« A maffia, un frenu pà l’emancipazione naziunale ? »

Era u titulu di u cuntrastu urganizatu in Corti da a Ghjuventù Indipendentista u 18 di farraghju, mentre i Scontri internaziunali di a ghjuventù in lotta. Pà discorre ingiru à u tema di a maffia, si sò adduniti raprisintenti di i cullettivi Massimu Susini è A maffia nò a vita iè è una delegazione di a Fajdda, un organisazione independentista siciliana.

À l’iniziu di u cuntrastu, Ghjuvansantu Plasenzotti, u raprisintente di u cullettivu Massimu Susini ci ramenta chì, benchì a situazione corsa sia diversa da quella di a Sicilia, a parolla « maffia » hè divintata una parolla internaziunale chì currisponde à un’organisazione chì si vole piglià u putere, « un mondu illegale chì si vole impatrunisce di u mondu legale ». Issa definizione, à u centru di un cunflittu semanticu i mesi passati, ùn hè micca stata curretta o cuntraditta da l’altri participanti.

Dopu à une prisintazione corta di l’invitati, sò state poste duie dumande chì anu strutturatu u cuntrastu.

Prima, cumu hè chì ci hè una cultura di u maffiosu in Corsica è forse in Sicilia ? Sicondu à Dumenica Bianconi, di u cullettivu A maffia nò a vita sì, d’un puntu di vista storicu, ci hè statu un esiliu di i Corsi par via di a puvertà è i maffiosi eranu quelli chì a facianu à avè una vita più bona, à riesce in altrò prima di vultà in Corsica. Ghjuvansantu Plasenzotti ùn hà micca u stessu parè : ci hè una cultura di l’arme in Corsica parchè ci vulia à esse militare innanzu pà riesce ind’un paese povaru. Dopu, u muvimentu naziunale hà fattu nasce una burghesia chì ùn esistia micca, cumposta da capi naziunalisti, chì anu messu in anda u prughjettu di « rende più ricche certe parsone », più putente oghje cà prima par via d’issu cambiu. A cultura di u maffiosu hè liata à un doppiu fenomenu : u muvimentu naziunale hà sirvutu l’intaressi di a burghesia corsa, chì hà bisognu d’un sirviziu armatu avà. D’un’altra parte, issa cultura hè quella di u stintu di a morte, di u putere è nasce d’un pinsamentu fascistu postu chì maffiosi pensanu ch’elli sò più cà l’altri.

A siconda dumanda era di sapè s’ella ci era l’omertà in Corsica è s’è i dui cullettivi aspittavanu da a ghjente ch’ella palisessi i maffiosi. Dumenica Bianconi hà rispostu chì u silenziu di i Corsi era un silenziu di paura è di sfidu. Pensa chì ci vole à palisà i fatti pà dumandà l’aiutu di a ghjustizia, micca e parsone, parchè ùn avemu prove. Pà Ghjuvansantu Plasenzotti, u Corsu chì ùn parla micca hè un mitu, un mischiu di realità è d’invenzione è ùn ci hè omertà in Corsica. U putere di a maffia hè un putere in furmazione è ci vole à dalli una risposta cullettiva pà cumbatte issa forma di cultura induve i debbuli morenu è i più forti cumandanu. Tandu u discorsu publicu ghjova à impedisceli di divintà più forti.

A so riflessione nantu à a maffia, Ghjuvansantu Plasenzotti l’hà spiecata parechje volte dapoi u mese di sittembre, quandu Massimu Susini, u so nipote hè statu tombu in Carghjese. D’uttobre, un mese dopu a morte di Massimu, ci dava di più precisione nant’à a so interpretazione di l’assassinamentu di Massimu è a so visione di a situazione pulitica in Corsica :

            Carghjese, 29 d’uttobre di u 2019

U 12 di sittembre, u vostru nipote, Massimu Susini, hè statu tombu in Carghjese nant’à u so locu di travagliu, da luntanu, da una o parechje parsone piattate. Massimu hè prisintatu da quelli chì u cunniscianu cum’è un travagliadore, un patriottu corsu chì avia un’etica è u sensu di a ghjustizia. Tandu, chì sarianu e ragione di tumbà à un omu cusì ?

Ghjuvansantu Plasenzotti — Ghjustu à puntu, sò e so qualità chì anu fattu a so morte. Parchè era un omu chì s’uppunia à un gruppu di gattivi sughjetti, prima, chì si vulianu impatrunisce di u travagliu di l’altri, chì si vulianu impatrunisce di ciò ch’ùn hè micca soiu è chì pensanu chì l’altri devenu esse à u so sirviziu, chì avendu un certu putere fundiatu nant’à a paura, nant’à una forma di terrurisimu, pudianu elli fà di Carghjese u so tarritoriu, cum’è si diciaria ind’è u medievu, cum’è signori chì si facenu un tarritoriu pigliendulu à e cummunità dicendu « avà hè meiu è avà avete da travaglià par mè ». Massimu s’hè oppostu à issa ghjente quì à nome di i valori chì u purtavanu à esse un patriottu. Hà dettu : « in Carghjese què ùn si pò micca passà fintantu ch’e sò quì ». È dunque hè statu tombu parchè impedia à certi di fà di Carghjese un tarritoriu maffiosu.

