A Catalunia hè un rughjoni di Spagna, chì si trova à u livanti di u paesi. Ghjè a prima putenza spagnola, è dinò a più attrattiva, grazia à a so « capitali » : Barcilona. Dapoi qualchì mesu, a so situazioni pulitica faci parlà d’edda. Di fatti, una parti maiò di stu rughjoni voli l’indipindenza di a Catalunia, ma u statu si upponi di manera forti. Ci sò stati tandu manifestazioni, alizzioni è rifarendi pà chì u populu Catalanu pudessi sprima a so upinioni nantu à di l’avvena di l’isula. St’articulu hà da trattà di u naziunalisimu Catalanu, cum’eddu hè natu, a so storia dapoi st’ultimi seculi, ma dinò di a situazioni attuali di a Catalunia è di a Spagna, eppo di l’avvena è di ciò chì pudarà accada à a Catalunia.
U naziunalisimu Catalanu ùn hè micca natu arrimani, ma campa in Spagna dapoi seculi è seculi. A storia muderna catalana principia à a mità di u XIXesimu seculu. Di fatti, a « Rinascita » hà monda marcatu a Catalunia. U sturianu Benoît Pellistrandi dichjara, inde u so libru Storia di Spagna, da i guerri napuliuniani sinu à oghji, chì ci hè statu “un svegliu culturali è storicu in giru à a Catalunia. Par asempiu, a lingua catalana hè diventata una lingua literaria, allora chì era solu urali.” Pà custruiscia stu naziunalisimu catalanu, l’abitanti di u rughjoni ani da fà u riacquistu di l’avvinimenti maiò di a storia. U rumantisimu di u XIXesimu seculu hà da trasfurmà i dati storichi di a Catalunia in avvinimenti è festi naziunali. Par asempiu, in u 1886, a prima « Diada » hè festighjata è mintuveghja l’11 di sittembri di u 1714, quandu Barcilona hè cascata in mani di u rè di Spagna Filippu V di Burbò, è chì era u bisfiddolu di u rè francesu Lavighju XIV. Sin’à a fini di u XIXesimu seculu, sta ghjurnata ùn era mai stata festighjata ; hè stata prima ripresa di manera accantata, ma hè stata pianpianinu aduprata inde i discorsi pulitichi, sin’à diventà un ghjornu fistivu à parta si di l’annati 1980. In u 2012, pà a prima volta, l’istituzioni catalani ani chjamatu à manifestà è ani addunitu cintinai di middai di parsoni l’11 di sittembri. Pà i Spagnoli, sta data raprisenta un simbolu, a data induva u statu Spagnolu hà presu a cità : « In u 1714, a Catalunia hè stata vinta è u rè di Spagna l’hà casticata caccendu li a so suvranità pulitica. L’unificazioni di a Spagna s’hè fatta incù l’armi. », dichjara u sturianu catalanu Joan B. Culla. Di fatti, l’indipindintisti catalani ricusani sta data quì, è allora, pocu à pocu, u naziunalisimu catalanu s’hè missu in baddu.
L’innu catalanu « Els Segadors » hè statu criatu in u 1899. Una volta di più, ghjè una rifarenza di a storia catalana. Di fatti, mintuveghja a rivuluzioni di u 1640, « vinta » da Madrid. Eppuri, ùn hè micca un innu di u XVIIesimu seculu, ma i Catalani ani vulsutu ripiddà u mumentu di a divisioni trà a Spagna è a Catalunia. À parta si di u XXesimu seculu, u naziunalisimu catalanu hà da nascia à u niveddu puliticu. U primu partitu naziunalistu catalanu nasci in u 1901. Un statutu propiu Catalanu hè statu scrittu in u 1932, cuncidendu à i catalani un autunumia, ancu s’eddu hè statu ricusatu da a guerra civili di Spagna (1936-1939), è da a dittatura di Franco. Parechji volti, Franco hà da sdrughja tutti i sforzi catalani, piantendu allora l’autonumia catalana, in u 1939. Sinu à u 20 di nuvembri di u 1975, i partiti indinpindintisti sò pruibiti è casticati, in Catalunia o in altrò. U Castillanu essendu ubligatoriu, nun si parla u catalanu chì in privatu, incù l’amichi o a famidda. Si metti allora in baddu un’identità catalana grazia à …. U « football », è a squadra di u FCBarcelona, chì diventa un veru mezu d’affirmà un’identità cumuna. In a siconda parti di st’articulu è dopu à st’ “introitu” culturali è storicu, parlaremu di a situazoni attuali, di l’ivoluzioni pussibuli in giru à l’Auropa è di punti cintrali cum’è l’icunumia.