Una vittoria pà u ritornu di Rodé

A lotta pà u mantenimentu in lega 2 cuntinuveghja, pà a 34 esima ghjurnata, u GFC Aiacciu ricivia u FC Tours in Mezavia. U Gazélec, 15 esimu di u campiunatu incù 38 punti prova à salvà u so capu mentre chì Tours hè dighjà cundannatu à ghjucà in Naziunale l’annu prossimu.
Dapoi qualchì ghjostra, l’omini d’Albert Quartier anu ritruvatu culori è affruntavanu ghjucadori cunnisciuti da i supporters di u gazélec : Mohamed Larbi, John Tshimbumbu è Rodéric Filippi, anzianu capitanu à faccia storica di u club.
“Forte” di a so vittoria contru à u FC Lorient, u FC Tours, ancu s’eddu ghjucarà in Naziunale 1, ghjoca a fine di a staghjone à tappu, una vera trappula pà u GFCA.
A ghjostra hà cuminciatu incù un livellu tecnicu debule è micca tantu spettaculare, u FC Tours ùn aspetta tantu tempu pà mette si in evidenza è mena à u but dopu à un’azzione custruita bè.
U GFCA subisce u ghjocu mentre chì Tours tene u ballò ma u Gazélec difende bè, Damiens Perquis in sintinedda davanti à a difesa partecipeghja à u ghjocu è si mostra sicuru, à u cuntrariu di Grégoire Puel, micca à u so vantaghju in u latu mancu d’una difesa à trè.
Ci vole à aspittà u 42 esimu minutu è qualchì centru pà vede u periculu in u but di Valentim (FCT), penalty cuncessu da u FC Tours è trasfurmatu incù calmu da Ibrahima Touré.
1 à 0 pà u Gazélec à a mità di u tempu.
Ripiglia a partita è subitu Ibrahima Touré parte ind’u spinu di a difesa di Tours, currendu più lestru cà Rodéric Filippi è marca torna una volta di l’internu di u pede drittu, 2 à 0 pà u Gazélec Football Club Aiacciu.
U match ripiglia u so calmu sin’à u 58 esimu minutu, u GFCA lampendu un attaccu à nantu à a so manca fendu un centru, chì ghjunghje ind’i pedi di Wesley Jobello chì marca. Jobello micca preziosu ind’u ghjocu ma à u locu bonu à u mumentu bonu. U GFCA si mette à l’aggrottu è vince 3 à 0.
Passanu i minuti è u GFCA s’addurmenta pocu à pocu, Tours ne prufetta à u 75 esimu pà marcà in u spaziu di riparazione, è torna volta à u 76 esimu minutu ; u GFCA hè surtitu di a partita è a difesa loscia. A surtita di Perquis 10 minuti prima ci hè pà qualcosa.
U GFCA si ripiglia è diventa appena più duru ind’i duelli è tene u risultatu sin’à u 90+3 minutu.

Vittoria di u Gazélec ind’u stadiu Ange Casanova di Mezavia, un’opara assai bona ind’a corsa à u mantenimentu.

Lasciate un cummentu ?

This site uses Akismet to reduce spam. Learn how your comment data is processed.