettu Aurupeistu si cunfronta à l’idei cuntrarii di certi attori impurtantissimi di a scena Aurupea. Sunniendusi in Washington aurupeu, Macron devi affruntà i pupulismi euroscettichi à Livanti, u Brexit, etc. Tandu, Emmnauel Macron ferma un aurupeistu cunvintu.

U solu aurupeistu di a campagna prisidenziali si prisintaia davanti à a piramida di u Louvre, sottu à i noti di « l’Ode à la joie », sinfunia di Beethoven divintata l’innu di l’Unioni aurupea. U so discorsu aurofilu à a Sorbonne dimostra a so visioni pulitica di l’Auropa.
Emmanuel Macron musciaia un veru agenda puliticu. I so idei erani : un bugettu di a zona euro è d’un Ministru di i finanzi, a creazioni d’un uffiziu aurupeu di l’asiliu è di una pulizza aurupea di i cunfini, una vera Auropa di a difesa o un’idea di listi trasnaziunali par 50% di i parlementari aurupei.
Issa tunalità federalista hè prisenti ind’u spiritu di u capu di u Statu. A rimissa in causa di l’Unioni è i so istituzioni, i vittorii di i partiti antiaurupei, u ricusu di a burocrazia, l’assenza di cuerenza ani rinfurzatu l’idea di custruì un novu prughjettu aurupeu. Emmanuel Macron ùn hà micca i limiti di Sarkozy è Hollande. Nicolas Sarkozy era custrettu d’agì par raportu à a vittoria di u « innò « à u referendum è François Hollande, era troppu debuli in l’atti.

Emmanuel Macron t’hà bisognu di l’Allimagna.
In lu so discorsu di a Sorbonne, Emmanuel Macron avia parlatu à Angela Merkel insistendu annantu à l’utilità di l’unioni trà Francia è Allimagna, com’edd’era u casu dapoi più di 60 anni.
Emmanuel Macron era cuntenti di sapè chì i membri di u partitu sucialidemocratu di a Germania aviani validatu u cuntrattu di Guvernu trà i cunservatori di a CDU dopu à sei mesi di parapidda è teni. A nova cualizioni era sbarrazzata da i più « euroscettichi », issendu quidda spirata da Macron.

Sfurtunatamenti, Emmanuel Macron duvarà aspittà prima di baddà u « schuchpplatker » (baddu tradiziunali bavaresu) incù Merkel. I dichjarazioni di u circondu di Merkel è di edda stessa ani rifritatu l’ardori d’un Prisidenti cunfruntatu à a raghjoni germanica.
Angela Merkel t’hà una scusa pà calmà u prisidenti francesi : a spada di Damoclès sopra à u so capu di a fragilità di a so maghjurità. Aldilà di Merkel, nimu in Allimagna ùn voli dà à Emmanuel Macron u successu puliticu di i so sogni. I parolli di u parlementariu di a CDU Alexander Dobrindt sicondu à i quali « ùn vidaria micca parchì accuntintaria à Emmanuel Macron u cori di u so prugramma puliticu » erani ghjunti fin’à u Capu di u Statu prima di dì un discorsu aspittatu davanti à i parlementari aurupei à u Parlementi di Strasburgu ?
Dananzu à u Parlamentu Auropeu, Emmanuel Macron hà prununciatu, pà a più grandi gioia di a maghjurità parlamentaria, i so dichjarazioni pà l’Auropa, hà vantatu i meriti di u mudellu economicu auropeu, smuntatu i brami d’unipochi pà i regimi illiberali in Auropa Urientali. In l’Assemblea, parechji sò d’accunsentu cù u discorsu prisidinziali, ma sò pochi quiddi chì u voni accumpagnà in a so avintura. I filicitazioni di l’emiciculu ùn sò micca un’apprubazioni ma sò quì pà incuraghjillu. Hè par quissa chì u mumentu impurtanti di a sittimana era u scontru in Berlin cù Angela Merkel, u ghjovi 19 d’aprili.
U prisidenti francesi hà ghjucatu di manera diretta à u cuntrariu di François Hollande chì avia circatu u sustegnu di u Mediterraniu cù l’Italia è a Spagna, da ùn passà pà l’Allimagna. Ma dopu à stu scontru, u prisidenti francesi ùn hè micca riisciutu à avè u sustegnu di Angela Merkel, chì ci era troppu sfarenzi : u ghjurnali allimanu u « Der Spiegel » hà parlatu di disincantu dopu à quillu scontru.

