A vittura elettrica si piazza in u 2018, cum’è un’alternativa ecceziunale à a vittura à mutore termicu. In questu articulu, avemu da studià sta moda di a vittura elettrica ch’ùn pullueghja micca, è saparemu infine, s’edda hè un mezu impurtante pà fà piantà u scambiamentu climaticu.
Cume marchja stu tippu di vittura ?
U funziunamente hè « simplice », una batteria à u lithium crea l’elettricità è u mutore, custituitu di duie calamite, si serve di l’elettricità pà trasmette l’energia à e rote è fà avanzà a vittura.
A batteria
In d’altre parolle, appena di più pinzute à u livellu scientificu, a batteria accatamanzeghja l’energia, è e reazzione chimiche interne, producenu l’elettricità. Cum’è tutte e batterie, un’anoda lenta un elettronu è u manda à una catoda, hè una reduzzione. St’elementi sò piazzati in una cellula ; 4 cellule custituiscenu un mudulu. A batteria hè cumposta di 48 muduli è pesa guasgi 200kg.
U mutore
U mutore si sparte in dui elementi :
– Un « rotor » chì cuntene un curulu di ramu è chì gira
– Un « stator », cumpostu di parechje calamite, eddu ùn move micca.
Quandu u currente elettricu parseguisce u so caminu dopu à esse statu creatu da a batteria, passa pà u curulu » crea un campu magneticu, oppostu à quellu di una calamita.Una forza hè creata, u rotor si mette à girà è e rote dinò.
A vittura elettrica hà assai vantaghji, L’aveti capita, in a fasa scritta prima, a vittura ùn pullueghja micca, hè dunque pulita à stu livellu. Nè gaz, nè oliu, nè particule pulluente ùn sò produtte. D’un’antra parte, a vittura elettrica ùn face micca rimore quand’edda hè in marchja, un lussu ind’e cità.
Ma a vittura elettrica hà dinò assai scuvenienze, l’autonumia di e vitture elettriche hè assai debule, 300km, hè scarsu di truvà di più. U tempu pà ricaricà a vittura hè dinò assai impurtante, guasgi 8 ore. À u livellu economicu, u prezzu hè assai cunsequente, ancu pà i mezi di trasportu i più chjuchi. I più impurtanti fermanu i risichi elettrichi : i cavi à tensione alta sò spartuti inde tutta a vittura. Quessa pò rende di più difficiule l’intarvenzione di i spegnifochi, quand’eddi devenu caccià una parsona di a so vittura.
L’impatti eculogichi
A fabricazione di a batteria hè u principale fattore di pulluzione. U lithium, strattu da “saumures” chì si trovanu par esempiu, ind’u salar d’Atacama à u Chili (35% di a produzzione mundiale). I disguasti causati da a produzione di u lithium sò tremendi, pupulazione vegetale, animale sò distrutte. E pupulazione umane, campendu ci dapoi millaie d’anni sò ubligate à andà si ne, postu chì ùn si ponu più nutrisce è l’acqua hè cuntaminata.
U prucessu di fabricazione di e batterie si sviluppa, è diventa sempre di più una catastrofa eculogica, ind’u mondu sanu postu chì u Chili ùn hè mancu appena u solu paese à produce lithium. I paesi putenti, induve edde circuleghjanu e vitture, producenu l’elettricità incù u fuel, u nucleare o u carbonu, imbruttendu cusì l’aria è l’ambiente. U caricamentu di u mezu di trasportu ecologicu, ùn hè tantu pulitu in fatti.
I mullizzi, batterie anziane, mutori; ponenu un prublema di sicurezza, à partesi di u mumentu ch’eddi sò sciuti di u locu privistu par quessa, a vittura. I metalli pisinghji, solventi, cuntamineghjanu l’ambiente. I custruttori è altre imprese ligate à u sviluppu di i veiculi elettrichi, ùn s’impiseriscenu micca tantu di sta prublematica, ma certi cum’è Renault anu messu in piazza prugrami di riqualificazione di l’elementi di a vittura.
Pà compie st’articulu, chì parmette à a ghjente d’apre l’ochji à nantu à a verità di e vitture elettriche, si pò dì chì a vittura elettrica ùn hè micca pulita, ùn face chè mandà a pulluzione versu paesi produttori cum’è u Chili…
Stu tippu di vittura ùn hè micca pulita, avemu vistu chì durante a strazzione di u lithium, a pulluzione hè assai forte.