À u 29 di maghju, facianu trè ghjorni ch’è nissun novu paziente hè statu dichjaratu pusitivu à a Covid-19 in Corsica. U Centru ospitalieru di Bastia ricensa, à u 27 di maghju, 89 casi di Covid-19 è u Centru ospitalieru d’Aiacciu 309. Aghjunghjendu e vistighere di mecidina di cità, omu conta, à u 27 di maghju, 682 vistighere pusitive dapoi u 5 di marzu è un numeru tutale di 74 morte. Hè chjaru ch’è l’epidemia di Covid- 19 hà culpitu di più u Sudu di l’isula, è in particulare a cità d’Aiacciu, mentre u Cismonte hè statu largamente risparmiatu da l’epidemia. Riguardu à l’indicatori pruposti da u guvernu per principià a 2nda fasa di u scunfinamentu è piazzendu a Corsica in u verde, apparisce à a fine di maghju ch’è u vìrus circuleghja pocu in Corsica è ch’è a situazione hè sottu à cuntrollu. Tocca avali à a classa pulitica isulana di pinsà u mondu di dopu.
A Corsica deve esse capita à u sensu geugraficu, incù a so custrinta isulana ; à u sensu ecunomicu, per via di a dipindenza rispettu à l’industria di u turismu (circa 30 di u PIB) ; à u sensu puliticu infine, in quant’è territoriu à u statutu particulare incarnatu in una 1cullittività unica dirighjita dapoi 2015 da una cualizione di naziunalisti/autonomisti (Gilles Simeoni, prisidente di u Cunsigliu esecutivu) è indipendentisti (Ghjuvan’Guidu Talamoni, prisidente di l’Assemblea di Corsica).
À e legislative di u 2017, i naziunalisti sò eletti in trè circuscrizzione annantu à quattru : Michele Castellani (Cismonte) è Ghjuvan’Felice Acquaviva (HC) di u partitu Femu a Corsica è Paulu Andria Colombani (Pumonte) di u Partitu di hà Nazione Corsa. ‘ssi trè eletti anu fattu entre incù vigore 2u dibattitu annantu à l’autonumia à l’Assemblea naziunale è u dibattitu annantu à a riforma custituziunale – scunciata – impignatu in 2018 fubbe u locu di una lotta tecnica è pulitica intensa in giru à a ridefinizione di a piazza di a Corsica in a Custituzione.
Cum’è lu à nutava Pasquale Marchetti, prufissore à l’Università di Bologna, in l’intruduzione di u dizziunariu l’Usu Córsu : « per la Corsica, la terra “ferma” era la Toscana ». A Corsica hè un cundinsatu di u mare Tarraniu ; interissà si à ella, hè fighjulà à stu spaziu europeu à una scala pertinente, permittendu cusì d’operà un’analisi fina di e tinsione pulitiche è ecunomiche chì attraversanu u mezupunente di u cuntinente : puvertà, fughjera di i ciarbelli, turisimu di massa, senza cascà inde a trappula di u naziunalisimu. Hè dinù percipisce u paradossu di una Cullittività dirighjita da i naziunalisti, ma incù u so core ecunomicu è instituziunale hè amministratu da Lurenzu Marcangeli, anzianu diputatu I Ripublicani, à spessu prisintatu cum’è vicinu di Edouard Philippe è sodu uppunente à i naziunalisti.
Michele Castellani, diputatu autonomistu di a prima circuscrizzione di u Cismonte, hè unu di quelli. Natu in Bastia, duttore in scenze ecunomiche, anzianu prufissore di l’università, hè una figura impurtante di a pulitica isulana, ricunnusciutu tantu per u so impegnu puliticu ch’è per a so spirtizia ecunomica. In core di a mandatura attuale, hà difesu à l’Assemblea Naziunale a pruposta di un statutu d’autonumia per a Corsica è hè, incù l’altri diputati autonomisti, unu di i membri fundatori di u gruppu Libertà è Territorii.
