L’affare Skripal

L’affare nasce da ch’elli sò avvelenati, u 14 marzu in Salisbury, un anzianu spione russu  Sergueï Skripal è a so figliola Youlia cù un gasu neurotossicu.

U Regnu Unitu accusa a Russia d’avè cumandatu st’attuscamentu. In un primu tempu, Theresa May, a prima ministra brittanica, avia spulsatu tandu, vintitrè diplumatichi russii è piantatu e rilazione cù a Russia.

Pè sustene a pusizione di Theresa May, i Stati Uniti, u Canada è sedeci paesi di l’Unione Auropea, cum’è a Francia, l’Allimagna, i Paesi Bassi è a Pulogna, anu annunciatu luni 26 marzu a spulsione di centu è sedeci diplumatichi russii. U campu uccidentale ùn avia micca altre suluzione chè di reagisce di manera ferma. Ancu s’elle sò simboliche ste spulsione, dicenu quantunque di manera franca è chjara chì Moscù hà francatu a linea rossa, utilizendu pè a prima volta dapoi a Siconda Guerra mundiale un’arma chimica nant’a tarra auropea.

Vladimir Putin hà misuratu a capacità di reazzione di i paesi uccidentali ch’ella sia cù l’intervenzione in Ucraina, l’annessione di a Crimea, u so rolu in Siria o cù u so impegnu pè l’elezzione americane. Sta volta, l’affare Skripal hè l’affare di troppu.

Quessa a misura, tocca più di trenta diplumatichi in l’Unione Auropea, in più di i vintitrè diplumatichi digià spulsati d’Ingliterra. Ma, sicondu u presidente di u Cunsigliu Auropeu, Donald Tusk, misure in più ùn sò micca impussibule in i ghjorni o e settimane à vene.

A Francia è l’Allimagna anu annunciatu a spulsione di quattru diplumatichi postu chì a Russia ùn hà micca spiegatu l’attuscamentu di Sergueï Skripal.

L’Italia, u Danimarca è i Paesi Bassi spulsanu tutt’è trè, dui diplumatichi. A Finlanda, a Svezia è a Croazia ne spulsanu ognunu unu.

Certi paesi chì facianu parte di l’URSS cum’è a Pulogna, l’Ucraina, a Republica Cecca è i paesi balti (Lituania, Estonia, Lettonia) anu annunciatu anch’elli a spulsione di diplumatichi russii. L’Ucraina hè a l’iniziu di e misure principale, per via di l’annessione di a Crimea da a parte di a Russia quattru anni fà, è hà decisu di spulsà tredici diplumatichi.

I Stati Uniti sò quelli chì spulsanu u numeru u più maiò di diplumatichi. Quarantottu aghjenti di rinsingnamentu cunnisciuti da u Cunsulatu di a Russia in Seattle è dodici di a missione russa à l’Organizazione di e Nazione Unite (ONU) anu sette ghjorni pè andassine da i Stati Uniti. A Casa Bianca hà dichjaratu ch’ella hè pronta à avè rilazione più appaciate cù a Russia, sì u guvernu russiu cambia di cumpurtamentu, è chì ste misure sò e cunsequenze di e viulazione di e norme internaziunale da a Russia. L’imbasciadora di l’ONU, Nikki Haley, hà affirmatu chì « a Russia si ghjova di e Nazione Unite cum’è un rifugiu pè attività periculose à l’internu di e nostre cunfine ».

In Australia, u primu ministru Malcom Turnbull hà dichjaratu chì dui diplumatichi russii eranu aghjenti di rinsignamentu micca dichjarati è dunque ch’elli avianu sette ghjorni pè parte.

U Canada hà decisu di spulsà quattu diplumatichi russii di l’imbasciata d’Ottawa è di u Cunsulatu generale di Montréal.

Di più, u Regnu Unitu ùn parteciperà micca à a Cuppa di u mondu di football in Russia è po l’Islanda hà annunciatu luni 26 marzu u boycott diplumaticu di sta cumpetizione, urganizata da u 14 di ghjunghju à u 15 di lugliu.

Moscù dice ch’ella ùn hà tanta primura di st’attuscamentu, è mette in causa l’alleati di u Regnu Unitu chì seguitanu u principiu di l’unità euroatlantica senza circà a capì è avè una discussione cù a Russia. È, Moscù dice dinù chì a Russia, chì hà digià spulsatu vinti trè diplumatici brittanichi è chjosu u British Council, hà da risponde à ste splusione.

I paesi uccidentali anu sceltu ghjustu à puntu di punisce a Russia pocu à pocu pè priservà a discussione cù Moscù.

È l’affare ùn sarà compiu fintantu chì a Russia ùn averà datu spiegazione nant’à l’attuscamentu di Sergueï Skripal. E cunsequenze diplumatiche puderianu esse veramente gravissime sì sta crisa ùn s’arriguleghja micca in furia.