U 20 di marzu passatu fù publicatu u sestu rapportu d’evaluazioni di u climatu fattu da u GIEC. In stu rapportu, u gruppu di sperti richjama chì l’emisioni di gazu à effetu di riscaldamentu ani riscaldatu u climatu à un ritimu senza paru : oghji, a timpiratura di a pianeta s’hè alzata a 1,1°C, paragunata à a timperatura nanzu a Rivoluzioni Industriali). U cambiamentu climaticu accadi par via di fenomeni eculogichi com’è sicchini o timpesti ch’ani cresciutu à pocu à pocu dapoi parechji anni. Mentri 50 anni solamentu, u numaru di catastrofi climatichi hà multiplicatu par 5 : frà u 1970 è u 1979, l’omu cuntaia 711 catastrofi allora chi frà 2000 è 2009, ci n’era più di 3 500.
Induva si trova l’acqua ?
L’acqua hè sparta di manera spara frà i rughjoni di u mondu sanu. U vulumu sanu di l’acqua in u mondu hè di 1 360 000 000 km3. 97,2 % si trovani in l’oceani, 1,8 % in a banchisa, 0,9 % in i stesi d’acqua è 0,02 % in i laghi è i fiumi. L’acqua linda raprisenta menu di 1% di l’acqua sana. Cinqui paesi t’ani 50% di i risorzi d’acqua linda : a Russia, a China, u Canada, l’Indonesia è i Stati Uniti.
I mancanzi mundiali di più in più rigulari
Di pettu à u cambiamentu climaticu, i mancanzi d’acqua crescini sempri. Sta situazioni si chjama u « stress idricu ». In u 2023, 2,2 milliardi di parsoni ùn ani micca un accessu direttu è sanu à l’acqua da bia. 2,6 millioni di parsoni morini di malatia (malaria, collerà, …) ligata à l’acqua imbruttita. Guasgi 4 milliardi di parsoni, sia a mità di a populazioni mundiali, mancani d’acqua almenu un mesi à l’annu.
Sti scarsità anu parichji raghjoni. Primu, a prissioni demugrafica faci chì l’acqua linda in certi loca diventa scarsa. Par asempiu, in India, induva a pupulazioni hè assai numarosa – 1,4 milliardi d’abitanti – l’acqua smarisci. Dopu l’urbanisazioni crea una rarificazioni di l’acqua è a distruzioni di i mezi acquatichi. Di più, a polluzioni liata à l’industrializzazioni imbrutta l’acqua. In fini, u riscaldamentu mundiali crea una nova ripartizioni di l’acqua.
I tinsioni geopulitichi in giru à l’acqua
L’acqua ghjoca un rolu assai impurtanti in a geopulitica mundiali. I paesi poni impona a so duminazioni via l’acqua.
Pà i storiani, a prima « guerra di l’acqua » principia cù a Guerra di i Sei Ghjorni. Frà u 1953 è u 1959 u Statu d’Israel custruisci l’Acquidottu Naziunali. Cunduci l’acqua versu u lagu di Tiberiade par fà crescia l’attività ecunomica in u nordu di u paesu tuccatu da a sicchina. A so custruzzioni hè stata scelta da Israel solu, tandu rilazioni più pessimi cù i populi arabi avvicinati sò accaduti, sin’à l’attaccu di l’acquidottu in u 1967 duranti a Guerra di i Sei Ghjorni. S’è l’acqua ùn hè micca a sola urighjini di u cunflittu, i tinsioni frà Israel è i Stati Arabi si sò multiplicati dopu à st’affari. Dopu à a vittoria d’Israel, u paesu occupa u pianu di u Golan induva a maiò parti di i risorzi d’acqua di a righjoni si trova, è diventa maestru di l’acqua in u Livanti. U debitu è a maistria di l’acqua hè dunqua un sughjettu di cunflittu frà i stati è sti tinsioni ani da crescia in i prossimi dicennii.
Un prublemu lucali :
A Corsica hè cunnisciuta pà a so ricchezza in acqua, à l’inversu di a maiò parti di i paesi meditarranii. Grazia à i matrali elettrichi com’è quiddu di Todda, l’acqua hè utilizata pà a pruduzioni d’ilittricità chi rapprisenta u 20% di l’energia isulana. Dapoi u 2002, a Cullitività di Corsica t’hà in carica a gistioni di l’acqua par via di l’Uffiziu Idrolicu di Corsica. Hè l’Assemblea di Corsica chi adopra o micca u SDAGE (schéma directeur d’aménagement et de gestion de l’eau). L’agricultura chì t’hà una piazza impurtanta in l’ecunumia di a Corsica tocca dinò à sta ricchezza acquatica. U sittori cunsuma 40 millioni di m3 à l’annu.
Parò, a Corsica cunnosci parichji difficultà cù l’ « oru turchinu ». In media, l’isula t’hà, par annu, 900 mm di piuvita, veni à dì 8 milliardi di m3 d’acqua, ma sò ritinuti solamenti 86 millioni di m2, sia 1.1% di ciò chì ricevi a Corsica ogni annu. U biotu di i ritinuti pà l’acqua si faci di più in più crudeli à causa di a multiplicazioni di i sichini. Hè sempri prisenti u ricordu in i cuscenzi di a dichjarazioni di l’istati 2022 di u Prifetta di u Cismonti Michel Prosic ch’avia annunziatu in Aostu : « Ùn ci sarà più acqua in i 25 ghjorni ».
In marzu di u 2023, u prisidenti Emmanuel Macron hà prisentatu u « pianu acqua » par fà fronti à i difficultà naziunali di l’appruvistera in acqua. U scopu principali di stu pianu hè l’arnuvera di i canalizzazioni pà ristringhja i perditi d’acqua. Un aiutu finanziariu di 180 millioni d’euro spartutu frà 170 cumuni in Francia hè statu criatu. Una parti di stu bugettu hè stata data à ottu paesi in Corsica (Brandu, Castifau, Centuri, A Porta, Olmeta di Capicorsu, Rutali, Zilia, Tagliu-Isolaccia). Issi misuri sò impurtanti : l’acqua diventa scarsa è duvemu raghjunà a noscia cunsumazioni.