Larenzu Marcangeli, per contu soiu, appartene à a nuvella generazione di a dritta isulana. Natu u 10 di dicembre 1980, fù elettu diputatu di a prima circuscrizzione di Pumonte in u 2012, merre d’Aiacciu dapoi 2014 è elettu torna à u prima giru in u 2020. Si stacca di LR à u principiu di 2018 mentre l’elezzione di Laurent Wauquiez à capu di u partitu. Un tempu pressentitu pè fà parte di u guvernu Philippe, puderia divintà quellu chì guidarà à diritta di pettu à i naziunalisti in u 2021 à l’elezzione tarrituriale. Quest’ultimi sò oghje criticati da una parte di l’elettori, li rimpruvendu u so attentisimu, mentre chì u cuntrastu incù Emmanuel Macron s’hè pocu à pocu ghjilatu dapoi 2018.
U merre di a Cità Imperiale hà accittatu di risponde à e nostre quistione annantu à a situazione sanitaria è e so cunsiquenze per u rughjonu aiaccinu.
Chì sò state e particularità di a vostra agglumerazione rispettu à a crisa ? Fattori endemichi peghjuranti, ci ne hè statu ?
Larenzu Marcangeli — A Corsica hè statu unu di i rughjoni3 i più pruvate da l’epidemia di Covid-19. U spidale d’Aiacciu, mancu più ch’è l’altre strutture ospitaliere, ùn era dispostu à impittà una crisa cusì maiò. Di fronte à un vìrus altamente cuntagiosu, hè tuttu u persunale medichendu chì hà fattu prova d’abnegazione. Difatti, u nostru territoriu cumuleghja disabilità riguardu à a prupagazione di u vìrus. Hè à Aiacciu ch’è a situazione hè stata a più seria : a qualifica di a cità d’Aiacciu cum’è unu di i primi fuculaghji di cuntaminazione annantu à u tarritoriu francese ci hà custrinti à piglià, da u 8 di marzu, misure d’urgenza, è in particulare a chjusura di e scole. A fortiori, a Corsica, isulata da a so insularità, ùn pò pretende à u sustegnu immediatu di dipartimenti cunfinenti. Incù solu una cinquantina di letti in rianimazione per 330 000 abitanti, era bellu chjaru ch’è a situazione ùn anderia micca accuncendu si. Per soprapiù, l’isula prisente una demugrafia à risicu : 94 000 parsone, sia u 29% di a pupulazione isulana, anu più di sissant’anni, una categuria particularmente esposta à u vìrus.
Cumu s’urganizeghja a gistione da a crisa à u cutidianu ? In altrò, in Francia, parechje voce si sò alzate frà i persunali municipali, in particulare in a pulizza, per puntuà à tempu una mancanza di medii materiali (mascare, guanti…) è una mancanza di civismu da a parte di a pupulazione. Chì ghjè statu a situazione à Aiacciu o in a Cumunità d’Agglumerazione di u Paese Aiaccinu (CAPA) ?
I Corsi facenu parte di i boni alevi. In furia in furia, avemu dicisu di piglià e misure di pettu à i primi casi arrigistrati annantu à l’agglumerazione d’Aiacciu. Misure rigurose, ma chì sò state accittate in a più grande disciplina da a pupulazione.
Riguardu à e pruteste, sò in particulare statu attentu à e prese di pusizione di i merri di Parigi, Londra, Lisbona, Bruxelles, Varsovia, Firenza è Budapest. A quistione di e maschere, i scuzzali, e charlottes è paraochji di prutezzione è ancu quella di i rispiratori è di e vistichere in numeru bastevule ùn avarianu micca duvutu pone si, nè in Aiacciu, nè in altrò. Hè chjaru ch’è nimu ùn era priparatu. D’altre crise di ‘ssa ampiezza ùn sò micca impussibili : hè primurosu chì u Statu ci dia vere garantite per l’avvene da cansà si di nove carenze.
