U 9 di maghju 1950, Robert Schuman, ministru francese di l’Affari stranieri, prupone, in un discorsu inspiratu da Jean Monnet, a messa in cumunu e risorse di carbone è d’acciaghju di a Francia è a Ripublica federale di Germania (RFA) in un’organisazione aperta à l’altri paesi d’Europa.
Per via d’issa dichjarazione guasi rivoluziunaria, Robert Schuman è Ghjuvanni Monnet volenu pruvucà un’onda d’intoppu per fà smarrà u prucidimentu d’unificazione europea. Priparata in u più grande sicretu, a dichjarazione Schuman visa dunque à pruvucà un sputicu trasaltu psiculogicu per carrià a cunvinzione di i populi europei. U 18 d’Aprile di u 1951, u trattatu di a Cumunità di u Carbone è di l’acciaghju era firmatu, è u 27 Marzu di u 1957 u Trattatu di Roma istaurendu a Cumunità Ecunomica
Europea è Euratom.
Issa dichjarazione hè cunsiderata cum’è u principiu di a custruzzione europea. A Rivista Tempi vi prupone di scopre issu pezzu di Storia per a prima volta in lingua corsa.
Dichjarazione preliminaria
Signori,
Ùn hè più quistione di vane parole, ma di un attu, di un attu arditu, di un attu custruttivu. A Francia hà agitu è e cunsequenze di a so azzione ponu esse immense.
Speremu ch’elle u seranu.
Hà agitu per u più per a pace. Affinch’è a pace possi da veru corre, prima ci vole à ch’è ci sia un’Europa. Cinque anni, guasi ghjornu per ghjornu, dopu à a capitulazione senza cundizione di a Germania, a Francia cumpiì u prima attu decisivu di a custruzzione europea è ci assuceghja a Germania. E cundizione europee devenu truvanesi interiamente trasfurmate. Issa trasfurmazione renderà pussibile d’altre azzioni cumune impussibile sin’à issu ghjornu. L’Europa nascerà di tuttu quessa, un’Europa fortamente unita è assai travatata. Un’Europa induve u livellu di vita s’alliverà grazia à l’aggruppamentu di e produzzioni è à l’estinsione di i mercati chì pruvucheranu l’abbassamentu di i prezzi.
Un’Europa induve a Ruhr, a Sarre è i bacini francesi travaglieranu di cuncertu è feranu prufittà di u so travagliu pacificu, suvitatu da ossirvatori di e Nazioni Unite, tutti l’Europei, senza distinzione ch’è elli sianu da u Levente o da u Punente, è tutti i territorii, in particulare l’Africa chì aspettanu da u Vechju Cuntinente u so sviluppu è a so prusperità.
Eccu ‘ssa decisione, incù e cunsiderazione chì l’anu inspirata.
Dichjarazione di u 9 di maghju di u 1950
“A pace mundiale ùn saparia esse salvaguardata senza sforzi criatori à a misura di i priculi chì la minaccianu.”
U cuntributu ch’è un’Europa organizata è viva pò arricà à a civilisazione hè indispinsevule à u mantinimentu di e relazione pacifiche. Fendu si dapoi più vinti anni u campione di un’Europa unita, a Francia hà sempre avutu per ugettu essenziale di serve a pace. L’Europa ùn hè stata fatta, avemu avutu a guerra.
L’Europa ùn si ferà micca d’un colpu, nè in una custruzzione d’inseme : si ferà da rialisazione cuncrete, criendu di circondu una sulidarità difatti. L’accolta di e nazioni europee esige ch’è l’oppusizione siculara di a Francia è a Germania sia eliminata : l’azzione impresa deve tuccà prima di tuttu a Francia è a Germania.
In issu scopu, u guvernu francese prupone di purtà subitu subitu l’azzione micca annantu à un puntu limitatu, ma decisivu :
U Guvernu francese prupone di piazzà l’inseme di a produzzione franco-tedesca di u carbone è d’acciaghju sottu à un’Alta Auturità cumuna, in un’organisazione aperta à a participazione di l’altri paesi d’Europa.
A messa in cumunu di e produzzione di carbone è d’acciaghju assicurerà subitu subitu u stabilimentu di basamenti cumuni di sviluppu ecunomicu, prima tappa di a Federazione europea, è cambierà u destinu di e regioni da longu dedicate à a fabricazione di l’arme di guerra ch’elle sò statu e più custante vittime.
