Tempoli, tempi fà – Primu Capitulu « U Gang di a Curnicia »

Tempoli, Tolsania, 15 d’uttrovi di u 1980.

L’arburi perdini i so foglii. A terra hè piena di foglii di culori ghjaddu.

Ghjaddu, u culori di a vesta di u principali membru di u « Gang di a Curnicia », Michel Migalli. Iss’omu, d’una quarantina d’anni, si prumena incù a so donna ind’i carrughji di a curnicia di u quartieri di La Jalva, locu storicu di a cità di Tempoli.

Si senti libaru. Libaru parchì ?

Parchì ha fattu qualchi anni di prighjò in Africa Suttana.

Da u 1960 fin’à u mesi d’aprili di u 1972, a banda di Michel Migalli mittia trappuli à certi donni ind’i magazzeni di vistiti in Tolsania, attirenduli ind’è reti di donni di serviziu in Africa Suttana, fenduli travaddà sarrati ind’i cantini di casi di ricchi pruprietarii Afrikaans. Issi donni erani ancu attrici di filmi è figuretti micca pagati, poi spartuti annant’à i televisioni.

Dunqua, ind’u 1980, Michel Migalli respira infini in a so cità di Tempoli, ind’u so quartieri di nascita, La Jalva, picculu locu chì s’assumidda mori à u centru di u paesi di Luras/Lùrisi, in Gaddura.

Respira parchì ritrova tutti i soii.

Respira parchì hè libaru di viva ciò ch’eddu voli.

Respira di sapè u fattu chì a so moglia hè incinta, s’essendu trovi qualchi volti insemi in prighjò.

14 di nuvembri di u 1981.

In issa ghjurnata fresca di vaghjimi, a nevi cumincia à falà annant’à l’alta pianura è i muntagni di Tempoli, cità cumposta da tanti paisoli, tantu vicina à a geugraffia è i paesaghji di l’Alta Gaddura.

Issu ghjornu pricisu, s’essendu separatu u ghjornu prima di a so moglia incù a quali ùn era mancu maritatu – a so fiddola Frédérique essendu nata duranti à l’invernu 1980 – hà decisu di creà un cummerciu, un bar-risturanti.

Pà pudè tuccà calchi suvvenzioni, s’è iscrittu cum’è « Eleveur de singes ». Hà cumpratu deci scimii, l’hà dati in gestioni à un zoo è hà tuccatu l’aiuti. Aiuti chi ani bastatu pà apra u so bar, u « Brasero», referenza à u so scuru passatu.

Michel, senza u casticu chì l’avaria purtatu u tratenimentu di a so fiddola è di a so ex-moglia, pensa truvà in Claudine una cumpagna ricca da spiumassi, senza vargogna.

Ma, infatti, u babbu di Claudine avia fattu fallimentu ind’a so intrapresa d’import-export.

Dunqua Michel s’hè risoltu à una cosa incù a so servori di cumpagna, andà in tutta La Jalva, 6000 abitanti, ancu in certi altri quartieri di Tempoli cum’è Monsalviaga pà circà soldi ind’è i cummercianti è ghjenti, i banchi rifusendu di pristalli un solu centesimu.

Incù 50000 Franchi Tolsani, à parità incù i Franchi francesi, ani avutu qualchi mezi pà cumprà u materiali necessariu, ancu cinqui forri à pizza è stuviglii di cucina, in casu induv’eddi fariani i piatti pà a clientela. Ani ancu missu in baddu una piccula sala di sinemà.

Duranti à una quindicina anni, dunqua fin’à u 1995, tuttu si passa di manera piuttostu nurmali in La Jalva è ind’u cummerciu di Michel.

Lasciate un cummentu ?

Questo sito usa Akismet per ridurre lo spam. Scopri come i tuoi dati vengono elaborati.