U Nordu di a Siria s’infiamma, imbusche è perspettive

Elementi di cuntestu

Dapoi u principiu di u mese di ferraghju, e forze regulari siriane sustenute da a Russia anu pigliatu più di 1500km2 à u levente di a cità d’Aleppu, tagliendu vie di cumunicazione impurtante per a cualizione islamista Hayat-Tarir al-Cham. E cunsequenze dirette di quella operazione sò chì guasgi 1 millione di civili refugiati in e zone ribelle si sò affacati à i cunfini di a Turchia per fughje i bumbardamenti russi è siriani. A Turchia dinù hà riplicatu mandendu arme, munizioni è suldati per cuntene l’avanzata di l’armata regulare.

L’intervenzione turca era senza sucessu sin’à u 26 di ferraghju, quandu l’armata siriana s’hè sbagliata è hà attacatu u meziornu di u fronte d’Idlib. Hà dunque lasciatu senza difesa a cità strategica di Saraqib ch’hè un cità chjave per e cumunicazione frà Damascu è Aleppu. Una operazione di l’armata turca è di i rebelli anu riescitu à piglià u cuntrollu di a cità, tagliendu questa via di cumunicazione, ciò chì permette di prutegge a “capitale” de facto di l’islamisiti d’Idlib ch’era minacciata da l’armata regulare.

È per aggravà u tuttu, 36 suldati turchi sò morti u 27 di ferraghju in un bumbardamentu chì pare esse l’opera di a Russia, fendu cresce a pressione frà a Russia è a Turchia, ch’avianu relazioni curdiali malgradu l’interessi opposti in Siria. A luna di mele sarebbe finita ?

L’imbusche esterne è interne di a Turquia in Idlib

L’imbusche per a Turchie sò doppie : à l’internu, u puteri d’Erdogan hè cuntestatu da parechji turchi chì pensanu chì u presidente ùn hè capace di risponde à a crisa currettamente. Sò numerosi à criticà l’azzione di u presidente à prupositu di l’accoglie di 2.7 millioni di refugiati siriani. U costu ecunomicu hè largu è e tensioni frà i refugiati è i turchi sò forte. S’è fussi una disfatta tutale di i rebelli in Idlib, sarebbe più di 1 millione di refugiati putenziali chì si n’anderianu in Turchia, ciò chì metteria Erdogan in una situazione difficiule. Impedì à l’armata regulare di ripiglià u cuntrollu di sta regione hè une quistione di sicurezza interna. Evitassi una nova crisa di i refugiati in u so paese, chì puderia trasfurmassi in una crisa pulitica è umanitaria.

À l’esternu, una disfatta tutale di i ribelli in u nordu di a Siria marcheria a fine di u prughjettu d’ispirazione neuottomanu d’una grande regione d’influenza à u meziornu di a Turchia. Di più, u prestigiu internaziunale di a Turchia seria dannighjatu à longu andà. Erdogan, chì tene sempre discorsi armigueri ùn pare riagì di pettu à a Russia è si cuntenta d’accusà à Assad per a morte di i 36 suldati turchi u 27 di ferraghju in un bumbardamente, chì, ci pare, hè l’opera di a Russia. Per u mumentu u paese si face umilià da a Russia chì rivindecheghja u dirittu di a Siria à lottà contra u terrorismu in u so propiu paese, suldati turchi o nò.

A fine di l’intesa curdiale frà a Russia è a Turchia ?

Dapoi u 2016, a Russia è a Turchia ch’eranu assai opposti in a guerra civile siriana anu fattu a scelta di ricaldà e relazioni in lu scopu di truvà una soluzione à u cunflittu. In e parechje riunioni di i paesi membri di u prucessu d’Astana (Russia, Siria, opposizione siriana, Turchia, Persa, Stati Uniti) a Turchia era orgugliosa di parlà d’uguale à uguale cun a Russia, ch’era per ella un segnu di putenza.