Cume hè stata a natura di a cuuperazione trà a Cullettività di Corsica, a Merria è a Prifettura ?
Eiu difendu sempre per a cuuperazione ; l’ora ùn hè micca à e pusture pulitiche. ‘Ssa crise impone una mubilisazione cum’è mai vista di e risorse intellettuale, umane, tecniche è finanziarie è e nostre iniziative devenu iscrivesi in a custruzzione di un’alternativa. Hè in ogni casu u mo sensu di u duvere, chì passa da un slanciu di sulidarità è una diterminazione irrimuvevule : avemu a rispunsabilità storica di tene contu di l’avvirtimentu ch’è custituisce ‘ssa crisa è di dà noi i mezi di stazzunà, cullittivamente, l’avvene à u qualessu noi aspiremu.
Ci hè statu d’altri poli di cuntaminazione annantu à u territoriu isulanu. Avete travagliatu di cuncertu incù l’altre merrie di Corsica ? Vi site intrattenutu incù altri merri di Francia à prupositu a gistione di a crisa ?
Iè. In quant’è Presidente di l’agglumerazione, aghju scambiatu rigularmente incù i 9 merri di a CAPA. Avemu in particulare cuurdinatu a compra è a distribuzione di 80 000 maschere per l’inseme di a pupulazione di u paese aiaccinu. Avemu dinù pigliatu parechje decisione cullegiale annantu à a prima fasa di u scunfinamentu dumandendu in particulare un tempu supplementariu per a riapertura di e scole.
Chì ne pinsate voi di e misure annunciate da u Prima ministru è cume priparate Aiacciu per a seguita ? Chì sò e misure ch’è a merria è a CAPA metteranu in ballu per risponde à a crisa suciale è ecunomica ?
A cità travaglia attualmente annantu à parechji assi per sustene i so cummercianti, in particulare rispettu à l’occupazione di u campu publicu. L’installazione di e terrazze puderia in particulare esse autorizata un pocu di più prestu quistannu. Una riflessione annantu à l’estinsione di l’influenze hè dinù purtata, da cumpensà e custrinte di distanziazione suciale à rispittà. Una calata di a tarificazione hè à u studiu : semu abbanstanza à prò d’un’esonerazzione tutale. Cunsidaremu ben sicuru una calata di a Tassa Lucale di Publicità Esteriore (TLPE) per i cummerci tochi da e chjusure amministrative è un allargamentu di e spiaghje di gratuità per u staziunamentu. ‘Sse misure pigliate in favore di i cummercianti annantu à a TLPE è u drittu di terrazza ripprisentanu rispittivamente 163 000 euri è 150 000 euri di perdite di ricette per a cumuna.
Avete avucatu per un pianu di rilancia eccezziunale, ci pudete dì in chì cunsiste ellu ? Pinsate ch’è u mudellu ecunomicu di a Corsica deve esse ripinsatu à u sboccu di ‘ssa crisa ?
Ecunumicamente, u peghju hè dinù davanti à noi. A crisa sanitaria hà da pruvucà e fallite è perdite d’impiegu. Ultimamente, Bruno Le Maire s’hè fattu circundà da un gruppu di sperti per parlà di a ripresa ecunomica di u paese. Eiu pregu per un pianu di rilancia adattatu, chì cum’è à sapete, a Corsica hè assai dipendente di u turisimu incù u terzu di u so PIB chì pruvene da l’industria di u turisimu. Dinù, di pettu à u risicu di una staghjone bianca, u guvernu duverà assicurà un pianu d’accumpagnamentu chì piglia in contu ‘ssa iperspicialisazione. Ci vulerà dinù à iscrive a transizione energetica in core di ‘ssu pianu, chì a cunciliazione di a rilancia ecunomica è di u sviluppu durevule hè di primura capitale per Aiacciu cum’è per a Corsica di dumane.
