Ci sò paesaghji è spassighjati in Corsica fatti par tutti è chì poni incantà u più di parsoni pussibuli.
A spassighjata vers’à Bocca di u Saltu (1391m) è Bocca di Cucàvara (1475m) ni faci parti.
A spassighjata inizia annantu à a strada andendu da Evisa à a Bocca di Verghju, 5 km dopu à l’imbrancamentu di Cristinacce/Evisa, 250m dopu à u paisolu d’Aitone.
A strada chjosa pà i vitturi si trova ghjustu accantu à u parcheghju è un beddu panorama d’induva si vedini i muntagni.
Bisogna à falà fin’à un ponti chì si chjama “Ponte à Pompeani” (alt. 1130m), dopu à 15 minuti di marchja.
Dopu à issu ponti, inizia a cuddata vers’à un imbrancamentu chì vi porta sia vers’à a Boucle des Condamnés (referenza à u penitenziariu di Coti Chjavari) sia vers’à i Bocchi di u Saltu (45 minuti andata simplici) /Cuccàvara (1 ora è 45 minuti andata simplici) è u rifughju di Pùscaghja (3 ori è 45 minuti andata simplici). Issi lochi sò tutti annantu à a cumuna di Evisa.
Duveti pidda à strada P79.
L’imbrancamentu si prisenta dopu à una cuddata di 500m – 6 minuti dopu à u ponti à Pompeani
À u fondu di l’immaghjini si vedi un ponti, quiddu di Casterica (1186m).
Duveti cuddà annantu à a strada di cementu durantu à 40/45 minuti
A pendita hè à pocu pressu di 12%, di più in certi lochi minerali.
Dopu à 1 ora di marchja, si ghjunghji à a Bocca di u Saltu è u so rifughju (apartu à tutti) è u so paesaghju tremendu.
Se vuleti cuntinuà, pudeti andà fin’à Mansu. Hè luntanu è un si farà micca in una sola ghjurnata.
Vi prupongu simpliciamenti un ghjiru fin’à Bocca di Cuccàvara (1475m, 1 ora da a bocca).
A strada cuntinuveghja ma hè un pocu pessima. À un certu locu, dopu à 5 minuti di marchja, ghjunghjiti à un carteddu ghjaddu induva hè indicata “Bocca à Cuccàvara 1h / Pùscaghja 3 ori”.
Suviteti issu caminu di muntagna duranti à 50 minuti (NB : pudeti cuntinuà à suvità a strada furestera ma pari essa più longu).
U paesaghju hè un incantu d’ogni mumentu.
À un certu mumentu, u picculu caminu di muntagna traversa un fussettu pitratu induva ci hè un pocu d’acqua chì fala, travirseti u picculu riu di a Cuccula.
Cuddeti annantu à 50 metri è ritruveti a strada furestera evucata prima, suvitetilu cuddendu duranti à 10 minuti (~ 600m).
Infini, a bocca v’accogli.
Se vuleti cuntinuà, u caminu finisci in Mansu passendu pà u rifughju di Pùscaghja è a Bocca Caprunale.
A vista da qualchi metri dopu à a bocca hè tremenda, sopratuttu annantu à u Paglia Orba (2525m).
Riturnendu qualchi passi vers’à a bocca, si pò cuddà annantu à u panorama.
Hè ghjunta l’ora di u ritornu, dui ori (minimu 1 ora è 45 minuti) fin’à u Paisolu d’Aitone.
Rifalendu pà u listessu caminu (o ancu l’altru furesteru), pudareti usservà una furmazioni minerali tremenda.
Vi pudareti ancu metta à sugnà…
Bona spassighjata, cari lettori.