Bastien Régnier avia 20 anni in lu 2017. Per a campagna prisidenziale di st’annu 2017, era un militante attivu di u Fronte Naziunale, u principali partitu di a dritta radicale francese. Quantunque, ùn hè un militante urdinariu : impegnatu in lu partitu dapoi à parechji anni, frequenta l’alte sfere di u partitu. Si vede fidà responsabilità, à u puntu ch’ellu hè sceltu pè esse u rapprisintante di u FN pè u so dipartamentu. Diventa una di e faccie di a nova ghjuventù fruntista, in un partitu di sdiavulizzazione custante.
Quandu i rializzatori Mathias Théry è Etienne Chaillou anu cumminciatu à suvità à Bastien per sta campagna, anu scupertu un ghjovanu adultu prontu à vestasi di u custumu di puliticanti, istituziunale, inghjentilatu, fendu fronte à e so ubligazioni à u Fronte Naziunale. Bastien avia da cuncilià e so ambizioni pulitiche incù numerose prissioni, ma ancu affruntà un passatu scuru ch’ùn voleva più appiattà.
À l’ora induve Bastien face st’intervista, a diffusione di u filmu hè fortemente tuccata da a crisi legata à u coronavirus. U documentariu, isciutu à u principiu di frivaghju di u 2020, hè puru pristamentu ghjuntu à 60 000 intrate in Francia. Una prudezza pà un òpara di u generu, è cumpletamente cumprensibile, à u favore di un trattamentu dilicatu è astutu di u sughjettu.
Questione : Quandu i rializatori t’anu prupostu stu prughjettu di filmu, cume ai vistu iss’interessu per tè ? Ai avutu apprensione ?
Bastien Régnier : U filmu hè statu prupostu à a seguita da un raportu per France 3, chì Mathias Théry avia di ghjà fattu annant’a mè. Quandu m’anu prupostu di fà un filmu documentariu più prufondu, l’aghju vistu cum’è una cuntinuità. À stu mumentu, mi sò dettu chì stu filmu feria un bon filmu di propaganda per u Fronte Naziunale. Di più, quand’omu hà 20 anni è qualcunu prupone di fà un filmu annant’à tè, l’ego d’un ghjuvanottu dice « isiè, sicuru » !
Q. : Ùn ai avutu paura chì u filmu pigliessi un àngulu sprezziativu per tè o per u partitu ?
B. R. : Innò, perche à stu mumentu, eru realmenti cunvintu chì u filmu permettaria di mustrà chì u FN era sdiavulizzatu. Ùn pinsaiu micca chì c’eranu sculisci.
Q. : Ai avutu echi chi t’anu marcatu dopu à l’escita di u filmu ?
B. R. : Assai parsone m’anu dettu u so sustegnu, dicendu chì « La Cravate » hè un filmu furmidevule. Una parsunalità cume u Presidente François Hollande hà ancu cumentatu u filmu. Per mè, si tocca à parsone chì sembranu untuccabili.
Di a listessa manera, aghju avutu ritorni di prufessori. Aghju fattu un testimoniu d’assaltamentu di i mo prufessuri durante à mo scularità in « La Cravate ». Certi prufessori, scuprendu a mo storia, sò stati sinsibilizati a stu sughjettu scunnisciutu di l’assaltamentu trà allevi è prufessori.
Q. : Parechji avvenimenti sò discutati in u filmu, frà di elli, certi difficultissimi durante a to ghuventù. T’hà liberatu di stu passatu u to impiegnamentu à u FN ?
B. R. : Quand’è m’impegnu à u Fronte Naziunale, escu da u muvimentu « skinhead». Per mè, u Fronte Naziunale hè una via di fà una leia trà stu muvimentu d’apologia razzista, neu-nazia, à « giustu » un muvimentu fascistu e razzistu. Di più, u Fronte Naziunale t’hà un’immaghjine rispettabile di partitu ufficiale, incù eletti è ricunniscitu da assai francesi. Cumminciaiu à diventà un adultu, mi sò dettu chi u muvimentu di i Skinshead, hè solu bastone. U Fronte Naziunale mi parmittia di prulungà sta lotta ideulugica, incù l’idea di fà rinculà l’invasione migratoria, trà altri, ma ci vole à fallu incù a legge.