A sulidarità di produzzione chì serà cusì annudata manifisterà ch’è ogni guerra trà a Francia è a Germania diventa non solu impinsevule, ma materialmente impussibile. U stabilimentu d’issa unità putente di produzzione aperta à tutti i paesi chì vuleranu participà, sfucendu à furnisce à tutti i paesi ch’è ella cuncoglierà l’elementi fundamentali di a produzzione industriale à listesse cundizione, ghjitterà i fundamenti reali di a so unificazione ecunomica.
Issa produzzione serà offerta à l’inseme di u mondu, senza distinzione nè esclusione, per cuntribuisce à u rilivamentu di u livellu di vita è à u prugressu di l’opere di pace. L’Europa puderà, incù mezi accrescuti, perseguità a rialisazione di una di e so tacche essenziale : u sviluppu di u cuntinente africanu.
Cusì serà rializata simpliciamente è prestu a funditura d’interessi indispinsevule à u stabilimentu di una cumunità ecunomica è introduttu u fermentu di una cumunità più larga è più prufonda entre di i paesi à longu opposti da divisioni sanguinose.
Da a messa in cumunu di produzzionie di basamentu è l’istituzione di un’Alta Auturità nuvella, chì e so decisione ligheranu a Francia, a Germania è i paesi chì ci aderisceranu, Issa pruposta rializerà e prime pusate cuncrete di una Federazione europea indispinsevule à a priservazione di a pace.
Per perseguità a rialisazione di i scopi cusì definiti, u guvernu francese hè prontu à apre i trattativi annantu à i basamenti seguenti.
A missione di l’Alta Auturità cumuna serà di assicurà in i più cumporti rapidi : a mudernisazione di a produzzione è u migliuramentu di a so qualità ; a furnitura à cundizione identiche di u carbone è l’acciaghju annantu à u mercatu francese è annantu à u mercatu tedescu, è ancu annantu à quelli di i paesi aderenti ; u sviluppu di l’espurtazione cumuna ver’ di l’altri paesi ; l’ugualisazione in i prugressi di e cundizioni di vita di a manu d’opereghja d’isse industrie.
Per aghjunghje issi scopi à parte si da e cundizioni assai disparate in e quale sò piazzate attualmente e produzzione di paese aderenti, à titulu transitoriu, certe dispusizione duveranu esse messe in sesta, cumpurtendu l’appiicazione di un pianu di produzzione è d’invistimenti, l’istituzione di meccanismi di perequazione di i prezzi, a criazione di un fondu di ricunvirsione aghjivulendu a raziunalisazione di a produzzione. A circulazione di u carbone è l’acciaghju trà i paesi aderenti serà subitu subitu affrancata di ogni drittu di dugana è ùn puderà esse affittata da tariffi di trasportu differenziali. Prugrissivamente si sgaghjeranu e cundizione assicurendu spuntaniamente a più ripartizione raziunale di a produzzione à u livellu di produttività u più altu.
À l’oppostu di un cartel internaziunale tindendu à a ripartizione è à u sfruttamentu di i mercati naziunali da pratiche restrittive è u mantinimentu di prufitti alti, l’organisazione prugittata assicurerà a funditura di i mercati è l’espansione di a produzzione.
I principi è l’impegni essenziali quì sopra definiti feranu l’ugettu di un trattatu firmatu trà i Stati. I trattativi indispinsevule per pricisà e misure d’appiicazione seranu perseguitate incù l’assistenza di un arbitru designatu di un cumunu accordu : questu serà incaricatu di vighjà à ciò ch’è l’accordi sianu cunformi à i principi è, in casu d’oppusizione irredutibile, fisserà a soluzione chì serà aduttata. L’Alta Auturità cumuna incaricata di u funziunamentu di tuttu u rigimu serà cumposta da persunalità indipendente designate annantu à un basamentu paritariu da i Guverni ; un Presidente serà sceltu di un cumunu accordu da l’altri paesi aderenti. E dispusizione apprupriate assicureranu e vie di ricorri necessarii contru à e decisioni di l’Alta Auturità. Un ripprisintante di e Nazioni Unite vicinu à issa Auturità serà incaricatu di fà duie volte per annu un rapportu publicu à l’ONU. Rindendu contu di u funziunamentu di l’organismu nuvellu in particulare riguardu à a salvaguardia di e so fine pacifiche.
L’istituzione di l’Alta Auturità ùn prehjudicheghja in niente di u rigimu di pruprietà di l’imprese. In l’eserciziu di a so missione, l’Alta Auturità cumuna tenerà contu di i puteri cunferiti à l’Auturità internaziunale di a Ruhr è l’obblighi di ogni natura imposte à a Germania, tantu chì quelle sussiteranu.