Tempoli, tempi fà – Primu Capitulu « U Gang di a Curnicia »

Tempoli, Tolsania, 15 d’uttrovi di u 1980.

L’arburi perdini i so foglii. A terra hè piena di foglii di culori ghjaddu.

Ghjaddu, u culori di a vesta di u principali membru di u « Gang di a Curnicia », Michel Migalli. Iss’omu, d’una quarantina d’anni, si prumena incù a so donna ind’i carrughji di a curnicia di u quartieri di La Jalva, locu storicu di a cità di Tempoli.

Si senti libaru. Libaru parchì ?

Parchì ha fattu ott’anni di prighjò in Brasili pà traficu d’umani.

Da u 1960 fin’à u mesi d’aprili di u 1972, a banda di Michel Migalli mittia trappuli à certi donni ind’i magazzeni di vistiti in Tolsania, attirenduli ind’è reti di prostituzioni in Brasili, fenduli travaddà sarrati ind’i cantini di casi di ricchi pruprietarii lucali. Issi donni erani ancu attrici invuluntarii di filmi è figuretti pornografichi, poi spartuti annant’à i televisioni è siti internet di l’anni 2010.

In Brasili u 27 d’aprili di u 1972, a pulizza s’hè avvicinata di l’amicu di Michel Migalli, Tony Galleja mentri cuddaia ind’una vittura blindata incù a so donna è i so dui fiddoli. Tony, chì hà rializzatu ch’eddu hè statu ricunnisciutu cum’è fugitivu par avè tratinutu un trafficu d’umani, hà surtitu una pistola è hà sparatu. A pulizza l’hà tombu fendulu cascà ind’u portu di Sao Paulo. A so famidda hè sparita, senza sapeni di più. Morta?

Subitu, a pulizza andò ind’un appartamentu di l’amicu di Tony Galleja, Michel Migalli. S’aspittaiani à d’altri fucilati, ma quand’eddi sò intruti ind’a camara, Michel Migalli era ind’u so lettu incù a so amica di tandu, Violette Zibba, è u culteddu era troppu luntanu ind’a stanza pà essa presu da Michel.

I guardiani d’issi prighjò pieni di topi lasciaiani i porti di i celluli aparti è s’è faciani u gestu di fughji, sariani stati tombi immediatamenti. Ind’u 1980, Michel Migalli è a so moglia sò stati rinviati in Tolsania. Dopu à iss’episodiu, u Gang di a Curnicia hè sparitu ind’a so forma anziana, sola a forma puliticanti di u Partitu di a Sucial-demucrazia di Tolsania esisti sempri.

Dunqua, ind’u 1980, Michel Migalli respira infini in a so cità di Tempoli, ind’u so quartieri di nascita, La Jalva, picculu locu chì s’assumidda mori à u centru di u paesi di Luras/Lùrisi, in Gaddura.

Respira parchì ritrova tutti i soii.

Respira parchì hè libaru di viva ciò ch’eddu voli.

Respira di sapè u fattu chì a so moglia hè incinta, s’essendu trovi qualchi volti insemi in prighjò.

14 di nuvembri di u 1981.

In issa ghjurnata fresca di vaghjimi, a nevi cumincia à falà annant’à l’alta pianura è i muntagni di Tempoli, cità cumposta da tanti paisoli, tantu vicina à a geugraffia è i paesaghji di l’Alta Gaddura.

Issu ghjornu pricisu, s’essendu separatu u ghjornu prima di a so moglia incù a quali ùn era mancu maritatu – a so fiddola Carla essendu nata duranti à l’invernu 1980 – hà decisu di creà un cummerciu, un bar-risturanti.

Un risturanti-bar, mà incù quali esistenza legali ?

Era quissa a quistioni.

Pà pudè tuccà calchi suvvenzioni, s’è iscrittu cum’è « Eleveur de singes » senza sapè cum’edda era fatta una scimia. Hà cumpratu deci scimii, l’hà dati in gestioni à un zoo è hà tuccatu l’aiuti. Aiuti chi ani bastatu pà apra u so bar, u « Brasileiro », referenza à u so scuru passatu.

In issu bar servendu alcool, senza licenza quattru, ci hè una donna di u nomu di Claudine Zamparra chì travadda cum’è servori. Issa donna, fiddola di un riccu pruprietariu di magazzeni avendu poi sparitu.

Michel, senza u casticu chì l’avaria purtatu u tratenimentu di a so fiddola è di a so ex-moglia, pensa truvà in Claudine una cumpagna ricca da spiumassi, senza vargogna.

Ma, infatti, u babbu di Claudine avia fattu fallimentu ind’a so intrapresa di cucina tutta pronta, lasciandu cusì cinqui parsoni à u disimpiegu.

Dunqua Michel s’hè risoltu à una cosa incù a so servori di cumpagna, andà in tutta La Jalva, 6000 abitanti, ancu in certi altri quartieri di Tempoli cum’è Monsalviaga pà circà soldi ind’è i cummercianti è ghjenti, i banchi rifusendu di pristalli un solu centesimu.

Incù 50000 Franchi Tolsani, à parità incù i Franchi francesi, ani avutu qualchi mezi pà cumprà u materiali necessariu, ancu cinqui forri à pizza è stuviglii di cucina, in casu induv’eddi fariani i piatti pà a clientela.

Cuminciendu bè, Claudine arregistra u bar à u so nomu, dittagliu scuru.

Talmenti scuru chì Michel hè assai viulenti incù Claudine ind’a so vita privata.

Duranti à una quindicina anni, dunqua fin’à u 1995, tuttu si passa di manera piuttostu nurmali in La Jalva è ind’u bar-risturanti di Michel.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.