Quandu andò in Amiens pè lanciammi à u Fronte Naziunale à corpu, a ghjente ùn cunniscia u me passatu, per elli, eru giustu un frontistu incù idée streme. Di più, c’era u periodu induve u Fronte era in crescita [ind’a Somme, u dipartamentu di Bastien, u FN hà raccoltu 50% di i voti].
Ciò ch’hè statu realmente negativu per mè quantunque, era a mo scularità, sopratuttu e mo relazioni cù i mo prufessori dopu à u mo impegnamentu ufficiale à u partitu. L’ambiente di l’insignamentu hè più purtatu à a manca in generale, i prufessori m’anu fattu pagà st’impegnamentu quand’ellu era cunnisciutu. Mi surraccava cun’elli quand’è certi chjamavanu à vutà contr’à Marine Le Pen per e righjunali. Ùn si deve micca fà pulitica in classa. Facciu casu chi u prufessore ùn hè micca sopra un allevu, hè quì pà insegnà, per trasmesse u sapè. Pensu chì omu parla assai di l’assaltamentu trà alievi, ma mai di l’assaltamentu di un prufessoru contru un’allevu. L’insignamentu hè ancu l’assaltamentu di i prufessori contru l’allevi, incù pienu dirittu.
À a seguita d’issa situazione, aghju lasciatu a scola. Aghju cunnisciutu quantunque a stessa situazione quandu aghju circatu un’impiegu, u mo impegnamentu scummudava. Quand’omu s’impegna in pulitica, si mette in piriculu ind’a so vita persunale è u so avvene prufessiunale.
Q. : Pà ciò chì riguarda i to amichi è a to famiglia, si vede in La Cravate chi eranu pocu à fattu di u to passatu, è di u to veru impegnamentu à u FN. Cume s’hè passatu a filmera di u documentariu in stu contestu ? È a diffusione ?
B.R. : Per u mo passatu, hè simplice : tutt’a mo ghjuventù hè stata una bacia senza fine à i me parenti. Elli sapianu chì eru razzistu, ma ùn sapianu micca che eru in una mansa di skinheads. Sapianu ch’eru impegnatu à u Fronte Naziunale, ma ùn pensavanu chì, a notte, appiccicavu affisse, chi strampinavu u ghjornu, chì aviu respunsabilità ind’u partitu, chi frequentavu Marine Le Pen è Florian Philippot.
Aghju dumandatu chjaramente à i rializatori d’ùn micca mette i mo parenti in avanti, parchì sapiu chì c’era un prublema per elli di cunnosce a verità. Si dice sempre chì i zitelli suvitanu u caminu di i so parenti. I me parenti so genti chì odianu a pulitica, ùn parlanu mai di pulitica. Vuliu pruteghjeli di st’etichetta.
Eppò, u filmu hà presu un grande impurtanza. U me babbu impara l’esitenza d’issu filmu una settimana innanz’à l’uscita, a me mamma un mezz’ora avanti. Aghju chjamatu a mo mamma prima è aghju dettu : « Mamma, sapiate chi diciu bacii annant’à tante cose, avà vi dicu tuttu, vai à vede u filmu ». I me parenti anu scupertu cose, è sò stati attristati. Hannu dettu : « Comu si face chì avemu mancatu quessu ? Come si face chi ùn avemu micca vistu chì eri in pena ? ». Mi so isulatu è incatenatu in mente in manse estremiste, i me parenti ùn anu mai vistu à chi puntu. È cusì chi aghju capitu comu assai ghjuvanotti falanu, per esempiu, ind’u djihadismu, è parchì i so parenti dicenu : « ùn avemu vistu u nostru figliolu falà ». Capiscu cum’è issi ghjuvanotti accadenu à caccià quessu, ùn hè simplice, ma hè pussibile. Hè veramente qualcosa di cumplicatu à vede pè e cunniscenze. Quand’è semu veramente impignatu in qualcosa, è chi pensemu chi a nostra famiglia pò esse un frenu, avemu una doppia persunalità.