Tandu, pare avà chjaru chì st’intesa curdiale frà a Russia è a Turchia era solu una truccu giupuliticu per sfruttà di e discordie frà a Turchia è l’altri paesi membri di l’OTAN per piglià vantaghju in Siria è fà vince u guvernu sirianu. Cume omu hà creditu veramente chì sti duie paesi, chì tuttu oppone puderianu esse alleati ? Sò opposti in Siria è in Libia. Unu sustene à i ribelli, l’altru à Assad. À quale sustene u guvernu riconnisciutu da l’ONU, l’altru à u generale Haftar. A Turchia hè membru di l’OTAN, nemicu strategicu di a Russia. Oramai, a Russia hà menu bisognu di a Turchia chì a vittoria d’Assad in Siria pare evidente. Piglia allora l’iniziative è ùn si piata più. Bumbarda e truppe d’Erdogan, ùn rispetta l’accordi cunclusi. A Russia sà ch’a Turchia ùn pò più nunda : e so relazioni cun l’altri paesi di l’Occidente sò troppe deteriurate avà per chjamà à la riscossa. Tandu, s’usserva un riscaldamentu di e relazioni frà a Turchia è i Stati Uniti queste ultime settimane. Mostreria ch’a Turchia principia à capì ch’ella hè stata manighjata da a Russia ? Difficiule da dì per u mumentu. I Stati Uniti ùn anu accittatu d’aiutà i turchi ricusendu a richiesta di missili patriot per pruteggessi da l’aviò russi. In fatti, i SU cundiziuna l’aiuta à a lascita di a comprera di missili russi S300. Ciò chì lascia a Turchia in una situazione delicata : deve truvà un accordu cun una Russia troppa putenta per ella.

E cunsequenze di l’incapacità di l’Auropa à riagì

Di pettu à quella situazione di crisa umanitaria pussibile, l’Auropa hè stata zitta. E qualchè chjame à a fine di i bumbardamenti sò debule è ùn impediscenu micca a Russia è a Siria di seguità a so offensiva. U veru risicu à cortu andà seria chì centinaii di millaii di refugiati si andanu in Turchia per pruteggessi di i cumbatti è chì a Turchia, ch’accoglie già 2.7 millioni di refugiati li mandanu tutti ver’ di l’Auropa. Pruvucheria una siconda crisa di i refugiati cum’è l’avemu vistu in u 2015. Ricordemu ci chì 5 anni fà, i paesi auropei eranu fortamente divisi annant’à stu tema è chì parechji paesi d’Auropa centrale cum’è l’Ungaria o a Polonia eranu opposti à l’accoglie di i refugiati. Di più, e populazioni auropee sò attentive à a quistione di l’immigrazione è i guverni auropei puderianu esse menu accogilienti chè 5 anni fà. A sapemu avà, a Turchia hà autorizzati i refugiati à francà i cunfini di a Turchia per andannesi in Auropa, per almenu 3 ghjorni. Bluff per ottene sustegnu di l’Auropa in u Nordu di a Siria di pettu à Assad o realtà ? A televisiò turca mette in evidenza sta decisione, filmendu refugiati in partenza ver’ di a Grecia, entrata di l’Auropa è spartenu dinù istruzione à i refugiati per andà ver’ di a Francia è a Germania.

Prublema. S’è ci hè una crisa umanitaria è chì i refugiati si n’andanu tutti ver’ di l’Auropa è chì i guverni auropei impediscenu i refugiati di vene, allora validerianu e pruposte di i partiti di strema diritta, ciò chì puderia avvialli à u puteri à e prussime elezzioni. (Hè megliu di vutà l’uriginale chì a coppia innò?) S’è accoglianu i refugiati, u risicu maiò hè d’alienassi i vutanti chì puderianu sanziunalli vutendu i partiti anti immigazione à e prussime elezzioni. Dilemma per i guverni auropei, fortunamente per elli à u cundiziunale, per u mumentu.