Catalunia: Storia, Pulitica è Pruspettivi, 2/2

Dopu à a morti di Franco, u 20 di nuvembri di u 1975, è a caduta di u righjimu dittaturiali, u novu rè di Spagna, Juan Carlos u Primu, faci di u paesi un paesi dimucraticu. U guvernu righjunali Catalanu hè ricriatu in u 1977, incù à u so capu u prisidenti catalanu in esiliu. A custituzzioni dimucratica di u 1978 faci di a Spagna un paesu à mità federalu, chì t’hà diciasetti cummunità autunomi. Trè ani un statutu particulari : u paesi bascu, a Galice è a Catalunia. In u 1979, a Catalunia utteni un novu statutu d’autunumia righjunali, duranti à un rifarendu appruvatu da 88,1 % di i vutanti. I Catalani anu allora avutu cumpintenzi à u liveddu di l’educazioni, di a saluta, ma dinù à u liveddu di pulitica linguistica è li permetta allora di crià una pulizza autunoma.

Dopu à un puteri di dritta chjosu à tutt’avanzata pà a Catalunia, i sucialisti ani principiatu à fà mova i cosi in u 2006, aduprendu un statutu indipinditistu catalanu. Ma i spirenzi d’un avvena più chjaru pà u rughjonu spagnolu spariscini quandu, dopu à l’aduzzioni di u testu pà Madrid, è dopu à un rifirendu catalanu, u statutu s’hè ritrovu indè ciò chì a ghjenti chjamaia « u curridori di a morti », colpa à u ricorsu à u partitu pupulari à u tribunali custituziunali. In u 2010, parechji articuli impurtanti di u statutu sò stati cinsurati, frà i quali a ricunniscenza di una nazioni catalana è a primura di a lingua catalana, colpa à u partitu pupulari (dritta) di Marino Rajoy. « Sta dicizioni hè stata vista cum’è un agrezzioni ghjuridica in Catalunia », dichjara Joan B. Culla. Millioni di Catalani falani in carrughju da manifestà a so malcuntenzza. Tandu, l’idea d’indipindenza hà da essa palisata pocu à pocu è, in u 2012, cintinai di middai di manifistanti alzani banderi catalani è falani in carrughju, una volta di più. « Madrid hà pinsatu ch’eddu era un miragiu, spiega Joan B. Culla, ma sò luntani da a verità. Ancu i parsoni pocu pulitizati anu cummenciu à rivultà si contru à Madrid dopu à a crisa icunomica ».  Un dialogu di cionchi trà a balia catalana è i madrileni hà isciutu à un desideriu d’indipindenzi senza pari. A Catalunia urganizeghja u primu rifarendu in u 2014. Pà u statu spagnolu, stu rifarendu hè vistu cum’è anticunstituziunali. I risultati di stu rifarendu sò senza pari : guasgi 80 % di i vutanti (35% di participazioni), sia 1,8 millioni di Catalani, volini l’indipindenza. Pocu tempu dopu à u rifarendu, i partiti indipindintisti diventani maghjuritarii pà a prima volta, u 27 di sittembri di u 2015.

U 9 di nuvembri, u parlimenti catalanu metti in baddu un prughjettu di criazioni di un « Statu Catalanu », à u più tardu in u 2017. A corti custituziunali spagnola abroga a risuluzioni aduprata da l’eletti catalani. U 9 di ghjunghju di u 2017, Carlu Puigdemont, prisidenti di u rughjoni dapoi u 2016, dichjara a criazioni d’un rifarendu d’autoditirminazioni u primu d’uttrovi. Allora chì Madrid hà dettu chì u scrutinu era anticustituziunali è illegali, u 6 di sittembri, u parlimenti righjunali passa sopra à Mariano Rajoy aduprendu a leghji è urganizendu u votu. U 12 di ghjunghju, a pulizia t’hà l’ordini d’agiscia contru à l’autorità, funziunnarii o particulari, pà impidiscia stu rifarendu « illegali ». Malgradu l’amendi forti dati à 24 raprisintenti di u rifarendu, u prughjettu ùn si tralasciarà mai. 2 315 lochi da vutà pà u rifarendu sò criati, pà fà chì i catalani pudessini bè vutà. Guasgi 10 000 guardi civili ghjunghjini in Barciloni. A dumenica 1ma d’uttrovi, middai di Catalani votani è l’indipindenza vinci incùu 90,18% di i voti. Viulenzi da u statu anu caugiunatu baruffi, fendu allora dicini di feriti.

