Pierre Bourdieu, un pensamentu sempri vivu

Sarà forsi u suciologu u più impurtanti di u vintesimu seculu, ricunnisciutu da u mondu sanu, a so pinsatahà circatu mentri anni è anni à smuntà i meccanisimi suciali. Riflittendu suprattuttu à u fenomenu di ripruduzzioni di i classi suciali, Pierre Bourdieu, da a so riflissioni hà datu à a suciulugia muderna cuncetti chì permettini di spiegà certi cumpurtamenti umani da l’urigina suciali.
 
Mentri un’intervista Pierre Bourdieu pruponi a funzioni prima di a suciulugia : palisà ciò ch’hè piattatu, cum’è a viulenza suciali.  I cosi palisati da a suciulugia sò suttintesi, una scuparta suciulogica pidda sempri un effettu di denunziazioni chì a ghjenti ignuraiani, è ch’ùn voni micca ricunnoscia. Bourdieu parla dunqui d’un spaziu invisibili, induva u capitali suciali, ecunomicu è culturali d’un omu cambia trà i mezi suciali d’urigina.
 
Ci voli nanzu à mustrà chì certi di i so elementi biugrafichi anu ghjucatu nant’à a so opara suciulogica. Bearnesu d’urigina, Pierre Bourdieu nasci in 1930, fiddolu d’un funziunariu di i posti è d’una famidda d’urigina pasturali. Dopu à un passaghju a u liceu famosu Louis Le Grand in Parigi, hè ricivutu à u cuncorsu di l’ENS è dopu passa l’agrigazioni di filusufia in 1955 ; Pierre Bourdieu hà campatu in un mezu suciali ch’ùn era micca u soiu, custituitu soprattuttu di ghjenti ch’iddu chjamarà « l’eredi » in la so opara.  Era una vera impressioni di stranezza ch’iddu sentia, incù u sintimu d’ùn esse micca à a so piazza.
 
Bourdieu hà vistu chi l’omi erani impatruniti da una ierarchia suciali, hà circatu l’urigina di a duminazioni suciali d’un puteri nant’à d’altri classi. Stu puteri campa in i « strutturi » chì s’imponini à l’omi, pò esse a duminazioni culturali, o a duminazioni d’un gruppu nant’à l’altru (u masciu nant’à a donna pà esempiu). Sti duminazioni si facini di manera ughjettiva, incù a forza. Piddemu l’esempiu di i segregazioni razziali in Africa Suttana mentri u vintesimu seculu, i parsoni neri erani furzati da i leghji à aduprà un statu inferiori à i bianchi.

D’appressu à Bourdieu, sti principii ughjettivi nascini d’una visioni di u mondu chi sarà tandu sughjettiva, è chi agisci nantu à a struttura mentali noscia, in cunsequenza certi fatti suciali cunsiderati cum’è nurmali, nurmali ùn sò. Piddemu cum’è esempiu a scelta di i studii trà masciu è donna, ogni parsoni pensa fà una scelta libara, ma di manera incuscenti i nosci vucazioni prufessiunali sò ligati à certi riprisentazioni sessuali. Si truvarà ancu più donni in psiculugia, scenza di l’anima, di l’intimu è di a casa chì in suciulugia, scenza di a  pulitica, di u puteri. I meccanisimi d’urientazioni bogani i ghjenti d’una parti o di l’altra in funzioni di a riprisentazioni suciali.
 
Avemu vistu chì l’omi poni aduprà certi cumpurtamenti incunscenti in funzioni di a sucetà, a manera di parlà pà esempiu, incù o senza accentu hè trasmissa da a sucetà in qualessa campa l’omu. Bourdieu pensa chì i cumpurtamenti suciali sò inerenti à ogni omu parchì venini di i so parenti, di a so famidda. U suciulogu parlarà allora d’una nuzioni nova, quidda di l’Habitus, propriu à tutti è chì cambia in funzioni di u mezu suciali o di l’educazioni.
 
L’habitus, cum’iddu spiega Bourdieu, si vedi in i pratichi cutidiani, hè custruitu da un patrimoniu suciali è culturali,  iddu rinforza a cundizioni parsunali chì hè u statu suciali.  Ogni parsona hè dunqui scritta in un gruppu datu, scavendu u scartu trà i categurii suciali. L’Habitus hè cum’è una storia scritta in lu corpu : a manera di vestasi o i gesti rispechjani a cundizioni suciali noscia ; U fiddolu d’uvrieri ùn avarà mai u listessu Habitus chè u fiddolu di nobili, parchì i  so parenti ùn ani micca trasmissu i listessi capitali suciali, ecunomichi è culturali. Ogni omu ricevi dunqui una parti di sti capitali da a so famidda. U capitali suciali, ghjè cum’è un librettu d’indirizzi chì cambia trà classi suciali, u librettu d’indirizzi d’un babbu capu d’impresa sarà più intarissanti pà principià a vita attiva chè quiddu d’un babbu uvrieru. U capitali ecunomicu raprisenta u patrimoniu chì sarà trasmissu è infini, u capitali culturali difinisce a manera d’apprizzà u sapè, a cultura in funzioni di certi cumpurtamenti tramandati da i parenti. U capitali culturali d’un ziteddu ch’avemu avvizzu à i musei, à a lettura è à d’altri pratichi artistichi ùn avarà u capitali d’un ziteddu lasciatu davanti a televisiò  a ghjurnata sana.
 
Pierre Bourdieu mostra bè chì no semu determinati da un mezu suciali sfarentu, trasmettendu una certa visioni di u mondu, chjamata l’Habitus è chì forsi ùn cambiarà mai. Sarà sempri pussibuli di passà d’un mezu
uvrieru à un mezu più ricchu, ma issu Habitus chì hè inerenti à ogni omu ùn sparisciarà micca, malgradu u fattu d’amparà cumpurtamenti novi. A sfarenza trà l’habitus di i classi pò essa una surghjenti di viulenza suciali quandu certi codici ùn sò micca rispittati. Sta viulenza poni u prublema di l’integrazioni trà i mezi suciali, in particulari pà i ziteddi chì ghjunghjini à a scola incù capitali ineguali. Pierre Bourdieu hà anzituttu criticatu u puteri d’integrazioni di a scola republicana, chì oghji ùn permetti più di sguassà l’inegalità trà mezi suciali.

Leave a Reply