Emmanuel Macron vulia un bilanciu pà a zona euro da stabilì una sulidarità finanziaria trà i Stati, Angela Merkel prifirisci à mintuvà i scopi dati da u pattu di stabilità (3% di sbilanciu publicu, creghja publica sottu à i 30%) è hà insistutu annantu à l’esigenza pà i guverni naziunali di fà l’ecunumii di bilanciu è i riformi di struttura vulsuti. Una chjama à i paesi di u meziornu chjamata in Berlin « paesi di u Club Med » è à a Francia cannuchjulata da l’ordolibarali allimani par via di u so ritardu in stu duminiu. A pusizioni di Angela Merkel ùn hè micca una surpresa.
I so pusizioni ùn cambiani micca dapoi a crisa di a zona euro. L’Allimagna ùn vò più pagà i debulezzi di l’Italia, a Spagna o a Grecia allora ch’edda hà fattu tamanti sforzi in l’annati 2000 par avè una situazioni ecunomica stabuli. Angela Merkel avia dighjà rinsignatu u prisidenti francesi annantu à i so intenzioni senza metta bilanci auropei in lu cuntrattu di cualizioni CDU-SPD. Annegret Kramp-Karrenbauer, l’hà ditta franca è chjara « ùn era micca una bona idea ».
U gruppu di a CDU à u Bundestag vò prisintà un prughjettu di testu cù u so alliatu, a CSU bavaresa, pà riducia i pussibulità di u guvernu in li niguziazioni par l’avvena di a zona euro.
Com’è inde l’Auropa di a difesa o a gestioni di i flussi migratorii, i disaccordi trà i dui paesi sò impurtantissimi. A Francia ùn pò accittà u fattu chì l’Allimagna ùn pinsessi chè à edda.
L’Allimagna ùn hè micca prissata di sustena un muvimentu maiò d’armunizazione fiscali è suciali, spessu i paesi di u livanti, induva l’Allimagna t’hà i travagliadori ch’edda paga pocu pà so industria « made in germany ».
Inquant’à l’euro, ùn hà micca raghjoni di sustena un bilanciu di a zona euro chì li cunveni à u livellu di a muneta unica quandu i paesi di l’Auropa di u meziornu è a Francia devessani à u livellu in fatti di cumpetitività. È po ci vò à dì chì Allimagna ùn vinci tant’affari à accumpagnà una Auropa di difesa com’eddu a vò fà u prisidenti francesi, ciò chì avarà costi più impurtanti allora chì cù a prisenza nentru à l’OTAN è u paracqua auropeu assicureghja dighjà una difesa menu cara

Hè cusì chì Emmanuel Macron si trova davanti à a rialità di i cosi.
Prima d’essa pà l’Auropa, a cualizioni nova ditta « Groko » hè proallimana.
A prisenza di i sociodemucratichi ùn hè micca dinù un segnu di riescita sicura.
Emmanuel Macron sà chì i sociodemocratici allimani ani accittatu a guerra in u 1914 senza prublema quandu i sucialisti francesi spiraiani chì l’interziunalismu saria più forti chè u germanismu.

L’allimani pudariani ancu dì com’è Donald Trump « Germany First ». À Emmanuel Macron, li saria piaciutu un antru rigalu d’anniversariu pà a so prima annata à l’Elysée.

Leave a Reply