S’è a situazione sanitaria in u paese aiaccinu hè statu assai dillicata, u Cismonte hè statu relativamente risparmiatu da l’epidemia di coronavìrus. Michele Castellani hà rispostu à e nostre quistione per evucà ‘ssa differenza è e difficultà ecunomiche à vene.
Incù i ritorni di vacanze d’Italia è a cità d’Aiacciu cunsiderata cum’è cluster assai prestu in ‘ss’epidemia, u Cismonte era difatti una zona chì avaria pussutu esse gravamente tuccata da l’epidemia. Dighjà u 23 di frivaghju, avete richjamatu à u Ministru di a Salute Olivier Véran affinch’è i mezi sianu messi in ballu per cuntrullà i viaghjadori à u ritornu di e zone cuntaminate, in particulare l’Italia. E vostre dumande sò state rispinti. Eppuru, u Cismonte conta oghje 4 volte menu di casi pusitivi à u Covid-19 ch’è a Corsica Suttana. Cume spiigate ‘ssa debule prevalenza di l’epidemia in Cismonte rispettu à a Corsica Suttana?
Michele Castellani — U cluster d’Aiacciu hè apparsu in seguitu à 4un appuntamentu evangelistu in una Megachurch à Mulhouse induve certi Aiaccini si sò resi. À u so ritornu, anu cuntaminatu d’altre persone, addistrendu|caghjunendu una riazzione in catena, in particulare à u spidale d’Aiacciu. Si trova chì ci eranu parsone chì vulianu rende si dapoi Bastia à ‘ssu appuntamentu evangelicu ma ch’è l’aeruportu era chjosu per via di una timpesta eccezziunale. Avemu dunque pussutu tirà e lezzione di ciò ch’è ellu si passava à Aiacciu è agisce di cunsequenza. A pupulazione di u Cismonte hè stata assai rispittosa di e norme sanitarie è di i gesti barriere.
Cume gistite voi, in quant’è diputatu di Corsica a crise sanitaria à u cutidianu ?
À l’Assemblea naziunale, sedu à a cummissione di e finanze. So attentu à parechje cose. Ci hè in particulare un tassulu di risparmiu chì aumenta assai in Francia è chì si ciffra di tondu à 1500 miliardi di risparmiu liquidu. Aghju dunque prupostu amendamenti per l’emissione d’obbligazzione annantu à un librettu di risparmiu particulare à destinazione di u risparmiu internu, affinch’è a ghjente chì la vulia possi sottuscrive ci. Hè à tempu un cennu citatinu è un piazzamentu.
Sò dinù sullicitatu, chì a crisa ecunomica hè propiu dura. Ricevu l’appelli à u succorsu da parte di l’autoscole, i centri equestri, l’agricultori, i traspurtadori, l’osteriaghji. Facciu di u mio megliu, cum’è assai ghjente, per travaglià annantu à tutti i fronti à pruvà di minimizà l’effetti di a crisa.
Dopu à l’annunci di u Prima ministru cuncirnendu u pianu di scunfinamentu di u paese, avete vutatu, cum’è una maiò parte di i membri di u vostru gruppu puliticu, contru à ‘ssu pianu. Ci pudeti spiigà e raghjone chì anu mutivatu ‘ssu votu ?
‘Ssu testu pesa interrugazione rispettu à a rispunsabilità di i merri, in particulare per a riapertura di e scole è di e piaghje. Si ci hè un prublema, s’è un zitellu hè malatu o si ne more, i parenti risicheghjanu di vultà si contru à u merre annantu à chì tuccaria tutta a rispunsabilità. Auguremu ch’è i merri aghjinu una prutezzione. Quandu ci hè statu a timpesta Xynthia, i merri sò stati pisantamente cundannati perchè elli avianu emessu permessi di custruisce. U casu di figura hè un pocu simile. Hè per ‘ssa raghjone ch’è noi bramemu ch’ellu ci sia una leghje generale chì arriguleghji ‘ssu prublema di rispunsabilità trà u Statu è i merri.