Dopu à u so assassinamentu, un cullettivu Massimu Susini hè statu creatu. Sicondu voi, sarà abbastanza pessima a situazione pà fà chì a ghjente sia ubligata à mubilizassi ?

A prova ch’ella hè una situazione pessima hè chì ci hè un omu di 36 anni ch’hè statu assassinatu quand’ellu andava à travaglià a mane. Vale à dì chì oghje in Corsica, esse à l’ora à u so travagliu, esse un omu curaghjosu, esse un omu unestu, ùn hè più una qualità, ghjè un difettu chì vi face more. Dunque iè, a situazione hè pessima oghje è piglia un versu assai periculosu pà l’inseme di a nostra sucetà. Una, chì u tarritoriu di Carghjese ùn avia mai cunnisciutu fatti simuli : inde a storia di Carghjese ùn esiste micca què. Dui, hè chì ci vole à sapè chì Massimu era un patriottu è ùn avemu micca cunniscenza, inde a storia di a Corsica di un patriottu ch’hè statu assassinatu da a maffia, direttamente da a maffia è po tombu parchè a maffia si vulia piglià un tarritoriu. Vole dì chì hè l’ideale di st’omu ch’hè statu tombu è dunque ghjè un missaghju chì hè statu lampatu à l’inseme di tutti i Corsi. Eiu dicu sempre chì hè statu un missaghju di minaccia di morte chì hè statu lampatu à u vechju populu corsu parchè sò i valori di u vechju populu corsu chì muvianu à Massimu è chì facianu ch’ellu pudia esse un resistente. Issu vechju populu, a maffia u vole rimpiazzà, u vole fà sparisce pà mette una pupulazione à a piazza, pà pudè munghjela. Una pupulazione sottumessa da esse munta cum’elle sò munte e pecure.

Di quale saria a rispunsabilità ? Saria una situazione d’imputenza di l’eletti, è di manera più precisa, di i naziunalisti ?

E rispunsabilità in prima sò di quellu chì t’hà a putenza publica, vale à dì chì t’hà e capacità di fà move a pulizza, i ghjudici, i servizii di rinsignamentu… Invece chì un fenomenu maffiosu hè crisciutu in Corsica malgradu ch’è no avissimu a prisenza pulizziera a più forte di tutta a Francia. Ghjè a prima cosa.

A siconda, hè chì l’eletti naziunalisti sò à u putere dipoi 2015, dipoi 4 anni, è chì issu fenomenu hè crisciutu mentre chì i naziunalisti, chì eranu una speranza maiò pà u populu corsu, sò à u putere. Ci hè calcosa ch’ùn và micca. Accantu à què, ci vole à ricunnosce dinò chì issu fenomenu esiste dinò è s’hè spartu parchè a cultura corsa s’hè indebbulita, i valori corsi di resistenza è d’altri d’altronde, si sdrughjenu pianu pianu è quì l’eletti naziunalisti portanu a responsabilità chì ùn anu micca aiutatu, dipoi 4 anni, a cultura corsa, a civilità corsa à piglià forza. Anu fattu parechje cose chì eranu assai simboliche ma inde u cuncretu, ùn ci hè statu nulla pà rinfurzà a cultura corsa. Invece chì à u cuntrariu, a prisenza naziunalista, hà datu una legitimità à l’emergenza di una burghesia corsa, putente, chì t’hà un putere finanziariu è ecunomicu ch’ùn hà mai avutu sinamente à avà è issa putenza ecunomica di a burghesia corsa, hè liata di manera naturale à elementi maffiosi. Allora, di chì manera ? Sò parechje e manere, ma diciaremu chì a sucetà corsa, ùn hà più e forze d’opponesi à un putere maffiosu. In tutti casi, hè ciò ch’è no pinsavamu sinamente à avà… ciò ch’ellu face u cullettivu, dà una speranza ma ùn pò micca bastà, hè capita. Ma in più di a rispunsabilità di u statu, ci hè quantunque calcosa chì face chì isse bande chì eranu bande criminale cum’elle ci ponu esse in parechji paesi, in tutti i paesi è tutte e sucetà, si sò avviste chì a sucetà corsa ùn avia micca a forza d’opponesi à elle. È tandu, si sò messe à avè ambizione più cà d’esse bande criminale, ma d’esse u veru putere arcanu di a sucetà corsa, vole dì u veru putere quantu chì l’eletti, ùn devenu più esse cà quelli chì sò i raprisintenti di u veru putere.

Lasciate un cummentu ?

Ce site utilise Akismet pour réduire les indésirables. En savoir plus sur comment les données de vos commentaires sont utilisées.