Tempoli, Tolsania, 15 d’uttrovi di u 1980.
L’arburi perdini i so foglii. A terra hè piena di foglii di culori ghjaddu.
Ghjaddu, u culori di a vesta di u principali membru di u « Gang di a Curnicia », Michel Migalli. Iss’omu, d’una quarantina d’anni, si prumena incù a so donna ind’i carrughji di a curnicia di u quartieri di La Jalva, locu storicu di a cità di Tempoli.
Si senti libaru. Libaru parchì ?
Da u 1960 fin’à u mesi d’aprili di u 1972, a banda di Michel Migalli attiraia donni ind’è reti di serviziu in Africa Suttana, fenduli travaddà cum’è televenditrici pà uccidentali in ricerca di prudutti di cunsumazioni currenti. Attività legali.
Dunqua, ind’u 1980, Michel Migalli respira infini in a so cità di Tempoli, ind’u so quartieri di nascita, La Jalva, picculu locu chì s’assumidda mori à u centru di u paesi di Luras/Lùrisi, in Gaddura.
Respira parchì ritrova tutti i soii.
Respira parchì hè libaru di viva ciò ch’eddu voli.
Respira di sapè u fattu chì a so moglia hè incinta, s’essendu trovi qualchi volti insemi ind’i zoni di l’attuali Namibia.
14 di nuvembri di u 1981.
In issa ghjurnata fresca di vaghjimi, a nevi cumincia à falà annant’à l’alta pianura è i muntagni di Tempoli, cità cumposta da tanti paisoli, tantu vicina à a geugraffia è i paesaghji di l’Alta Gaddura.
Issu ghjornu pricisu, s’essendu separatu u ghjornu prima di a so moglia incù a quali ùn era mancu maritatu – a so fiddola Frédérique essendu nata duranti à l’invernu 1980 – hà decisu di creà un cummerciu, un bar-risturanti.
Pà pudè tuccà calchi suvvenzioni, s’è iscrittu cum’è « Eleveur de singes ». Hà cumpratu deci scimii, l’hà dati in gestioni à un zoo è hà tuccatu l’aiuti. Aiuti chi ani bastatu pà apra u so bar, u « Brasero», referenza à u so passatu quand’eddu grigliaia a carri ind’un brasero ind’u desertu di u Namib dopu à una partita di caccia.
Michel, senza u casticu chì l’avaria purtatu u tratenimentu di a so fiddola è di a so moglia, pensa truvà in Claudine una cumpagna ricca.
Ma, infatti, u babbu di Claudine avia fattu fallimentu ind’a so intrapresa di fasgioli cotti.
Duranti à una quindicina anni, dunqua fin’à u 1995, tuttu si passa di manera piuttostu nurmali in La Jalva è ind’u cummerciu di Michel.