À u livellu lucale, so pigliatu cum’è assai altri eletti trà dui fochi : ci vole ch’è a Corsica s’apri, per e raghjone evidente – chì ùn sò micca sultantu ecunomiche. Ma duvemu dinù pruteghje a pupulazione. Sapemu ben sicura ch’è s’è noi apremu a Corsica senza priparà ci, l’avemu da pagà assai caru in termini di numaru di casi. Ùn vulemu micca ch’ellu ci sia una splusione in a Corsica sana di u numeru di casi di coronavìrus à u mese di sittembre.
Aghju mandatu una lettera à u Ministru Véran per ‘ssa affare u 23 di farraghju, ùn aghju dunque micca aspittatu à longu per riagisce. Po aghju avutu i scambii in visiucunfarenza incù Edouard Philippe, aghju inviatu i currieri, aghju dipostu l’amendamenti in ‘ssu sensu, perchè ci vole à pruteghje à u megliu è d’offre à i Corsi è à i visitadori un prughjettu u più sanu pussibile cù u scopu d’ùn ritruvà si micca in e situazione simile à u fuculaghju di cuntaminazione di Mulhouse.
A staghjone turistica pare dighjà guastata. In a so 5nota di cunghjuntura misinca annantu à a Corsica di u mese di marzu, a Banca di Francia stima à 130 punti di parcentuali a calata d’attività rispettu à u mese precedente di l’attività di l’alloghju è di a risturazione. E previsione per u mese d’aprile è aldilà sò assai pessimiste. Chì suluzione avanzarete per risponde à ‘ssa crisa ?
Ci vole bè à capisce ch’è semu in una situazione fora di norma chì scappa à ogni gistione nurmale. Ci vuleria, di sicuru, esunerà di cariche l’imprese, chì ùn si pò pinsà ch’è elle rimbursaranu : ùn puderanu micca. Ci vole dinù à sparghje i rimborsi di l’impristanze bancarie, hè un’evidenza. Ma tuttu quessa, hè di sparadrap. Aldilà di misure ch’è eiu vengu da cità, ci vulerà à prucede à a recapitalisazione di l’imprese per dà li un pocu d’ossigenu, di modu chì elle possinu recumincià, principià i so invistimenti, ch’elle possinu emette l’azzione cumprevule à e quale u Statu puderia sottuscrive, sò cose chì sò pussibile. Infine, ci vole à imaginà a pulitica di rilancia. Ci vole à cuntrastà à u cume i puteri publichi anu da inghjettà liquidità in l’imprese. Sò di quelli chì avucanu per mobilizà i fondi dispunibili in l’imprese à forte valore aghjuntu ciò chì, per effettu di leva, averà un effettu dinamicu annantu à a crescita, pensu à u BTP, ma dinù à l’energie rinuvelevule, ben sicuru, chì anu un doppiu avantaghju : crià l’impiegu è limità l’esciuta di capitali per a compra d’idrocarburi. Senza trattà d’altre misure, in particulare u ritornu di l’industrie bio-sanitarie ch’è l’Europa hà lasciatu corre ver’di a China.
In A Tribuna di u 17 di aprile, pregate per un novu mudellu ecunomicu : circuitu cortu, invistimenti massicci à a scala europea, transizione eculogica, custruzzione è turismu durevule. Cume declinà ‘ssu mudellu à a Corsica chì si situeghja oghje in u tuttu-turisimu ?
