U rumantismu francese, ispirazioni, periodi è eredità.

U XVIIIesimu seculu hè statu un seculu impurtante per a Francia, è per l’Auropa. A prima rivoluzione dimucratica hè accaduta in Corsica in u 1729, è dopu cù a prima custituzione dimucratica di a storia in 1755, l’isula hè diventata un ogettu cintrale in a difesa di i diritti di l’òmini, di a libertà. Stu seculu hè caratterizatu da u sviluppu di un muvimentu chjamatu I Lumi, chì difindia a raghjò, a libertà individuali, a raziunalità : vene à dì vede u mondu cù l’ochji aperti di citatinu inchjaritu. In u listessu tempu, s’hè sviluppatu in Francia un muvimentu chì lasciava a piazza à i sintimi, à l’amore, à a libertà di l’imaginazione, di u sonniu, di pettu ghjustamente à quella raziunalità di I Lumi. Hè natu, l’avemu vista in u primu articulu, in Allemagna. Per capisce u rumantisimu francese, u pudemu spiccà in trè periodi di rumantisimu, è nanzu un periodu di prerumantisimu.

U prerumantisimu hè statu influenzatu da a literatura inglese è soprattuttu da Shakespeare, Samuel Richardson è Henry Fielding, da u rumantisimu tedescu, ma dinù da i pueti francesi di u medievu cum’è Villon, Marot o Maurice Scève. St’ultimu pueta hè un puntellu maiò di a puesia di l’amore di u Risorgimentu, un esempiu in u decinu 65 p 88, chì face entre u travagliu di a retorica in u discorsu innamuratu :

Continuant toi, le bien de mon mal,

A t’exercer comme mal de mon bien,

J’ai observé, pour voir ou bien ou mal,

Si mon service en toi militait bien.

Mais bien connus appertement combien Mal j’adorais tes premières faveurs.

Car savourant le jus de tes saveurs,

Plus doux assez que Sucre de Madère,

Je crus et crois encor tes deffameurs,

Tant me tient sien l’espoir qui trop m’adhère.

Ùn bastanu micca st’influenze per spiegà a nascita di u rumantismu francese ; c’hè un omu, Jean-Jacques Rousseau – quellu chì hà tantu sustinitu a lotta corsa in altre uccasione – in u 1762 incù u rumanzu La Nouvelle Heloïse, chì dà una piazza à i sintimi è a l’emuzione, chì permette à stu muvimentu culturali di sviluppassi è di sprimesi in Francia, in un periodu di raziunalisimu.

a) A prima generazione : 1800 – 1820

A nascita di u rumantisimu in Francia hè ligata di manera chjara à a rivoluzione di l’89. A riazzione vene da una literatura di l’imaginazione, di u lirisimu, incù Chateaubriand è Germaine de Staël, nobili chì campanu allora in e ruvine di u so mondu. In u 1802, Chateaubriand publicheghja René, rumanzu induve si definisce “u mali di u seculu”, fendu d’ellu u portavoce di una sensibilità nova.

b) Siconda generazione è affirmazione di u rumantismu : 1820-1830

Storicamente, ghjè a fine di l’Imperu di Nabulioni, chì preferia a literatura classica, fendu esilià si per esempiu de Staël. Musset, discrive un periodu annuiosu, quella di una nova monarchia alluntana assai da “l’epupea nabuleonica”, in Les confessions d’un enfant du siècle publicatu in u 1836. I rumantichi s’urganizeghjanu allora ingiru à Nodier è Hugo, cù una pruduzzione ideologica (libri teorichi, manifesti). Rivindicheghjanu a libertà di l’arte, s’opponenu à u classicisimu, à l’estitica nurmativa di i periodi literarii passati. 1820 hè dinù l’annu di a publicazione di Les Méditations di u famosu pueta Alphonse de Lamartine, opara di sensibilità sincera è fremente.

c) Terza generazione, dillusione è “picculu rumantisimu”

Chjamatu aspessu picculu rumantisimu o rumantismu minore, u currente di Théophile Gautier è Nerval, chì mette in valore l’idea di rivolta in l’arte. Dopu à a dillusione di a Munarchia di lugliu, sti novi rumantichi anu un successu maiò, ma si stanca l’iniziativa in una sensibilità esacerbata. Flaubert, natu in u 1821, ammiratore è lettore di i primi rumantichi sarà un nemicu in tutta a so opara di stu currente. Ancu Baudelaire, iniziatore di u simbolisimu (averemu prestu l’occasione di parlanne), chì hà lettu è s’hè ispiratu di i rumantichi, s’alluntana da ‘ssu currente.

Infine, ingiru à u 1850, a puesia si trasfurmeghja, è in u listessu tempu, tutta a literatura. U tempu di l’esaltazione hè daretu à noi ; a puesia ùn hè più solu persunale, s’impegna di un spiritu scintificu, cerca à rende l’idea generale d’intelligenza piuttostu cà l’accidenti sintimentali di a vita individuale. A direzzione di l’ispirazione, di l’estru artisticu, si sposta da u core à u spiritu, per sorte da u sè è andà versu forme stabile. Vigny ricumparisce, per sguassà a pussibilità di un “eiu”, a particularità di a sperienza intima (Les Destinée, 1864). L’igoisimu passiunale di u rumantismu hè mortu, rimpiazzatu da u naturalisimu. U rumantisimu hà lasciatu un’orma indelebile in l’arte francese, è parlendu di literatura, ch’ellu sia u simbolisimu di Baudelaire, Cros, Corbière o u naturalisimu di Zola, sò tutti stati influenzati da u rumantisimu. Da una riazzione à u spiritu di i Lumi, à u “mali di u seculu”, hà traversatu un seculu (1762-1850), sempre in rivolta, sempre circhendu à crià forme d’arte nove, manere nove di vede a criazione.