Avemi u piaceri di prisintavvi l’intarvista di una candidata capilista à l’alizzioni municipali di u mesi di i 15 è 22 di marzu di u 2020 pà a cumuna di COGHJA.
A capilista interrugata si chjama Dominique PASSALACQUA, prufissori di SVT à u Culleghju di VICU. Porta, insemi à a so squadra, u prughjettu “Ensemble pour COGGIA-SAGONE”.
Jean-Philippe CASALTA : « Dumenica, bonghjornu ! »
Dominique PASSALACQUA : « Bonghjornu! »
JPC : « Qualessi sò i raghjoni di a voscia candidatura annantu à issa cumuna? Aveti radichi da a parti da a voscia famidda? »
D.P : « Sò di COGHJA, u me babbu è a me mamma erani di COGHJA. Socu in COGHJA dapoi 40 anni di ghjà, dopu à i me studii in cuntinenti. Socu prufissori à u Culleghju di VICU dapoi 23 anni è veramenti impignata ind’a vita assuciativa di a me cumuna. Mi sò occupata di i ziteddi, di l’antinati ed aviu invidia, avà, chì a me cumuna si svigliessi un pocu è sia più dinamica! »
JPC : « Intarissemuci un pocu à a voscia dimarchja. Qualessu hè u prufilu di i vosci candidati? Dritta? Manca? Naziunalisti? »
D.P « A squadra d’omini è femini chì m’accumpagnani in iss’aventura spartani u listessu quadru di vita cà mè. Sò nati quì, sò crisciuti quì, i so famiddi sò di quì dapoi generazioni è generazioni, ci travaddani è sò impignati ind’a vita assuciativa di a noscia cumuna.»
JPC : « Aveti sceltu un tema di campagna, parletini un pocu… »
D.P « U me prugramma hè basatu annantu à ottu vulintà d’azzioni. Una parti à a quali tengu mori hè l’intratenimentu è a missa in valori di u patrimoniu di u nosciu paesi. Pà u patrimoniu rurali architetturali, avemi a furtuna d’avè un bastimentu cumunali magnificu chì ci vularà à rinnuvà, trasfurmà. Avemi dinò a furtuna d’avè un ustaria cumunali è mi piaciaria à mettala in delegazioni di serviziu publicu ind’u scopu di priservà u dinamismu ind’a noscia cumuna. Avemi infini un patrimoniu naturali eccezziunali, tra mari è monti. Vulariu dunqua avè un sguardu attentivu à a prutezzioni di l’ambienti. »
JPC : « L’ambienti, parlemuni, chì pudariati prupona di manera cuncreta annantu à issu sughjettu? »
DP : « Pà l’ambienti, ci sò leggi chì lu pruteghjani, a leggi liturali, a leggi ELAN. Ùn si pò micca fà tuttu è n’importa chì . Ci voli à priservà l’esistenti, custruiscia l’alloghji priservendu l’ambienti. Avemi a furtuna d’avè numarosi funtani è lavatoghji ch’aghju da ristabiliscia. Avemi qualchi chjassi è camini rurali da intratena è valurizzà, priservà tuttu u paesaghju di a cumuna, in fatti.
Vulemi renda u paesi attrativu. Vulariu ancu chì u nosciu paesi participessi à u label « Village Fleuri ». Vidaremi bè s’edda hè pussibuli o micca! »
JPC : « Ghjustu à puntu, annantu à u tema di l’eculugia è l’accunciamentu di u tarritoriu, qualessi sò l’elementi da migliurà par rapportu à a squadra precedenti? Micca sulamenti i sei anni passati… »
DP : « Mori travaddi sò stati intrapresi da i municipalità precedenti ch’ani uperatu in issu sensu. Certi prughetti d’impurtanza ùn ani micca vistu a luci di u ghjornu, pensu ch’edda sia una bona cosa. Pudariami migliurà ind’a cuntinuità. Ci sò mori cosi da fà, chjassi da apra, un chjassu litturali micca apartu da u quali u me babbu parlaia è ch’era apartu tempi fa. Ci vularà à rimettalu à l’ordini di u ghjornu. »
Vi pricisemi chì l’altri candidati dichjarati annantu à issa cumuna sò François COGGIA è Jean-Paul FLORY.