Q. : U filmu attaca eventi marcanti di a to ghjuventù. Quand’è t’avii 13 anni, ai prugettatu un’arcusgiata contr’à to culleghju. Comu t’hè vinuta l’idea di un attu tantu estremu ?
B. R. : C’hè qualcosa ch’aghju dapoi luntanu in mè, hè l’odiu di l’inghjustizia. A stu mumentu, viviu l’inghjustizia in l’ambiente sculare. È à st’epica, per mè, un inghjustizia duvia essa pagata. Pinsaiu chi i me prufessori eranu contr’a me. Chjamavanu i me parenti per spiegà ch’eru un scularacciu, i me parenti mi surraccavanu, dunque mi sintiu abbandunatu, ùn pudiu micca parlanni incù adulti. Tutt’e parsone intornu di mè, i me parenti, i mo prufessori, ùn pudiu micca dumandalli aiutu. I me amici puru ùn mi sustinianu micca. Ùn aviu più nimu à chi parlà.
À stu tempu, e sole cose che faciu ind’è mè era ghjucà ai videoghjochi è fighjulà a televisione. Sta perioda hè una perioda d’arcusgiate ai Stati-Uniti, di amazzamenti di massa. Eramu in l’annu 2009. Vidiu ghjuvanotti chi amazzanu e so cunoscenze, i so camaradi. Mi sò dettu chi sti ghjuvanotti vivenu a matessi cosa di mè è chi hannu truvatu a soluzione. Mà ciò ch’hà fattu a differenza, hè ch’aghju presu cuscienza chì era una cunneria. Socu arrivatu davanti à u cullegiu incù a mo arma, è aghju vistu una vitturia di pulizia. Ùn era micca quì in leia cù l’arcusgiata, rientrava sicuramente à a caserna. Ind’è mè, aviu una cullezione di piccule vitture è camiò di pulizia, è mi piacia e valori legate à stu mondu. Andaiu per ritruvarmi in fronte d’isse ghjenti, chi ammiravu, tiralli à dossu, quand’ùn avianu fà nunda di male, è mi fà tumbà da elli. Alora, aghju lasciatu a mo arma. I me parenti m’anu truvatu è m’anu purtatu à a ciandarmarìa.
À partasi da quì, a situazione hà presu un impurtenza mediatica. Ancu François Fillon [Primu Ministru sottu Nicolas Sarkozy] avia riaghjitu. Socu una di e cause chi facenu chì, oghje in Francia, i ghjuvanotti pudenu esse giudicati ha parti di 13 anni, contr’à 15 anni innanzi.
Q. : Chi eranu e cunsequenze per tè dopu st’eventu ?
B.R. : U giudice chi era in carica di u me casu aveva trè soluzioni : prima, inviammi in centru d’educazione chjosu, una prighjone per zitelli, in brevu. Secondu, piazzammi ind’una famiglia d’accoltu. Terzu, lasciami turnà ind’è mè solu cù un’amenda per portu d’arma fora di leghje, a sola cosa chì pudia rimpruverammi, perchè ùn aghju micca usatu u me fucile.
U giudice hà vistu chi ùn eru micca un deliquente, dunque u centru saria statu una soluzione troppu forte. Quantunque, hà troppu prissioni annant’à ellu per lasciammi turnà ind’è mè solu incù un’amenda. A soluzione scelta sarà a famiglia d’accoltu, senza sapè chi sarà u peghju sceltu in realtà. Ghjuntu in sta famiglia d’accoltu, unu di i zitelli di a famiglia facia parte di una mansa di skinheads, ch’aghju raghjuntu, è incù saraghju dopu impignatu in baruffe è atti razzisti. Stu piazzamentu hà tuttu impighjuratu per mè.
Q. : Dapoi à a fine di u periodu di e presidenziali, sì impegnatu incù u partitu Les Patriotes di Florian Philippot [anzianu secondu di u Fronte Naziunale]. Comu si passa stu novu impignamentu dopu à a to esperienza à u FN ?
