Pà a meza finale « andà » di a Champions League, s’affruntavanu Liverpool è Roma, duie surprese à stu livellu di a cuppa. E squadre anu fattu u spettaculu (5-2 pà Liverpool).
Pudiamu aspittà un match di i più scemi, Liverpool è u so attaccu Firmino-Salah-Mané ferma à nantu à un incontru eccezziunale contru à Manchester City à u giru innanzu ; a Roma è a so « remontada » contru à u FC Barcelona.
A Roma hà principiatu a partita in 3-4-3 cum’è contru à Barcelona, stu dispusitivu tatticu hà postu assai prublemi à i Reds i vinti primi minuti. Kolarov hà guasgi apartu a marca d’un calciu putente di i 25 metri.
Pocu à pocu, Liverpool hà ripigliatu a suprana è u controlu di u ghjocu, elementu subitamente vistu grazie à duie opportunità di Sadio Mané è Mohamed Salah chì hà permessu à Liverpool di piglià u largu incù dui « but ».
Dopu à quessa, sempre Salah hà datu duie passe decisive à Sadio Mané è Roberto Firmino ; u terzettu uffensivu di u LFC hà messu u focu à a difesa di a lupa, 4-0 pà l’inglesi. À nantu à un « corner » James Milner, Firmino parmissi d’ingrandà a marca, 5-0.
Ma a Roma ùn avia micca dettu a so ultima parolla mentre chì Liverpool era appena surtitu di u match, anu riduttu a marca grazie à Dzeko dopu à un fiascu di Dejan Lovren è à Perotti (penalty).
A Roma pò sempre pratende à una vittoria di fatti di i so 2 « but » marcati in Anfield
U ghjucadore di u match, Mohamed Salah
Impegnatu inde 4 di i 5 « but » di a so squadra, Salah hà messu à caternu a so anziana squadra di Roma. Un imbucimentu di u pede mancu è un punghju passatu sopra à u purtiere Alisson è duie passe pà Sané è Firmino.