A puvertà in Corsica

A puvertà hè a prupurzione di persone chì anu un livellu di vita inferiore à ciò chì no chjamemu u principiu di a puvertà. Stu principiu di a puvertà hè definitu da i sfarenti livelli di vita di tutta a pupulazione di u paese.

In u 2014 stu principiu di a puvertà era 1018€ à mese.

Trà u 2012 è u 2014 a puvertà in Corsica hà stagnatu ma a Corsica ferma a regione metrupulitana a più tuccata. U so livellu di puvertà face parte di e medie di puvertà e più grande.

Cum’è à u livellu naziunale, sò e famiglie cù un solu parente e più tuccate. Ma l’anziani sò tuccati dinù. À u primu di Ghjennaghju 2016, pè 100 abitanti di 60 anni o più, ci era 9,8% allucatarii in u Pumonte è 8,8% in u Cismonte, sti sciffri sò superiori à i sciffri d’altri dipartimenti di Francia metrupulitana, a media francese hè di 3,3%. E famiglie lucatarie sò dinù assai tuccate.

D’altronde, u Cismonte hà in prupurzione, livelli di precarità più grandi chè u Pumonte è a media di a Corsica.

I livellu di puvertà i più grandi in Corsica sò quelli di a piaghja urientale, quantunque a cumunità di cumuna di l’Uriente vede u so livellu di puvertà scresce di 1,5 puntu à l’annu. Ma, a cumunità di cumuna di e Cinque Pieve di Balagna vede u soiu cresce di 2 punti.

Spessu, a puvertà hè legata à u sopradebitu. Ma a Corsica hè quantunque menu tuccata da stu fenomenu chè l’altri rughjoni francesi. In u 2016, ci era 219 cartulari pè 100 000 abitanti pè 368 in Francia metrupulitana. Ci hè una calata di 18,5% pè l’isula.

Cum’è pè u sopradebitu, si pò dì chì i corsi ricevenu menu prestazioni suciale chè l’altri rughjoni. In u 2015, 37,3% di a pupulazione corsa ricevia un allucazione di a cascia di l’allucazione familiale (CAF). Trà l’allucatarii di a CAF, 46034 sò ghjente chì campanu sott’à u principiu di a puvertà.

Tuttavia, a ghjente chì hà u rivenutu di sulidarità attiva (RSA) hè sempre più numarosa dapoi u 2012, cù una crescita di settembre di u 2016 di più di 13,6%. Di fatti, ci hè 1550 famiglie chì toccanu u RSA.

Di grazia, di settembre di u 2017 ci hè una calata di guasi 200 allucatarii pè l’annu.

Pè ciò chì tocca à a cuverta malatia universale cumplementaria (CMU1 ), in quattr’anni 3267 corsi in più anu benefiziatu di a CMU. In u 2016, ci hè 3000 benefiziarii di più in u Cismonte chè in u Pumonte. Pè ciò chì tocca à l’aiutu à a cumplementaria di saluta (ACS2 ), a Corsica vede 6009 benefiziarii di più in u 2016, è dunque 3,1% pè un annu.

U livellu di disimpiegu in Corsica hè sempre più grande chè quellu di a Francia metrupulitana. A Corsica hà cunnisciutu una prugressione di a pupulazione attiva trà u 2008 è u 2013 ma ci hè statu una calata di a criazione d’impieghi, ciò chì hà fattu cresce u disimpiegu. I rughjoni i più tuccati sò u rughjone di Portivechju è u rughjone di Calvi è Lisula.

Si vede dunque chì ci hè una crescita di 630 persone di più pè 3 mesi.

Cù stu livellu di puvertà è di disimpiegu, si vede dinù e difficultà pè i ghjovani cuncernendu i studii. Ancu sì a Corsica hà u più grande livellu di riescita pè u bascigliè (96,6%), spessu i ghjovani ùn ponu micca cuntinuà i so studii è andà à l’università. Di sicuru, un livellu debule di furmazione ùn aiuta micca i ghjovani à truvà un impiegu.

A Corsica hè dunque un rughjone veramentu tuccatu dà a puvertà, è decisione pulitiche devenu esse pigliate pè piantà a prugressione di a puvertà.

1. A CMU rimborsa a parte cumplementaria di e cunsultazione è di e cure è a ghjente ùn hà micca bisognu di pagà, a CMU paga direttamente. E spese sò pigliate in carica à 100% pè raportu à i prezzi di a securità suciale.

2. L’ACS hè un aiutu chì permette una riduzzione di i costi di a cumplementaria di saluta, tocca e persone ch’ùn ponu avè a CMU.