Ci hà da vulè à rimette in causa uni belli pochi di fundamentali. Una volta ch’è omu hà dettu quessa, omu ùn hà niente à dice, è si ùn ci hè micca furtissima vulintà pulitica, ùn si passerà nulla. Listesse cause caghjuneghjanu listessi effetti. Si rimpatrieranu di sicuru une poche di industrie sanitarie, ma quessa s’arristerà quà. Ci vole un cambiamentu à a scala europea. A Francia deve pesà in Europa è l’Europa pesà in u mondu. Ci vole a avucà per l’econumie più territuriale, più lucale incù menu d’apertura quinci è cullandi. Aghju sempre difesu l’apertura à pattu chì ella sia raziunale è ùn minacciessi micca certi sittori. Ci vole à vultà versu di l’attitudine individuale più dolce, da a pulitica fiscale per indettu per incità à e muvilità dolce. Ci vulerà à spinghje annantu à l’energie rinuvevulle, rivalurizà u travagliu agriculu. M’hè incuncipibilu ch’è l’agricultori ùn si ne sortessini micca perchè omu li paga a so produzzione una miseria.
A storia di a Corsica hè longa. Hè stata indipindenta po cunquistata da l’arme. U guvernu corsu avia fattu sforzi tremendi ver’ di a demucrazia, ciò chì era cunsiderevule à l’epica postu chì ellu avia una custituzione, u suffraghju universale è ancu a siparazione da i puteri à u mumentu induve l’Europa sana era sottu à a munarchia di dirittu divinu. Tuttu hè statu truncatu da l’arme è l’isula hè stata intigrata in senu à a più putente nazione di u mondu di l’epica è hà ghjuvatu solamentu, s’è eiu osu à dì la, di basa avanzata in mare Tarraniu. Dopu tandu, alcunu sforzu ùn hè statu fattu è a Corsica hè statu piazzata sottu à amministrazione militaresca. Omu hà campatu di l’artigianatu, di u travagliu intensivu di a tarra è tuttu quessa hà splusatu quandu ci hè statu a 6Granda Deflatzzione, ci hè statu un’attrazzione di l’Imperu è di a metropoli, è di una pupulazione di 300 000 abitanti assai sò partuti. Dunque u sviluppu di a Corsica s’hè mal’iniziatu da a partenza, ritardu ch’è a Granda Guerra hà compiu di scavà, à u mumentu induve 12 000 cumbattenti isulani duvianu more (Ndar : annantu à 40 000 mubilizati). A Corsica di 1914 hè attiva, ci hè l’agricultura, la ghjente travagliava in paesi chì eranu pupulati, la ghjente avia una cultura. A Corsica di 1918, hè quella di a machja onniprisente, e veduve, è di e bestie acciaccate chì l’omini eranu à u fronte. S’entre in un’econumia artifiziale induve tuttu u mondu campa di pinsione di guerra. Da tandu, cosa hè fattu ? Semu un mercatu perifericu è ùn femu nulla.
Oghje ciò chì ci vuleria hè chì i ghjovani corsi possinu travaglià chivi, è pruspirà ci, avanzà in a ricunquista di u mercatu internu è esce di l’econumia residenziale. L’econumia residenziale funziuneghja assai bè per certi, ci hè assai ghjente chì viaghja in Porsche, chì travaglia assai duru mentre 3 – 4 mesi à l’annu po chì, u restu di l’annata, si ricciuleghja e mustacce. L’ecunumia residenziale dà d’assai bon risultati per uni pochi, ma ùn hè micca un mudellu di sviluppu è esce ne hè difficiule perchè ci sò gruppi d’intaressi chì sò in piazza, perchè in a sucità corsa ci sò aspetti negativi annantu à i quali ùn insisteraghju micca, chì venenu insità annantu à quellu mudellu è ch’ellu hè difficile d’esce ne. Noi, pruvemu d’iscrive ci in un mudellu chì ci parmitteria d’esce di ‘ssu mudellu bandarecciu.
Per dà una risposta à ‘ssa crisa ci vole, à u mo sensu, fà cuincidà l’inghjochi culturali è suciali incù l’inghjochi ecunomichi.
Intarviste fate da Forteleone Arrighi, Ghjuvan’Santu Battestini, Antone Casalta è Marc’Antonu Colonna D’istria.
Illustrazione : Rose Luciani