L’eletti catalani anu dichjaratu l’indipindenza catalana u 10 d’uttrovi, ma l’anu suspesa u tempu di discorra incù Madrid. U 27 d’uttrovi, u parlimentu catalanu dichjara l’indipindenza. U guvernu cintrali rispondi criendu novi alizzioni è mettendu u rughjoni sottu tutela. Minacciatu d’essa imprighjunatu pà u mutivu di ribiddioni, u prisidenti naziunali, smissu da i so funzioni, Carlu Puigdemont, fughji pà Marseglia, eppo pà a Belgica. U 3 di nuvembri di u 2017, qualchì ora dopu à avè dettu ch’eddu era à prò d’essa candidatu à l’alizzioni di u 21 di dicembri in Spagna dapoi Bruxelles, induva Puigdemont hà trovu ricoveru, a Spagna crea un mandatu d’arrestazioni aurupeu contru à Carlu Puygdemont. A dumenica 25 di Marzu di u 2018, hè statu aristatu in Allimagna, vicinu à a fruntiera di u Danimarca. Luni u 26, hè statu prisentu à un ghjudici. Manza di catalani, amparendu a nutizia, sò falati in carrughju, in i Ramblas, briunendu « Libartà pà i prighjuneri pulitichi » ò « Puigdemont u nostru prisidenti ». I militanti anu ghjitatu ovi, butteglii, inferriati, è ancu ruminsulaghji contru à a pulizia, chì anu utilizatu colpi di matrachi è tiri in l’ariu da calmà i militanti. Si dici ch’eddu ci saria statu 90 parsoni feriti, incù 22 pulizieri drentu. Oghji chì ghjè oghji ùn avemu micca di più infurmazioni di pettu à u ghjudicamentu di Puigdemont, tocca à l’Allimagna o di pruteghja lu, o di rinvià lu in Spagna pà ch’eddu sia, podassi, imprighjunnati. A fughjita di Puigdemont è l’urganisazioni di u rifarendu d’autoditirminazioni sariani passibili di trent’anni di prighjò sicondu à u guvernu spagnolu.

Ma chì accadarà dumani ? In i settimani à vena, ùn sarà micca quistioni d’indipindenza, nè menu d’ivuluzioni instituziunali, ma di l’avvena di Puigdemont, s’eddu hà da essa libaratu, estradatu versu à a Spagna per un ghjudicamentu, o allora s’eddu hà da stà in sta situazione tesa, sta situazioni incerta. È, parlendu di rilazioni internaziunali è d’upposizioni trà paesi, ghjè aspessu a via prediletta. Di più, s’hè messa à mezu l’UNU (Urganizazioni di I Nazioni Uniti) è a Cummissioni di i Diritti Umani, dichjarendu ricevibili u ricorsu prisintatu da Carlu Puigdemont, chì hè par avà sempri imprigiunatu in Allimagna. Sapemu, incù a spirianza, chì i situazioni cusì participeghjani à a criazioni di simbuli, fendu allora di Puigdemont un martiriu puliticu, una figura impurtanti di pettu à issa Spagna ch’ùn voli rispettà a dimucrazia, è sarà forse u sintimu di u populu catalanu. A più long’andà, sarà diterminanti a riazzioni di a cummunità internaziunali, a Spagna ùn avendu micca una putenza abbastanta pà perdurà à una dicizioni di a cummunità internaziunali. L’altru latu impurtanti hè quiddu di l’icunumia : a Spagna hè sempri in difficultà postu chì a Catalunia hè ricca : t’hà un portu tamantu, un’apartura nant’à u mediterranu, a Francia, u Paese Bascu… Sì cuntinuemu annantu à stu caminu, quiddu d’una Spagna debuli, è d’una Catalunia ricca, chì t’hà Barcilona cum’è cità culturali, icunomica è storicari di l’Auropa, sarà forse à u prufittu di u guvernu indipindintistu, postu chì averà incù eddu una pupulazioni sempre criscenti, è chì ùn capisciarà mai parchì i so vulintà ùn sò mai stati rispitati. À prupositu di l’ambienti internaziunali, i paesi d’Auropa, chì poni metta si à mezu à a situazioni attuali, frà i quali a Francia, l’Ingliterra, l’Allimagna è l’Italia, ani tutti prublemi d’indipindintisimi in i so tarritori ; ani tutti appena paura, sprimata di manera di più o di menu intensa, di u separatisimu, di manera filusofica di rimessa in causa di i Stati-Nazioni, di ciò ch’eddi sò pà dilla chjara. Ùn ani nisunu intaressu à sustena a Catalunia. Prima parchì a Spagna hè un’allianza icunomica strà impurtanti, è dopu parchì ùn volini micca chì l’asempiu di a Catalunia sia ripresu pà a Corsica par asempiu, o pà a Sardegna, a Scozza ecc. Di più, sia in a tradizioni filusofica o in l’intaressu puliticu, i Stati-Nazioni ùn ponu fà un veru passu versu à a Catalunia ; allora i cosi cambiani, ani sempri cambiatu, ma sta volta, l’affari ùn pari micca troppu accuncivuli. Demu allora tempu à a demucrazia, à a paci è à a discussioni trà i putenti, è l’accunsentu vinarà da par eddu, forse, di a Spagna è di a Catalunia, parchì, pà ognunu, pà a dimucrazia, pà l’Auropa, pà i populi spagnolu è catalanu, ani forse, a spiremu, di dà st’accunsentu quì, quiddu di a libartà, è di a dimucrazia, à u populu catalanu.

 

Leave a Reply