B.R. : Prima, ci vole a sottulineà chi, à i Patriotti, simu tutti cuntenti ch’issu filmu esistessi. S’è u filmu mostra Florian Philippot è Eric Richermoz cum’è communicanti di a pulitica frontista, in a realtà, anu suffertu cum’è mè di e dumande di u FN. Eric vive prissioni da sopra, minacciandu di scantallu s’è ùn rispundia micca curretamente. Anu rispettatu e regule, sapianu cum’è mè chi c’eranu tante cose negative. C’era stu fondu xenofobu, chì mi piacia tantu prima. So vinutu per quessu. Ci sò ghjenti cum’è Florian è Eric chi m’anu fattu capì ch’ùn sò micca i migranti u prublemu. Elli, eranu quì per u Frexit, a surtita di a Francia di l’Unione Europea. M’anu dettu : « Sò realmente 10 000 migranti chi facenu chì a Francia sarà distrutta culturalmente ? Chì u nostru paese si sfonda sottu i debiti, chì u disimpiegu scoppia? ».
Quand’è diciu : « Ci n’hè abbastanza d’issi arabi, ci vole à sbarazzassi d’elli », unu di elli era sempre quì per fammi rimarcà chi ùn hè micca u veru prublema. Grazie à elli, aghju capitu chi, tutt’a me vita, ùn mi so battutu contr’à e bone parsone, ma contr’à disgraziatu. Dunque l’aghju suvitati quand’è u FN s’hè spartitu in dui.
Oghje, dopu ad avè cunnisciutu a realità di a dritta radicale, sò finalmente in’un partitu chì vedu cum’è democraticu è sanu. Omu pò esse d’accunsentu o micca incù l’idea di u Frexit, hè una cosa, ma ùn c’hè nunda di malsanu in’issu dibattitu. Ùn c’hè micca xenofobia, micca bacii, hè demucraticu. Ogni membru pò purtà idee, Florian Philippot ùn hè micca u « Capu » altissimu, ùn pò micca impone qualcosa contr’à l’opinioni di a maiò parte di u gruppu. Di più, u gruppu difende l’idea di l’antisistema, di a pulitica di circunstanza. Ùn hè micca una categuria di pupulazione attaccata.
Q. : Cume ti prughjitti u to avvene avà ?
B. R. : A prupositu di u me avvene, aspettu una capiscitura di certe parsone cuncernandu a mo dimarchja incù u filmu. M’aspettu ad esse inculpatu di cumprammi un immaghjina grazie à u filmu.
Pensu chi piglià u rìschiu di dichjarà publicamente : « Ùn so più un fascistu avà », allora chi, in realtà, ùn aghju micca cambiatu, hè a pessima di l’idee. Vogliu veramente cambià e cose.
Vogliu sottolineà ch’aghju fattu un filmu chì mostra a me vita à palesu, senza filtru. È hè ciò chì mi mette in periculu, specialmente à causa di e mo anziane cunniscenze skinheads, chì mi pudarianu vede cum’è una minaccia, perchè sò cose cumprumettanti per elli.
Q. : S’è duvii dà un cunsigliu à un ghjuvanottu chi vole impegnassi in pulitica, senza parlà di campu specificu, chì li diciarii ?
B.R. : Pensu chi, per ogni parsona chì vole impignassi in pulitica, ma ancu per vutà, ci vole à fà qualcosa di simplicissimu : ci vole à dumandà à qualcunu chì ti hè vicinu di piglià tutt’i prugrammi è di leghjeli, senza cità i nomi di i capi o dei partiti. A parsone mette una croce ogni volta chì semu in accordu cù un’idea. In fine, puderemu vede incù chi prugrammu simu di più in accordu, è di conclude : « s’è vogliu veramente impegnammi in pulitica, hè per isse valore, è devu turnammi versu à stu muvimentu ». Oghje, assai parsone sò interessate da l’immaghjine di un leader, è in generale suvitemu u capu per un’idea precisa, chì rapprisenta una parte piccula di u so prugramma.
Parolle raccoltate da Lea Ferrandi.
« La Cravate » di Mathias Théry è Etienne Chaillou, in sinemà à partasi di u 5 di febbràiu di u 2020.