Intarvista di campagna : ENZO MARTEL, GHJOVANU capilista pà l’alizzioni municipali di a cumuna di FURIANI

L’interviewer – « Bonghjornu à tutti. Aghju u piaceri, oghji, di prisintavvi l’intervista
di un ghjovanu candidatu à i municipali pà a cumuna di Furiani. Si chjama Enzo MARTEL, hè capilista pà l’alizzioni di marzu di u 2020. Enzo, bonghjornu. »

Enzo Martel – « Bonghjornu, a ringraziavvi pè a vostra pruposta d’intervista. In corte parolle, vulerìa presentà mi. Mi chjamu Enzo Martel, aghju 23 anni è sò titulariu d’un diploma di Scenze Pulitiche ottenutu à l’Istitutu di Studii Pulitichi d’Ecchisi. Aghju sceltu d’esse candidatu à l’elezzione municipale di u 15 di marzu in Furiani pè purtà un altra strada pè a me cumuna, quella di una ghjuventù impegnata pè u solu bè cumunu è pè l’amore di a so terra. »

L’interviewer – « Quali sò i raghjoni di a to candidatura annantu à issa cumuna ? Ci ai qualchi radichi ? »

E.M – « Ci sò duie raghjoni principali à st’impegnu : una ragione persunale è una ragione sucietale.

Prima di tuttu, vulerìa dì chè eiu sò un zitellu di Furiani. Cunnoscu à Furiani perchè aghju sempre campatu quì. È cum’è ogni zitellu di a mo cumuna, aghju ingrandatu à e so scole, aghju amparatu i valori d’ugualità, di sulidarità è quelli di travagliu. Oghje st’affettu pè Furiani m’anu cunduttu à campà sta bella andatura umana pè fà u Furiani di dumane.

Ma da un puntu di vista puliticu, a nostra indiatura si spiega da un custattu : Furiani hè cunsideratu cum’una cità annessa di Bastia, cum’è un simplice locu di passaghju.  Furiani hà a so prupria identità, cù a so ricchezza umana è patrimuniale è cù a mo squadra avemu riflettutu à valurizà nostra cumuna, è ancu à fà cresce un sentimentu di fiertà d’esse Furianincu. »

L’interviewer – « Intarissemuci à a to dimarchja. Qualessu hè u prufilu di i to candidati? Dritta/Manca/FN/Naziunalisti ? »

E.M – « Cù i mo culistieri, avemu decisu di presentà una lista senza etichetta chjamata « Tutti Furianinchi – Tous Furianais ». Sta squadra hè cumposta di donne è d’omi cù percorsi prufessiunali è pulitichi diversi. Noi simu tutti uniti pè difende i listessi culori, quelli d’un partitu chì si chjama Furiani.

Ind’è sta lista, si trovani cunsiglieri municipali di sperienza di a maghjurità – Stéphane ROMITI – è di l’uppusizione Jacques VIACAVA è Marie-Jeanne ANTONELLI-. Si trova dinù persone chì sò impegnate à livellu puliticu è sindicale ma sopratuttu persone nove chì sò venute pocu fà. Ste donne è st’omi, ch’elli sianu ghjovani o menu ghjovani, si sò trovi daretu à i listessi valori, daretu à una manera di pensà u Furiani di dumane. Tutti spartenu u penseru di l’interessu generale. »

L’interviewer – « Ai sceltu di parlacci di un temu pricisu. Parlacini un pocu ! »

E.M – « Nanzu di parlà d’un tema in particulare, vuleria spiegà a dimarchja chì ci anu permessu di custruice u nostru prugramma. Si vede ch’un core di cità ùn hè stata mai pensatu da veru, chì u paese, u core storicu di a cumuna eppuru, hè statu abbandunatu, è chì ci ferma da fà in materia d’accuncciamentu di u territoriu, di l’ambiente, di creazione di leia suciale è ind’è u duminiu culturale, incù a mo squadra avemu sceltu di prupone un antru Furiani à l’abitenti. Per quessa, simu andati à scuntrà ci trà lugliu è dicembre per ascultà li è custruice à partesi di i so attesi, un prugramma.

Stu prugramma si chjama CASA in referenza à a casa cumuna. Perchè CASA ? Perchè a merria hè un locu chì appartene à ogni citatinu di a cumuna. Aperta à tutti, a casa cumuna hè dinù è sopratuttu un locu induve si pò sente, sente si, participà è trasfurmà a sucetà.

CASA hè dinù un acrunimu chì vole dì : Cumunità, Ambiente,Suciale, Adolescenti/Adulti/Anziani. Hè annantu à ste tematiche maiò ch’avemu travagliatu è furmulatu assai pruposte.

Per ripiglià unu di i prughjetti strutturanti di sta campagna, parleraghju di l’emergenza d’un core di cità. S’è stu core di cità, chè no feremu trà u giratoghju di a merria è quellu di a strada naziunale 193, ùn hè mai stata imaginata in Furiani, apparisce oghje cum’è indispensevule di creà e cundizione di a so realisazione. A messa in opera d’un pianu cumunale d’azzione core di cità permetterà di risponde à una doppia ambizione : megliurà e cundizione di vita di l’abitenti è cunfurtà u rollu ecunomicu mutore di Furiani. Per pervene ci, prupunimu l’accuncciamentu d’una pista à velò chì permetterà di rilegà i quartieri trà d’elli, a messa in ballu d’un campu numericu cunnettatu, un novu accucciamentu di a traversa Vendasi è a vegetalisazione di st’assu maiò di circulazione. Per quessa, aghjusteremu a messa in piazza d’un terrenu di bocce cupertu è favurizeremu a creazione d’un eco-quartieru incù un parcu vegetalizatu apertu à tutti. A qualità di vita ferma l’imbusca cruciale di st ‘elezzione, noi pudemu purtà cù vuluntà stu prughjettu u più durevule per guarantisce a qualità di vita. »

L’interviewer – « Quali sò l’elementi da migliurà annantu à issu temu par rapportu à u travaddu di iss’ultimiseianni ? »

E.M – « Campà in cumunità, ghjè sapè campà inseme. Hè dinù rispettà l’ambiente induve no campemu. Per què, hè impurtente di ridà à Furiani lochi di vita è di scambii. U Puliticu ùn pò risolve ogni quistione, ma hà per missione di prupone accucciamenti, di mette in opera i pulitichi publichi chì permettenu di megliurà a vita d’ogni ghjornu. Deve permette a leia suciale esistente di mantenesi è di cuntribuisce à u so sviluppu. U prughjettu chè no purtemu hè quellu d’un Furiani durevule, fieru di a so identità è di e so radiche. Un Furiani ind’è u quale tutti l’abitenti, pocu impreme l’età, possi truvà ind’è u Merre è a so squadra un’arechja attenta. »

L’interviewer – « Era un piaceri d’avecci prisintatuuna parti di u to prugramma. Avvedaci!»

E.M – « Vi ringraziu per a sullicitazione. Era un piacè tamantu. Chì Rivista Tempi campi cent’anni è ancu di più. À prestu ! »

L’altra lista candidata hè cundutta da Michel Simonpietri, merri surtenti.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.