A residenza d’architetti di u 2020, missa in baddu par a terza volta in Corsica da a Casa di l’Architettura è l’intercumunalità hà compiu a so prima tappa d’istatina in Alta Rocca par cuntinuà à a stagioni di vaghjimu ghjunta. A prisintazioni di i so imbuschi, dici ghjorna fà in Livia hè stata seguitata da i primi cunclusioni di l’architetti laureati.
Santa Lucia di Tallà, Livia, Quenza, Zonza, Sari Sulinzara, è Auddè sò stati i loca d’un studiu ‘llu rughjoni, hà fattu l’ughjettu d’un contu resu riccu ch’hà lanciatu cuntrasti è discursati vivi trà eletti, paisani è architetti, scopu principali di l’addunita sicondu à a metoda pinsata da i dui architetti di a residenza, Salomé Bergsma è Margaux Regalia.
-
Eccu u primu articulu da leghja quì: Trans’humans Alta Rocca – l’architetti pinsani un turisimu sanu da u studiu ‘lla tarra rucchisgiana.
-
Andeti à seguità a residenza d’architetti dinò: Trans’humans Alta Rocca – blog
Michèle Barbé, prisidenta di a Casa di l’Architettura di Corsica inizia stu scontru mustrendu a lea particularia trà l’attività turistica accampendu u tarritoriu è i rucchisgiani. Par a maiora parti di i paisani, esisti una dichutumia forta trà u so cutidianu è quiddu di l’aghjenti vinuti à passà i vacanzi, dui populazioni ch’ùn si cunnoscini tantu è chì si cruciani assai mentri l’istati. L’uccasioni, d’altrondi, d’intarrugà sta parolla, u “tourisme de masse“, impiegata da tutti ma poca schjarita. L’attività hè cuncintrata in piaghja è nant’à certi spazii cunnisciuti in muntagna. Fora di quidd’altri, i paesi muntagnoli t’hanni una maestria povara ‘lla so offra turistica ch’hè firmata tradiziunali assai: spassighjati è attività sportivi, ecunumia di a resturazioni è di l’alloghju.
A cultura, u patrimoniu è l’agricultura. U turisimu da capì tali un mezu di sviluppu par u tarritoriu è una attraenza di longa vita, par i corsi è i stragneri à l’annata saria forsa l’imbusca maiò di a generazioni prussima in Alta Rocca.
I prublemi ligati à a prisenza turistica esistiani ‘ghjà, ma certi fenomeni hanni cresciutu cù i ribombi di a crisa sanitaria. I forchi di Bavedda hanni vistu 5000 parsonni in più di luddu, paragunatu à l’annata passata, allora chì u spaziu soffri di a so mancanza di regulazioni è di gestioni: vitturi numarosi à a bocca, accampu impurtantu nantu à i camini di spassighjata è in u fiumi. Bavedda, com’è u Cuscioni sò tarri vittimi d’un sucessu cresciendu dapoi trent’anni incù i guidi turistichi o nant’à internet.
Soffra d’una prisenza impurtanta senza puteru di cuntrollu: pò essa difinitu cusì u “tourisme de masse” nant’à certi spazii turistichi in Corsica. Allora, sarrà i loca da ducumenti ufficiali, regulà u passaghju, i suluzioni parini difficiuli da metta in baddu par l’eletti.
A l’inversu, campani monda ricchezzi chì nimu ùn vedi più. Patrimoniu, cultura è tradizioni firmani pocu splutati, eppuru sò una furtuna par l’attraenza di u tarritoriu cù un’attività turistica à l’annata. L’architetti hanni vistu chì a pruduzzioni agricola è sopratuttu l’ortulimi erani guasgi abbandunati in u rughjoni;
- Pulitica è cumpetenzi, bisognu à custruiscia i prughjetti novi in cumunu.
A mancanza di lea à parechji livelli di u puteru puliticu, da a cumuna sin’à a Cullittività di Corsica hè stata mintuata da i merri. I rughjona sò intrati malgradi la so vulintà propria in u XXIesimu seculu, epica di cuncurrenza è di tecnocrazia scansendu quiddi ch’ùn hanni solda o prughjetti forti par la so tarra. Un prublemu capitu da l’eletti circhendu l’intesa pulitica, imbusca maiò à l’avvena, ghjuvendu à pinsà l’ambizioni nant’à u rughjoni sanu. A residenza d’architetti hè stata salutifera mentri stu primu cuntrastu in giru à a cartografia maiò di l’Alta Rocca piazzata nantu à u sulaghju, chì ugnunu hà vistu a so piazza in u spaziu è a rilazioni storica trà i paesi ch’hà da pidda una strada nova da quì à l’anni prussimi.